Thonë që është në fundin e karrierës, që Reali bën mirë ta shesë sa më shpejt, sepse duhet shfrytëzuar momenti dhe duhet marrë ndonjë si Nejmar. Me gjithë respektin për Nejmarin, Kristiano Ronaldo nuk ka pasues, për fatin e keq të Realit.
CR7 është si vera, sa vjen e bëhet më i mirë, shënon në çdo mënyrë dhe mban gjallë një Portugali që sot nuk meritonte pikë ndaj një Spanje të shkëlqyer.
Dy herë në avantazh luzitanët me Ronaldon, që e nisën fuqishëm, por dy herë reagoi bisha Diego Kosta, i cili kompenson gabimet e Naços dhe De Geas.
Në pjesën e dytë realisht në fushë ishte vetëm Spanja, gjithnjë në sulm dhe dominuese, duke gjetur një gol të mrekullueshëm me Naçon.
Megjithatë, Ronaldo vendosi të prishte festën e Hierros, me një gol fenomenal në fund. Të dyja janë super skuadra, duke parë ndeshjen e sotme, por Portugalia duket gjithnjë e më e varur nga CR7, ndërsa Spanja ka shumë armë dhe nuk qenka goditur aq rëndë nga largimin e Lopeteguit.
PORTUGALI – SPANJË 3-3
Shënues: Ronaldo 3′ pen., 44′, 88′ / Diego Kosta 24′, 55′, Naço 58′
