Samiti me presidentin e Shteteve të Bashkuara Donald Trump dhe liderin e Koresë së Veriut Kim Jong Un, do të mbahet më 12 qershor.
Kim Jong Un ka mbërritur në Singapor tashmë pasi aty do të zhvillohet takimi me presidentin Trump.
Ka shkruar në Twitter ministri i Jashtëm i Singaporit Vivian Balakrishnan, “Mirëpritëm Kim Jong Un, i cili sapo ka arritur në Singapor”.
Kim pritet të takohet me kryeministrin e Singaporit, Lee Hsien Loong më vonë gjatë ditës, ka njoftuar Ministria e Jashtme.
Ndërkaq, Trump është larguar nga samiti i G7-s që po mbahet në Kanada dhe është nisur drejt Singaporit.
Presidenti Trump pritet të takohet me kryeministrin e Singaporit më 11 qershor. Bisedimet në mes të Trumpit dhe Kimit janë paraparë të zhvillohen më 12 qershor.
Ato pritet të kenë në fokus armët bërthamore të Phenjanit dhe përpjekjet për denuklearizimin e Gadishullit Korean.
Trump ka thënë se ky samit është shans që ndodh “vetëm një herë” për Korenë e Veriut.
Në delegacionin e Trumpit për këtë samit është edhe Sekretari amerikan i Shtetit, Mike Pompeo, këshilltari për siguri kombëtare, John Bolton, shefi i stafit të Shtëpisë së Bardhë, John Kelly dhe sekretarja për media Sarah Sanders.
