Nxënësit e një klase kanë menduar ta bëjnë të pazakontë ditëlindjen e shoqes së tyre Stelinës, e cila në 15 vite jetë s’kish festuar kurrë asnjë vit të jetës së saj . Ata na kanë shkruar për t’i dhënë asaj një mesazh, por produksioni ka menduar t’i organizojë asaj një ditëlindje përrallash, një kujtim të parë ditëlindjeje që do i mbetet gjatë në mendje.
Historia e jetës së Stelinës, nuk është aspak e ngjashme me moshatarët e saj. Shoqet e saj të klasës, treguan se Stelina lindi nga martesa e dytë e babait të saj, me të ëmën e cila është me aftësi të kufizuara mendore.
Kushtet e vështira në të cilat ajo jetonte u rënduan më shumë kur babai i saj u nda nga jeta kur ajo dhe vëllai i saj ishin vetëm në klasë të dytë.
“Ata jetojnë në kushte të mjerueshme ekonomike, me një pension të vogël të nënës së tyre ndërkohë që janë 5 frymë për t’u ushqyer. Ata janë dy fëmijë që kurrë nuk i kanë njohur lodrat, kompjuterin apo gjithcka tjetër që mund të dojë një fëmijë si ne. Ata nuk marrin pjesë kurrë në aktivitetet e shkollës, në mbrëmjet që organizojmë në shkolle”, tregojnë shoqet e saj të klasës. Madje dhe në bisedat që ato bëjnë për kujtimet e lodrat e fëmijërisë, Stelina shmanget pasi s’ka asgjë për të treguar.
Gjithësesi arsyeja që i shtyu shokët e saj të klasës për t’iu drejuar “Ka një mesazh për ty”, ishte një letër që ata gjetën një ditë rastësisht poshtë bankës së Stelinës.
“Këtë letër ajo ia kishte drejtuar babait të saj që nuk jeton më. Aty ajo kishte shkruar se e ndjente shumë mungesën e tij, se e vuante shumë faktin qe s’kishte asnje kujtim të bukur nga femijeria, nuk mund të përballonte më asgjë dhe se ishte e lodhur nga jeta” treguan nxënësit, të cilët ishin tronditur dhe përlotur nga letra e shoqes. Përvec surprizës së ditëlindjes, nxënësit e klasës i kërkuan Stelinës të ishte më e hapur me ta dhe i premtuan se do ta mbështesnin gjithmonë.
