Partia Demokratike është mbërthyer sërish nga sherret dhe përplasjet. Që pas takimit të 18 majit mes Lulzim Bashës dhe Edi Ramës, Berisha nisi një ofensivë goditjesh të fshehta ndaj kreut të PD dhe ditët e fundit janë dhënë sinjale se përplasjet mes tyre janë shtuar ndjeshëm. Pakti Rama-Basha nuk u kapërdi nga Berisha dhe ai nxori “gardën e vjetër” për të sulmuar Bashën, ndërkohë që po ashtu e detyroi të mbante zgjedhjet në parti, por nuk mundi ta largonte. Por pas shpërthimit të skandalit “Xhafaj”, sherri mes tyre është rindezur.
Gazeta SOT ka mësuar se ditët e fundit Sali Berisha ka tentuar të marrë në kontroll drejtimin e partisë, duke dhënë udhëzime dhe direktiva për mënyrën e reagimit, por që të gjitha janë hedhur poshtë. Përplasja e parë Basha-Berisha ndodhi në mes të muajit, ku PD vendosi të dilte në protestë më 26 maj. Pas këtij vendimi u aludua për shumë skenarë që do të ndiqeshin, edhe pse nuk kishte asgjë zyrtare. I pari që doli ishte Sali Berisha, ku paralajmëroi skenarë dhune.
“26 maji është dita e flakjes se kalbësirave të narkoshtetit me në krye Noriegën dhe shpëtimit të Shqipërisë”, tha ai. Pas kësaj deklarate nisën aludimet se do kishte dhunë në protestë, por më pas Lulzim Basha rrëzoi çdo skenar. Ai dhe zyrtarë të PD folën hapur se më 26 maj nuk do të ketë asnjë dhunë, por do ketë protestë paqësore. Sipas informacioneve, edhe në takimet Berisha-Basha, ish-kryeministri ka këmbëngulur për revolta, por që lideri demokrat nuk i ka pranuar.
Por kulmi i përplasjeve të tyre arriti në ditën e protestës. Sipas informacioneve, njerëz të Berishës nisën tentativat për destabilizim. Burime të gazetës thanë se mes atyre që nisën sulmet ndaj Ministrisë së Brendshme kishte mbështetës të flaktë të ish-kryeministrit dhe plani i tyre ishte për të destabilizuar vendin. Një ndër ata që e paralajmëroi diçka të tillë ishte nënkryetari Edi Paloka, i cili tha se do të derdhej gjak. Por ishte Lulzim Basha ai që ndërhyri në kohë dhe i tërhoqi të gjithë protestuesit, duke i rrëzuar Berishës skenarin e dhunës.
Skenarët e Berishës
Ajo që konfirmoi se Berisha po tenton të marrë kontrollin e partisë dhe të ngjallë vetëm kaos e dhunë është mbledhja e djeshme e grupit parlamentar të PD. Teksa reforma në drejtësi ka hyrë në bazë dhe vendimi për negociatat po afron, Berisha ka dalë dje me një tjetër skenar, duke kërkuar bojkot parlamentar apo djegie mandatesh. Por grupi parlamentar nuk e ka pranuar dhe mes tyre dhe Lulzim Basha. Pra për rreth 2 javë Sali Berisha është refuzuar 3 herë nga Basha, i cili e ka kuptuar se paraardhësi i tij ka si synim vetëm krijimin e kaosit në vend.
Një sinjal të tillë Berisha e dha përmes reagimit që tha pas protestës, kur tha se plani ishte të përsëritej vitit 1998. “Në të vërtetë, pas zhdukjes se Fatziut, në përballjen e tyre me narkopolicinë, të revoltuarit guximtarw po të mos i tërhiqte kryetari i PD në pak minuta do të vendosnin flamurin e fitores mbi ministrinë e drogës dhe krimit, njëlloj siç e vendosën më 14 shtator të vitit 1998 në Kryeministri”, tha ai.
Por duket se pavarësisht kërkesave të Berishës, Basha nuk është i bindur se dhuna mund të çojë në zgjidhje të situatës dhe për këtë arsye ka nisur një sherr i ashpër mes tyre. Basha ka filluar të tregojë se është ai që drejton partinë dhe kjo ka acaruar ish-kryeministrin, i cili prej kohësh ka tentuar djegie mandatesh, bojkote dhe dhunë, por asnjëra nuk është realizuar.
