Duket se deputetit Tom Doshi nuk i del inati me shpalljen non-grata të tij nga ana e Shteteve të Bashkuara të Amerikës.
Në një prononcim për mediat, në ambjentin e jashtëm të Kuvendit, Doshi tha se nëse do të bëhet Vettingu, SHBA-të do të përjashtojnë të gjithë deputetët.
“I bie të kalojnë të gjithë non grata nëse do të bëhet vetting“.
Doshi kërkoi të kalojnë në vetting edhe politikanët dhe nëse kjo ndodh tha ai, gjysma e deputetëve nuk do jenë më në Kuvend.
‘Unë kërkoj të prononcohet. Ju garantoj ju se nëse bëhet vetting në politikë nuk mbeten as gjysma në parlament. Vettingu të fillojë dhe të hetojë që tek shkollimi i fëmijëve që i kanë shkolluar të gjithë jashtë, ku janë të ardhurat e këtyre politikanëve? Te vilat, tek makinat, tek jeta e luksit që bëjnë. Dhe ta shohim sesi dalin.’-tha Doshi.
Me 16 prill, Departamenti i Shtetit njoftoi se i ka ndaluar hyrjen në Shtetet e Bashkuara deputetit Tom Doshi dhe familjes së tij.
Pas ish kryeprokuorit Adriatik Llalla, Tom Doshi bëhet zyrtari i dytë nga Shqipëria të cilit i ndalohet hyrja në Shtetet e Bashkuara për shkak të përfshirjes në raste madhore korrupsioni.
