Ish-futbollisti i njohur i Kombëtares Shqiptare të Futbollit si dhe i 17-Nëntorit, Skënder Hyka është ndarë nga jeta mëngjesin e kësaj të enjteje. Ai lindi në Tiranë më 06,09,1944 dhe gjithë karrierën e tij futbollistike ish-sulmuesi bardheblu ia kushtoi klubit të Tiranës.
Ai ka luajtur edhe për ekipin kombëtar të Shqipërisë. Prej vitit 2009 ka qenë kreu i Komisionit të Konkurrencës, ndërsa ishte pjesë e Komitetit Ekzekutiv të Federatës Shqiptare të Futbollit.
KUSH ISHTE SKËNDER HYKA
Skënder Hyka ka lindur në qytetin e Tiranës më 06.09.1944. Shkollën e mesme e ka kryer në qytetin e lindjes Tiranë. Kryen studimet e larta në Institutin e Kulturës Fizike dhe Sporteve në vitin 1968. Nga viti 1957 – 1974, ka luajtur futboll me të gjitha nivelet e Klubit Sportiv „17 nëntori“, që nga ekipet e moshave dhe deri tek skuadra e parë, duke qenë nga futbollistët kryesore të klubit.
Nga viti 1967-1974, ka qenë anëtar i ekipit shpresa dhe atij kombëtar në të gjitha aktivitetet e zhvilluara. Në vitet 1992 – 1995, ka qenë Sekretar i Klubit Sportiv Tirana. Në vitin 1997 ka qenë Sekretar i Përgjithshëm i Federatës Shqiptare të Futbollit. Nga viti 1992 e në vazhdim, është Anëtar i Komitetit Ekzekutiv të Federatës Shqiptare të Futbollit.
