Ish-ministri i Drejtësisë, Ylli Manjani ka reaguar ashpër për sa i takon vendimit që ekstradoi të hetuarin e Prokurorisë së Krimeve të Rënda, Nezar Seiti drejt Italisë. Personi që ka krijuar këtë situatë të rëndë ligjore, për Manjanin është Kryeprokurorja e përkohshme, Arta Marku. ”Nuk mund të ketë faj prokurori i thjeshtë, pse Prokurori i Përgjithshêm vendos, pa e pyetur, largimin e personit që ai (prokurori i çështjes) po e heton”,-shkruan Manjani në facebook. Akuza e rëndë e ish-minsitrit është se me ligjet e drogës dhe të krimit zbatohet, dhe se kjo është prova e kapjes së drejtësisë.
”Në krye të Prokurorisë duke larguar çdo provë apo person nga hetimi dhe drejtësia shqiptare”,-shton më tej Manjani. Prokuroria e Përgjithshme dje sqaroi se nuk kishte asnjë informacion për statusin e Nezar Seitit.
Statusi i plotë i Ylli Manjanit
Drejtësi me ligjet e drogës.
Në asnjë shtet ku vepron ligji nuk ndodh që prokurorit i heqin nga duart të pandehurin dhe e marrin në përgjegjësi penale, për këtë gjë!
Është kulmi i maskarallëkut!
E përsëris: i thonë prokurorëve që hetojnë trafikantin, jeni fajtorë për faktin se ne (dmth eprorët) ta hoqëm trafikantin nga dora!!!
Kjo ndodh në prokurorinë e përkohshme të përgjithshme që merret me çështje të përveçme! Zgjedhja e zonjës Arta Marku në dhunim të Kushtetutës, nuk mund të mos prodhonte kësi ngjarjesh të shëntuara!
Ligji i shtetit ngarkon me përgjegjësi Prokurorin e Përgjithshëm që të mbledhë të dhëna e të koordinojë prokuroritë e çdo hallke! Nuk mund të ketë faj prokurori i thjeshtë, pse Prokurori i Përgjithshêm vendos, pa e pyetur, largimin e personit që ai (prokurori i çështjes) po e heton. Ja largojnë të pandehurin fshehtas dhe i thonë “fajin e ke për largimin që bëmë ne”! Kulmi!
Kjo llogjikë vetëm në ligjet e drogës e të krimit zbatohet, jo nga drejtuesit e Anti-krimit! Kujt i bëhet qejfi duke goditur pa faj prokurorë e çështjes? Fare e thjeshtë: trafikantëve dhe politikanëve që janë me ta! Ja ku është prova e kapjes së drejtësisë: në krye të Prokurorisë duke larguar çdo provë apo person nga hetimi dhe drejtësia shqiptare!
Asnjë filtër i shtetit nuk funksionoi asnjë! Se me ç’urdhër doli nga paraburgimi i pandehuri? Si ka mundësi që drejtuesja e Prokurorisë dhe Ministrja e Drejtësisë pretendojnë se nuk e dinin që ai ishte i arrestuari i drejtësisë sonë?
Ka shumë pyetje, por përgjegjëse është PROKURORIA e PERGJITHSHME! Ajo është e para! E kishte për detyrë ta dinte këtë gjë! Bashkë me të duhet ta dinte Drejtoria e Burgjeve dhe Policia e Shtetit, por këto vijnë të dytat në radhë.
Në fund pa dyshim edhe Ministrja e Drejtësisë e cila e kishte për detyrë të dinte statusin e te paraburgosurit! Drejtoria e Burgjeve pyetet gjithmonë sa herë merret një vendim ekstradimi!
Çdo me thënë kjo “nuk e dinim”?!
Nëse duam të argumentojmë me llogjikën e ligjit të shtetit. Nëse përdoret llogjika e drogës ajo që bënë me këtë ekstradim është krejt “e rregullt”!
Dhe po në llogjikën e ligjit të shtetit, them se Prokuroria e Krimeve të Rënda fillon direkt çështjen dhe fillon arrestimet e të gjithë zinxhirit të atyre që lejuan dhe kryen këtë ekstradim! Ky është pengim i pastë i drejtësisë! Është reagim i krimit të organizuar mbi drejtësinë! Nëse nuk mendohet kështu, kush i thotë vetes prokuror e gjykatës, ta lërë më mirë atë detyrë!
