Sidnej përjetoi sot ditën më të nxehtë që nga viti 1939, me temperatura që në zona të ndryshme të qytetit arriti deri në 47,3 gradë Celsius.
Që në fillim Zyra Meteorologjike e vendit tha se kjo do të ishte dita më e nxehtë në historinë e qytetit, pasi mati temperaturën 47,1 gradë Celsius në Penrith.
Megjithatë, kjo zyrë shtoi më pas se kishte gabuar, pasi nuk kishte parë në arkiva që temperatura më e lartë kishte arritur në vitin 1939, me 47,8 gradë Celsius.
”Ndeshjet e turneut ndërkombëtar të tenisit, që po zhvillohen në Sidnej, u ndërprenë pasi temperatura në fushat e tenisit kishte kaluar mbi 40 gradë Celsius, çka detyroi tenisten e njohur, Kristina Mladenoviç që të tërhiqej pasi ishte ndjerë keq nga ana shëndetësore”, njoftoi televizioni australian, ABC.
