Dua Lipa hapi mbrëmjen e të shtunës spektaklin e madh në UEFA Champions League në kryeqytetin ukrainas Kiev, në duelin e madh final midis Realit të Madridit dhe Liverpulit. Performancës së shkëlqyer të këngëtares shqiptare iu ngjit spektakli në fushë, ku Reali fitoi Champions sepse mundi Liverpulin 3-1, një takim ku vendimtare rezultuan gafat e portierit të skuadrës angleze Karius, por edhe shkëlqimi i pazakontë i uellsianit Gareth Bale.
Në një finale spektakolare të luajtur në Kiev, vendimtare për fatin e takimit rezultuan dy supergola të Gareth Bale dhe dy gafa të rënda të portierit gjerman të Liverpulit, Karius. Pjesa e parë përfundoi në barazim pa gola, ndërsa do të mbahet mend për lotët e Salah dhe Karvajal, që u dëmtuan dhe u detyruan të lënë fushën e lojës para kohe.
Në fillim të pjesës së dytë, portiere Loris Karius zotëron një top dhe në tentativë për të rinisur aksionin, e përplas atë në këmbët e Benzema, që ishte shumë pranë dhe sheh që topi të përfundojë në rrjetë.
Redat anglezë reagojnë shumë shpejt dhe barazojnë me anë të Sadio Mane, pas një skeme të ekzekutimit të një këndoreje. Pas barazimit, Zidane luan kartën Bale dhe uellsiani nuk zhgënjen, pasi i jep avantazhin madrilenëve vetëm pak minuta pasi shkeli në fushë, me një roveshiatë spektakolare, që përfundoi në trekëndëshin e portës së Liverpulit.
Skuadra angleze tenton edhe njëherë të barazojë, por pas një aksioni personal, topi i gjuajtur nga Mane përplaset në shtyllën e portës së Keilor Navas. Vetëm 5 minuta nga fundi i ndeshjes, Bale lëshon një goditje shumë të fortë me të majtën, ndërsa edhe këtë herë Karius gabon në tentativën për ta zotëruar topin dhe sheh t’i rrëshqasë e të përfundojë në rrjetë. Si përfundim fitoi Reali i Zinedin Zidane, duke ngritur trofeun lart dhe duke hyrë në histori, pasi asnjë skuadër gjatë pesë dekadave të fundit nuk e kishte fituar Champions tri herë radhazi dhe për këtë meriton përgëzime skuadra dhe vetë trajneri Zidane, që konfirmohet kështu si një rekordmen edhe si trajner./Pamfleti Sport
