Policia ka arrestuar këtë të enjte punonjësin, që një ditë më parë hoidhi në humnerë kamionin e punës. Ngjarja ka ndodhur në Moglicë, vend ku është duke u ndërtuar një HEC.
Punonjësi Bledar Kastrioti është pushuar nga puna dhe menjëherë pasi iu komunikua shkarkimi, ka hedhur kamionin në humnerë.
“Pasi ka marrë njoftimin për largimin nga puna prej kompanisë ndërtuese të HEC-it Moglicë, ku punonte si shofer kamioni, ka marrë mjetin tip kamion dhe në aksin rrugor Opar-Moglicë, e ka hedhur këtë të fundit nga një lartësi prej 100 m duke e dëmtuar plotësisht dhe më pas është larguar nga vendi i ngjarjes. Materialet i kaluan Prokurorisë së Rrethit Gjyqësor Korçë për veprat penale “Vetëgjyqësia”, “Largimi nga vendi i aksidentit”, “Shkatërrimi i pronës” parashikuar nga nenet 277, 273 e 150 të Kodit Penal”, tha policia.
