Komisioni i Pavarur i kualifikimit pritet që të përjashtojë nga sistemi i drejtësisë një pjesë të madhe të gjyqtarëve dhe të prokurorëve në vend. Deri më tani ka përfunduar procesi për 4 nga 57 emra në listën prioritare. Rasti më i fundit ishte ai i prokurores së Shkodrës, Besa Nikëhasani, e cila u shkarkua sepse nuk justifikonte pasurinë. ILDKP e nxori atë të pastër, mirëpo KPK nga verifikimit që ka bërë, pa se kishte probleme me pasurinë.
Gazeta ka mësuar se komisioni vetingut nuk është mjaftuar me dokumentet që i ka dorëzuar ILDKP, edhe pse kjo e fundit ka kryer verifikime pranë ZVRPP, Drejtorisë së Pastrimit të Parave, Tatimeve, Doganave, etj. Anëtarët e komisionit kanë kryer një verifikim të thellë nga e para për të gjithë emrat prioritarë dhe rolin më të madh në këtë mes e ka pasur Drejtoria e Pastrimit të Parave. Sipas informacioneve, kjo drejtori ka bashkëpunuar me agjencitë e huaja për të gjithë emrat e listës prioritare dhe për shumë prej tyre është mbyllur procesi për 3 ditë. Agjencitë partnere kanë kthyer me shpejtësi përgjigje dhe ka rezultuar se shumë prej emrave kanë probleme.
Ka nga ata që kanë bërë transferta bankare jashtë dhe nuk i kanë deklaruar, ka të tjerë që anë mashtruar me llogaritë bankare, por ka dhe nga ata që kanë mashtruar me pasuritë e patundshme, duke mos i deklaruar. Pra edhe pse shumë rezultojnë të pastër nga ILDKP, Drejtoria e Pastrimit të Parave i ka rrëzuar të gjithë. Një burim i tha gazetës se nga lista e 57 emrave janë zbuluar dhe transferta drejt kompanive “offshore”. Të gjitha dosjet janë dorëzuar pranë KPK dhe procesi po ecën në bashkëpunim me Operacionin Ndërkombëtar të Monitorimit.
Verifikime familjarëve
Paralelisht me gjyqtarët dhe prokurorët po verifikohen dhe familjarët e tyre. Bëhet fjalë për mbi 3 mijë persona, që janë kryesisht bashkëshortë dhe fëmijë të 700 gjyqtarëve dhe të prokurorëve, që po kalojnë në sitë. Arsyeja kryesore që po verifikohen brenda dhe jashtë vendit, rezulton se banesat, bizneset, tokat dhe pasuri të tjera në rastet më të shumta janë në pronësi të bashkëshortëve dhe familjarëve të gjyqtarëve dhe të prokurorëve. Ka dhe raste të tjera kur ato janë në emër të prindërve të tyre.
Për këtë arsye, ka nisur një verifikim shumë i gjerë nga ILDKP, e cila ka vënë në lëvizje hipotekat dhe Drejtorinë e Përgjithshme të Pastrimit të Parave, për të parë më me detaje situatën. Sipas informacioneve, po shihet nëse pronat kanë ndryshuar pronësi kohët e fundit, si dhe nëse janë shtuar apo blerë. Nga burimet pranë ILDKP, numri total i të afërmve dhe familjarëve të gjyqtarëve dhe i prokurorëve që po verifikohen, arrin në mbi 3 mijë.
Dyshimet janë se gjyqtarët dhe prokurorët e kanë shpërndarë pasurinë e tyre, duke mos mbajtur në emër të tyre gjithçka, pasi disa apartamente i kanë kaluar në emër të bashkëshortëve ose bashkëshorteve, apo dhe në emër të fëmijëve dhe prindërve të tyre. Sipas të dhënave, vitet e fundit ka pasur një trend rritës të pronave që administrojnë fëmijët e gjyqtarëve dhe të prokurorëve. Por kushdo që ka abuzuar do të duhet të japë llogari./ SOT
