Një person i kërkuar nga drejtësia shqiptare do të vuajë tashmë dënimin në vend pas ardhjes nga Holanda.
Ekstradohet nga Hollanda 39 vjeçari i dënuar me 23 vite burg për “Vrasje”, me 8 vite burg për “Trafik të narkotikëve” dhe me 1 vit burg për “Armëmbajtje pa leje”. Nga Specialistët e Interpol Tirana u krye ekstradimi nga Amsterdami drejt vendit tonë të shtetasit shqiptar Bledar Qemalaj, 39 vjeç, lindur në Fier.
Bledar Qemalaj është arrestuar nga autoritetet policore hollandeze me qëllim ekstradimin drejt Shqipërisë, në zbatim të urdhër arrestit ndërkombëtar të nxjerrë nga Zyra Qëndrore Kombëtare Interpol Tirana, pasi Gjykata e Shkallës së Parë për Krimet e Rënda Tiranë me vendim penal nr. 18 datë 28.03.2006 e ka dënuar këtë shtetas me 23 vjet burg për veprën penale “Vrasje me paramendim” parashikuar nga neni 78 i Kodit Penal.
Po ashtu Gjykata e Shkallës së Parë për Krimet e Rënda Tiranë me vendim penal nr.68, datë 20.11.2009 e ka dënuar këtë shtetas me 8 vjet burg për veprën penale “Trafikim të lëndëve narkotike” parashikuar nga nenet 283/a/2 të Kodit Penal.
Gjithashtu Gjykata e Apelit Vlorë me vendim penal nr. 298 date 22.10.04 ka lënë në fuqi vendimin penal nr. 103 datë 27.05.2004 të Gjykatës së Rrethit Gjyqësor Fier,e cila ka dënuar me 1 vit burg, për veprën penale “Mbajtja pa leje e municioneve luftarake”, parashikuar nga neni 278/2 i Kodit Penal.
