Lefter Gogën 70-vjeç, u bë hero për katër alpinistët e rinj të bllokuar në shpatin e thepisur të malit të Murganës. I moshuari nga fshati Vrisera në Dropull, i dha zgjidhje një situate të cilës nuk mund t’i jepnin as forcat Delta e zjarrfikësit.
Lefteri iu rikthye shpatit të thepisur pas 30 vitesh që jetonte në emigrim dhe udhëhoqi forcat e shpëtimit në një rrugëtim që kërkoi rreth 5-6 orë ecje me këmbë.
“Në atë vend nuk shkonte asnjeri, vetëm unë dhe një tjetër, pasi e dinim rrugën se punonim atje. Ata kishin një zjarr të ndezur.
Ne zbritëm poshtë të lidhur”, u shpreh 70-vjeçari për Top Channel.
Katër të rinjtë ishin nisur prej fshatit Selo për të mbërritur në Sotirë nëpër një terren të thepisur malor me thyerje të forta dhe dëborë të dielën në mëngjes.
Me rënien e errësirës grupi humbi orientimin brenda një pylli të njohur si “Gështenjat e Djegura”.
Të rinjtë treguan se kishin ndezur zjarr për të përballuar natën dhe të ftohtin por u detyruan të kërkojnë ndihmë për shkak se po dehidratoheshin pas mungesës së ujit prej 12 orësh.
Një helikopter ushtarak që u thirr për ndihmë arriti vetëm të lokalizojë territorin, por nuk mundi të ulet edhe pse tentoi disa herë.
Prefekti i qarku që drejtoi gjithë operacionin tha se pa ndihmën e 70-vjeçarit gjithçka do ishte më e vështirë.
