Rruga Orikum-Himarë është projekti i radhës që do të ndërtohet nga paketa ‘1 miliard’, e qeverisë shqiptare. Ministri i Infrastrukturës dhe Energjisë, prezantoi projektin dje nga Vlora, gjatë turit “Puna për Shqipërinë që duam, llogaridhënia publike e qeverisë”, ndërsa bëri me dije dhe investimet e tjera, që pritet të zbatohen në këtë qark. “Vlora ka perspektivë zhvillimi nëse ka investime të këtij karakteri që unë po ju them. Ne jemi duke punuar për t’i dhënë zgjidhje përfundimtare edhe problemit të mbetjeve në Vlorë, një investim që do të fillojë shumë shpejt nga qeveria shqiptare. Gjithashtu, bashkia ka sjellë një projekt për trajtimin e ujërave të zeza. Shumë shpejt do të lidhet kontrata për lotin e dytë të rrugës së Lumit të Vlorës dhe do pasohet me kontratën e tretë për të lidhur Selenicën me pjesën Levan-Tepelenë por dhe Qeparoin me pjesën e Kuçit”, u shpreh Gjiknuri.
Në Njësinë Administrative të Orikumit, Gjiknuri ju përgjigj interesimit të qytetarëve për çështjet që kishin të bënin me investimet në energjetike dhe në infrastrukturë. “Mbaruam linjën 110 kilovolt, mbaruam dhe nënstacionin. Po shikojmë për disa fonde edhe nga OSHEE që brenda një viti ky problem të zgjidhet për gjithë zonën tuaj. Siç zgjidhëm atë të madhen ku janë 3 milionë euro të investuara, po bëjmë edhe një projekt për pjesën e Shëtitores, pra pjesa e Radhimës përfshirë dhe rrugën e re drejt Llogarasë”, theksoi Gjiknuri. Ndërkaq, në takimin me banorë të Novoselës, ministri Gjiknuri foli edhe për aeroportin e Vlorës si një vepër e cila do të nxisë ekonominë dhe punësimin në zonë. Gjiknuri paralajmëroi se shumë shpejt pritet të përfundojë kontrata që i hap rrugë ndërtimit të aeroportit të Vlorës. Sipas tij, ky projekt përveç rritjes së punësimit do të sjellë edhe investime të tjera infrastrukturore për zonën. “Po avancojmë edhe me Aeroportin e Vlorës që siç ju e dini do të ndërtohet në Akërni. Shpresoj që për disa muaj ne ta përfundojmë edhe kontratën dhe pastaj ne të fillojmë procesin e lejeve dhe ndërtimin e aeroportit. Ky investim do të sjellë shumë zhvillim dhe jo vetëm punësim për njerëzit këtu pasi do të ketë shumë shërbime. Do të ketë edhe një rrugë të re që të ketë një lidhje më të mirë të aeroportit me autostradën. Ne jemi duke punuar për t’i dhënë zgjidhje përfundimtare edhe problemit të mbetjeve në Vlorë, një investim që do të fillojë shumë shpejt nga qeveria shqiptare”, u shpreh Gjiknuri.
Klosi optimist për turizmin
I pranishëm në takimet e zhvilluar në Vlorë ishte edhe ministri i Turizmit dhe Mjedisit, Blendi Klosi i cili u shpreh optimist që këtë sezon turistik Vlora do të mirëpresë më shumë vizitorë. Ai tha se falë disa ndërhyrjeve që janë bërë në prag të sezonit turistik, pritet një numër më i lartë vizitorësh.“Ajo që kemi bërë gjatë gjithë këtyre kohëve është përgatitja për sezonin turistik. Janë disa arritje në këtë fushë dhe pot ë krahasohet me numrin e turistëve gjithnjë e më tepër shtohet numri. Sot në darkë mbërrin charteri i parë nga Finlanda. Është një arritje në fushën e turizmit në Shqipëri, janë 30 mijë turistë që vijnë për herë të parë në Shqipëri. Duhet që këtë vit sezoni turistik të jetë i mirëmenaxhuar”, nënvizoi ministri i Turizmit dhe Mjedisit, Blendi Klosi.
