Nis larja e hesapeve në bandën e Ilir Metës dhe Monika Kryemadhit. Një vit pas largimit nga stani i pushtetit, një sherr masiv dhe i paprecedentë ka përfshirë Lëvizjen Socialiste për Integrim, bandën më famëkeqe të hajdutëve në historinë e kombit shqiptar. Pas braktisjes nga këshilltarët bashkiakë dhe disa deputetë, Monika Kryemadhi dhe Ilir Meta po braktisen nga ish-drejtorët hajdutë, të cilët gjatë tetë viteve në pushtet, katër me PD dhe katër me PS, kanë ushqyer me paratë korrupsionit LSI.
Pas largimit nga pushteti, dhjetëra drejtorë dhe ish-drejtorë të LSI kanë ndërprerë çdo kontakt me Monika Kryemadhin. Drejtorët janë larguar për të mos kontribuar më me paratë që kanë vjedhur për partinë, për t’i shpëtuar burgut si dhe për t’u afruar me Partinë Socialiste. Ata po sillen sikur nuk kanë pasur kurrë asnjë lidhje me ndërmarrjen e Ilir Metës dhe Monika Kryemadhit. Nuk u janë përgjigjur asnjë thirrje për të marrë pjesë në takimet e partisë dhe as kërkesave për të dhënë para.
Largimi i drejtorëve nga banda e madhe ka tërbuar Monika Kryemadhin, e cila mori drejtimin e LSI, pasi bashkëshorti i saj, Ilir Meta, u bë nga Edi Rama president. Ditët e fundit, Monika Kryemadhi ka nisur një ofensivë ndaj ushtrisë së hajdutëve që e kanë tradhtuar. Monika ka nisur një tur takimesh me strukturat e çdo dege të partisë, duke sulmuar dhe kërcënuar drejtorët që e kanë tradhtuar.
Gjatë dy ditëve të fundit, në takimet me strukturat e partisë në Qarkun e Tiranës, Monika ka sulmuar me emra konkretë drejtorët që e kanë tradhtuar. Në takimin e fundit, Monika ka kujtuar për secilin drejtor, pallatet, pyjet, guroret, paratë cash, postet, pronat, lumenjtë, plazhet dhe favoret e tjera që kanë marrë nga partia. Duke u dhënë një mesazh hajdutëve që vijojnë t’i shkojnë pas, Monika ka kërcënuar hajdutët që e kanë tradhtuar se do të japin llogari për aktin e tyre dhe për mosmirënjohjen.
Lëvizja Socialiste për Integrim është në prag të një përplasje të madhe publike. Pas luftës së ftohtë dhe të nëndheshme me Monikës dhe drejtorëve, konflikti është gati të shpërthejë në publik. Nga ana e tyre, drejtorët dhe ish-drejtorët kanë paralajmëruar Monikën se mund të flasin dhe të rrëfejnë vjedhjet masive në bashkëpunim. Ata kanë kërcënuar Monikën se mund të dëshmojnë për paratë e korrupsionit që i dërgonin çdo muaj asaj, gjatë qeverisjes me PD dhe më pas me PS.
Prokuroria e Krimeve të Rënda dhe Policia e Shtetit duhet të survejojnë dhe të përgjojnë takimet e ditëve të fundit të Monika Kryemadhit me hajdutët që i kanë mbetur. Në çdo fjali, Monika Kryemadhi konsumon disa vepra të rëna penale. Në shpërthimin e saj ndaj ish-drejtorëve, Monika rrëfen mekanizmin kriminal të funksionimit të LSI, baza e secilës është plaçkitja masive e pasurive publike./Pamfleti
