Trajneri kampion bote me Italinë, Marcello Lippi, ka analizuar situatat dhe rezultatet e Kupës së Botës, por dhe mundësinë e kalimit të Ronaldos te Juventusi.
“Nuk jam i surprizuar nga rezultatet e kupës së botës, pasi është një turne me shumë konkurrencë. Askush nuk e priste që Japonia të ishte një hap larg çerekfinaleve. Italia është rritur shumë dhe shpresojmë që të shkojmë në Katar pas 4 vitesh.
Ju habiteni se si ekipet e vogla ecin kaq mirë, por harroni se 15-16 lojtarë prej këtyre skuadrave luajnë në Angli, Spanjë, Itali dhe mësohen me një stil loje të përparuar dhe marrin metoda të mira.
Italia mund të bënte më mirë me Suedinë. Në 90 vite kemi dështuar 2 herë për t’u kualifikuar, por nga krahu tjetër kemi fituar 4 herë Kupën e Botës. Për të ardhmen kemi lojtarë dhe të mirë, por dhe njerëz si trajneri Mançini që mund të bëjnë mirë”, – u shpreh ish-kampioni i botës në vitin 2006.
Tekniku u ndal te një moment mjaft interesant, kalimi i mundshëm i Ronaldos te Juventusi. “Shifrat janë të çmendura, por deri në një pikë të caktuar. Ka lojtarë që janë vlerësuar më shumë kohët e fundit.
E dimë se nuk i paguan të gjitha klubi, pasi janë sponsorë, marketingu, etj. Mendoj se për aspektin ekonomik është më e thjeshtë se sa mendoni. Dëshira për të fituar Championsin duket e madhe, Ronaldo është një lojtar i jashtëzakonshëm që shënon shumë”.
