Policia e Shkodrës ka ndaluar tre persona, të cilët kishin ngritur një punishte për të prodhimin e ushqimeve në mënyrë të jashtëligjshme, duke dëmntuar shëndetin e konsumatorëve.
Krahas ushqimeve të bllokuara, pranë fabrikës u gjeten edhe fuçi të mëdha me vajra të ndryshëm, të cilët dyshohet se përdoreshin gjatë proceseve të përpunimit.
Njoftimi i Policisë së Shtetit
Prodhonin produkte ushqimore në kundërshtim me ligjin, arrestohen 3 shtetas dhe shpallet një në kërkim.
Më datë 28.03.2018, nga Struktura kundër Krimit Ekonomiko -Financiar të D. V. P. Shkodër në bashkëpunim me strukturat qendrore të AKU-së u zbulua dhe u dokumentua aktiviteti i kundraligjshëm për prodhimin e produkteve ushqimore dhe në përfundim të kontrollit u bë arrestimi në flagrancë i shtetasve:
G.B, 60 vjeç, banues në lagjen ” Ahmet Haxhia”, pronar i firmës,
E. B, 26 vjeç, banues në lagjen “Ahmet Haxhia”, i punësuar në firmë,
H. E, 60 vjeç, banues në lagjen “Partizani”, e punësuar merceologe në firmë
Si dhe u shpall në kërkim shtetasi D. H, 45 vjeç, banues në Tiranë , me detyrë Inxhinier merceolog në firmë.
Arrestimi i këtyre shtetasve u bë pasi më datë 28.03.2018 nga ana jonë janë kapur në flagrancë në vendin e quajtur Lagjja “Skënderbeg” zona industriale ish -Fermentimi, në punishten e një firme ku prodhoheshin produkte të ndryshme ushqimore në kundërshtim me ligjin.
Në kuadër të këtij operacioni u bë sekuestrimi i të gjitha produkteve në cilësinë e provës materiale.
Materialet iu referuan Prokurorisë Pranë Gjykatës së Shkallës Parë Shkodër në ngarkim të këtyre shtetasve për veprat penale të “Prodhim i kundraligjshëm i artikujve dhe mallrave industriale dhe ushqimore” dhe “Fshehja e të ardhurave” parashikuar nga nenet 288/a dhe 180 të Kodit Penal
Fenomeni i gjakmarrjes është vlersuar shpesh si një proces i pashmngshëm i shoqërisë shqiptare. Operazione Colomba, korpusi i jodhunës ka hartuar një raport në lidhje me gjakmarrjen në Shqipëri, duke përmendur rastet, fiset, zona, por edhe jetët e shuara, të cilat në raport thuhet se kanë qenë më shumë meshkuj.
Kështu, në dhjetor të vitit 2017 baza e të dhënave e përpunuar nga operazione Colomba përfshin 550 raste, ndër të cilat janë raste plagosje, vrasje në tentativë, vrasje për shkak të hakmarrjes e gjakmarrjes.
Përsa i përket viktimave, pjesa më e madhe janë të gjinisë mashkullore, nga 550 raste, 508 janë meshkuj. Në njëzet vitet e fundit, apelimi ndaj traditës zakonore i është përgjigjur disa nevojave diktuar nga konteksti i ri në të cilën manifestohet.
Raporti thotë se nhjëra anë mund të jetë nevoja e përmbushjes së boshllëqeve institucionale dhe nga ana tjetër urgjenca me përballjen e kapitalizmit global.
Një ditë pas vizitës së ministrave Etilda Gjonaj e Fatmir Xhafaj dhe ambasadores Romana Vlahutin në Vlorë, Task-Forca nis verifikimet në këtë qark.
Nga burimet lokale mësohet se Task-Forca do të ketë takime në Prefekturë, ZVRPP dhe Avokaturën e Shtetit.
Ditën e martë, ambasadorja e BE-së, Romana Vlahutin dhe ministrja e Drejtësisë, Etilda Gjonaj, pasi kanë vizituar fillimisht Bashkinë e Vlorës, i janë drejtuar Pallatit të Kulturës teksa kanë zhvilluar një takim pa praninë e mediave me punonjës së Hipotekës së qytetit bregdetar dhe të ALUIZNI-t e më pas me qytetarë të interesuar për çështjen e pronës.
Pas takimit që ka zgjatur rreth 90 minuta, Vlahutin ka theksuar se prona private është një e drejtë themelore dhe si e tillë është e panegociueshme për BE,
“E nisëm nga Vlora takimin për pronat për shkak të problematikës që pikërisht Vlora mbart. Ky udhëtim është fakt mbledhës, ndërsa në fokus janë dëgjesat me qytetarët. Prona privat është një e drejtë themelore dhe si e tillë është e panegociueshme për BE, ndërsa gjatë 27 viteve është krijuar një kaos me pronat teksa pronarë të trojeve 300 vjeçare ende nuk mund të regjistrojnë dot pronat e tyre. Njerëzit kanë pritur gjatë ndaj ka ardhur koha që ky problem të gjejë zgjidhje”, ka deklaruar ndër të tjera ambasadorja e BE së Romana Vlahutin.
Më pas, ambasadorja e BE ka zhvilluar një takim me prokurorët dhe gjyqtarët e Vlorës. Pas këtij takimi ajo ka theksuar se, “abuzimi që ka ndodhur në 25 vjet është mjaft i rëndë”.
Dy ditë më parë në një dalje publike, ministrja Gjonaj ka paralajmëruar një reformë të thellë të pronës, që Qeveria do të kryejë. Sipas saj Reforma ka nisur me pezullimin e përkohshëm te lëshimit dhe regjistrimit të AMTP-ve në zonën e bregdetit, kjo për shkak të abuzimeve dhe të korrupsionit të jashtëzakonshëm të identifikuar në këto zona./Shqip
Qjë ditë më parë emisioni “Stop” transmetoi skandalin e të ashtuquajturit hoxhë, Fatmir Lloçit, i cili me pretekstin e shërimit ngacmonte seksualisht gratë e vajzat që i shkonin në banesë.
Sot Komisariati i Policisë Numër 2 në kryeqytet ka njoftuar nisjen e procedimit penal ndaj tij me akuzën e ngacmimit seksual, si dhe i ka kërkuar Televizionit Klan t’i vendosë në dispozicion të gjitha pamjet filmike dhe personat e përfshirë në këtë ngjarje si nevojë e hetimit, raporton “Tv Klan”.
Gjithashtu ka reaguar edhe përfaqësuesi i Komunitetit Mysliman Shqiptar, Ylli Gurra, i cili e quajti Lloçin hajdut të pafytyrë dhe i bëri thirrje qytetarëve të mos bien pre e abuzuesve që nuk kanë asgjë të përbashkët me fenë islame.
“Ajo që dua të sqaroj është që të tillë persona ose abuzues nuk kanë aspak lidhje me të qenit hoxhë! Rasti i mbrëmshëm ka qenë një degjenerim apo një abuzim i mirëfilltë për gjithçka, i besimtarëve dhe qytetarëve. Nuk ka lidhje aspak e askund me fenë dhe profesionin fisnik të hoxhallarëve që shërbejnë kudo në Shqipëri. Unë iu bëj apel që të mos bini pre e këtyre abuzuesve të paskrupullt, të cilët për hir të 5 qindarka denigrojnë figurën e qytetarëve, që për arsye shëndetësore detyrohen të zenë dyert e këtyre e vjedhësve të pafytyrë!”, u shpreh Gurra.
Në 5 muajt e fundit nga Prokuroria dhe Policia janë goditur 4 skema të mëdha të tjetërsimit të pronave në bregdet. Me anë të falsifikimit të dokumenteve në zonat turistike të Spillesë, Karaburunit dhe Ranës së Hedhun u përvetësuan padrejtësisht rreth 290 hektarë tokë.
Më flagrante është ajo e Karaburunit, ku 220 hektarë, me vlerë rreth 100 milionë euro, i kaloi një personi. Por Prokuroria e Vlorës arriti ta zbulojë skemën duke arrestuar 5 persona. Gjykata e Vlorës dënoi katër prej tyre me 43 vite burg ndër ta zyrtarë të hipotekës ndërsa shpalli të pafajshëm një avokat.
Dy javë më parë në Lezhë u arrestuan 12 persona, në kërkim u shpallën 12 të tjerë, pasi kishin tjetërsuar 23 hektarë tokë në plazhin e Ranës së Hedhun. Ndër të arrestuarit ishte dhe kryetari i Bashkisë Lezhë, Fran Frrokaj, zëvendësi i tij, si dhe një sërë zyrtarësh të tjerë.
Plazhi i Spillesë në Kavajë duket se ka qenë një nga më të preferuarit e falsifikatorëve. Në Shkurt, policia goditi një skemë ku ishin tjetërsuar rreth 11 hektarë tokë, ndër sipërfaqet që i kishte kaluar privatit ishte dhe poligoni i qitjes. Kjo pronë ishte privatizuar nga biznesmeni Idlir Karkini, i cili ende nuk është arrestuar. I përfshirë në këtë rast është edhe Kryetari i Bashkisë së Rrogozhinës, të cilit me vendim gjykate i është ndaluar dalja jashtë vendit.
Po në Spille, në Nëntor të vitit të kaluar u godit një grup tjetër zyrtarësh. Ata me anë të falsifikimit të dokumenteve kishin kaluar tek privati 36 hektarë tokë. 10 zyrtarë lokalë u prangosën në këtë rast. Hetime për skema të tilla të tjetërsimit të pronës në bregdet vazhdojnë në disa qytete të vendi.
Një 65-vjeçar jeton në tualetet publike të qytetit të Vlorës. Prej 10 vitesh, Vladimir Tahiraj jeton në një sipërfaqe rreth 5 metra katrorë, vend i ftohtë dhe me lagështirë.
“Fiks Fare” udhëtoi drejt Vlorës, ku dëgjoi rrëfimin prekës.
“Kushtet janë shumë të vështira Edhe qeni mos të rrojë kështu. Kam ftohtë, uri. Jam bërë dy lekë njeri, i dobët. Gjendja është shumë e keqe”, thotë Tahiraj.
Më tej, ai shton se kërkon vetëm një kolibe.
“Të paktën të mos vdes këtu. Të mos thonë njerëzit vdiq në banjo, se kjo ngel si histori”, vijon ai, teksa tregon edhe kalvarin e jetës.
Në diktaturë ka bërë 28 vite burg për plagosje të rëndë, transmeton TCH. Pas viteve ’90 është martuar dhe ka një fëmijë. Më pas është ndarë dhe ish-bashkëshortja e djali jetojnë prej shumë vitesh në Greqi, ndërsa Vladimiri nuk ka asnjë kontakt.
“Unë jam ndarë nga bashkëshortja, po bëj 20 vite vetëm. Po bëj 20 vite që jetoj në këto ganxha. Kam punuar dhe më hoqën nga puna. Kam që në vitin 2008 në këtë vend. Jetoj vetëm me 2.500 lekë asistencë. Unë rri ditë e natë shtrirë, nga e keqja. Ky vendi këtu ka qenë banjo. Vendin ma dha bashkia se nuk kisha ku të rrija. Kushtet janë shumë të këqija. Edhe qeni nuk rri ashtu”, vijon Tahiraj, ndërsa tregon edhe vendin ku fle dhe ha.
“Unë po pata gatuaj. Në bashki nuk ta fishkëllen njeri. Nuk të jep asnjë dhomë. E kam takuar 5 herë kryetarin. Ja çfarë kam gatuar sot, kaçamak. Bukë me vaj dhe ujë, si i thonë. Ja kaçamaku me bukë (tregon tenxheren). Shkoq bukën dhe e lyej me pak vaj kikirik dhe ujë. S’ka trahana. Bukën ma jep një i furrës. Këto të tjerat janë ato që mbaj qirinjtë, se s’ka as drita. Vendi është shumë i ftohtë, rri brenda në batanije. Unë dal nga dhoma nga ora 12:00, futem në orën 16 ose 17 brenda”, thotë 65-vjeçari.
Ai shprehet se në burg ishte 100 herë më mirë, pasi kishte për të ngrënë, për të pirë dhe për të fjetur. Në fund, pyetjes se çfarë do të bëjë, i përgjigjet: Do të vdes këtu!
Tregtimi i pijes energjike “B-52” ka nisur në Shqipëri që në vitin 2006, pikërisht me këtë markë, ku janë të gjitha shenjat dalluese, që nga emri, simbolet unike, kombinimi i ngjyrave, lloji i shkrimit, ose slogani i caktuar. Kjo pije energjike është futur në Shqipëri nga Arseni shpk, e vërtetuar edhe me deklarata doganore.
Dy kompani, pikërisht Arseni shpk, subjekt shqiptar dhe “Bavaria N.V”, subjekt holandez, janë në konflikt që prej vitit 2010 për të drejtën e markës mbi këtë pije, pra kush e ka prodhuar për herë të parë këtë pije. Por, për të kuptuar se çfarë ka ndodhur konkretisht, kemi verifikuar dokumentacionin e të dy kompanive mbi këtë pije.
Sipas dokumenteve, rezulton se regjistrimi i kësaj marke në Shqipëri për herë të parë është bërë në vitin 2008, pavarësisht se tregtohej që nga viti 2006, por aplikimi nuk është bërë as nga Arseni shpk dhe as nga Bavaria NV. Konkretisht, më datë 18 prill 2008, shoqëria maqedonase “Neniko Dooel Ljubisha”, ka regjistruar për herë të parë në Drejtorinë e Përgjithshme të Pronëisë Intelektuale), DPPI, Shqipëri markën me numër regjistrimi kombëtar 11992, me emërtim “B-52 Energy drink”, e cila ka qenë pikërisht me këto fjalë dhe këtë figurë.
Ndërsa më datë 21.10.2008, pra 6 muaj e dy ditë më vonë, shoqëria Bavaria N.V, ka aplikuar nëpërmjet Organizatës Botërore të Pronësisë Intelektuale (WIPO) për të regjistruar në Shqipëri mbrojtjen e markës me nr. 970878, me emërtimin “B-52 Energy Drink”. Ndërsa regjistrimi i saj në Shqipëri, duke u bazuar në këtë aplikim është realizuar më 12.02.2009. Pra pikërisht kjo markë, e cila është e ngjashme plotësisht me markën e parë, e regjistruar rreth 10 muaj para saj, por ndryshon ngjyra e sfondit.
Duke qenë se në atë kohë, asnjëra nga palët nuk kishte pretendime, pra as shoqëria maqedonase dhe as ajo holandeze, pasi në Shqipëri operonte vetëm Arseni shpk dhe tregu nuk e njihte aq shumë këtë pije energjike, për dy vite, ishte heshtje.
Në vitin 2010, marka e regjistruar nga maqedonasit u ble nga kompania shqiptare Arseni shpk, kjo e vërtetuar edhe nga një shkresë e datës 31 gusht 2010 të ish-Drejtorisë së Përgjithshme të Patentave dhe Markave, që sot është DPPI.
Pikërisht në këtë vit nis konflikti mes dy kompanive, asaj shqiptare dhe asaj holandeze për të drejtat mbi markën e B-52.
Gjyqi për markën I
Një vit më vonë, sipas Drejtorisë së Përgjithshme të Pronësisë Intelektuale, pikërisht më 22 shkurt 2011, Arseni Shpk ngriti padi ndaj shoqërisë Bavaria NV për të çregjistruar markën e kësaj të fundit, pra markën me sfond të zi, e cila ishte regjistruar 10 muaj më vonë në Shqipëri. Më 26 Dhjetor 2012, Gjykata e Shkallës së Parë në Tiranë vendosi shfuqizimin e markës me nr. 970878, me emërtimin “B-52 Energy Drink” të Bavaria NV. Më 5 shtator 2013, Gjykata e Apelit lë në fuqi vendimin e Gjykatës së Shkallës së Parë. Kështu, Arseni Shpk i drejtohet me zyrë përmbarimore DPPI-së për çregjistrimin e markës së Bavaria NV. Në atë kohë, drejtor i DPPI ishte Safet Sula dhe më 9 tetor 2013 regjistroi vendimin e Gjykatës së Apelit, raporton Alternews.al. Por, pikërisht në atë kohë, Safet Sula zëvendësohet nga Elvin Lako. Ky i fundit, më datë 9 dhjetor 2013, pra dy muaj më vonë, shfuqizon urdhrin e ekzekutimit të regjistruar nga paraardhësi, duke u bazuar në një vendim pezullimi të marrë nga Gjykata e Lartë. Pra, pavarësisht se ishte kryer ekzekutimi i këtij vendimi, Elvin Lako, drejtori i ri i DPPI e kthen mbrapsht këtë ekzekutim në kundërshtim me ligjin.
Gjithsesi, më 9 mars 2016, Gjykata e Lartë la në fuqi vendimin e Gjykatës së Apelit, kështu që Arseni Shpk i drejtohet sërish me zyrë përmbarimore DPPI-së për çregjistrimin e markës së Bavaria NV, por kjo markë nuk u regjistrua sërish nga DPPI, por u la në konservim, meqë ishte hapur edhe një gjyq i ri mes palëve për marka të tjera, për të cilat kishin aplikuar dy kompanitë.
Gjyqi për markën II
Më 19 nëntor 2010, Arseni SHPK aplikoi për një tjetër markë B-52 (AL/T/2010/545), duke ndryshuar ngjyrat e sfondit, pikërisht të kuqe dhe blu. Por, më 23 mars 2011, regjistrimi i kësaj marke u kundërshtua nga Bavaria NV. Bordi i Apelit të DPPI-së, më 30 Maj 2011 rrëzoi kundërshtimin e Bavaria NV, por e la në konservim markën, pasi sipas DPPI, ende nuk kishte mbaruar gjyqi për markën e parë.
Ndërsa Bavaria NV, më 14 qershor 2011 aplikoi për një markë të re, ashtu siç kishte bërë Arseni Shpk në vitin 2010. Bavaria NV regjistroi markën me këtë logo (B52 se gjati marka bavaria nv). Në këtë rast, Arseni shpk bëri të njëjtin kundërshtim te DPPI, por kjo e fundit nuk e pranoi kundërshtimin dhe bëri regjistrimin e markës në favor të Bavaria NV, me argumentin se kundërshtimi ishte bërë jashtë afatit. Pra, DPPI e regjistroi markën e dytë të Bavaria NV, ndërsa markën e Arseni shpk e la në konservim, pavarësisht se të dyja palët ishin në konflikt gjyqësor dhe asnjëra nuk kishte marrë ende të drejtë për markën e parë, atë të vitit 2008, duke favorizuar Bavaria NV.
Aplikimi i Bavaria per emrin B52, me logo tjeter, qershor 2011
Këtu nisi procesi i dytë gjyqësor mes palëve, pasi Arseni shpk iu drejtua gjykatës. Më 24 qershor 2013, Gjykata e Shkallës së Parë Tiranë vendosi shfuqizimin e markës së dytë të Bavaria NV. Më 6 maj 2014, Gjykata e Apelit Tiranë la në fuqi vendimin e Gjykatës së Shkallës së Parë.
Por çfarë ndodhi?!
Shoqëria Bavaria NV paraqiti kërkesë në Gjykatën e Lartë për pezullimin e vendimit të apelit. Kërkesa e Bavaria NV për pezullim nuk u pranua nga Gjykata e Lartë. Por, në këtë rast vetë DPPI, institucion shqiptar merr përsipër të mbrojë interesat e kompanisë holandeze në dëm të kompanisë shqiptare dhe bën një tjetër kërkesë për pezullimin e vendimit të Apelit. Gjykata e Lartë, këtë herë e pranon pezullimin. Megjithatë, në përfundim të shqyrtimit të çështjes, pikërisht më 5 tetor 2017 u rrëzua edhe marka e dytë nga Gjykata e Lartë.
Gjyqi për markën III
Më 19 dhjetor 2013, Bavaria NV aplikon për markën e tretë të ngjashme me B-52, ndërkohë që gjyqet flisnin kundër kësaj kompanie. Këtë herë, me qëllim që kjo kompani të luftojë Arsenin shpk, aplikon për markën 852, e cila ishte pothuajse identike me markën B52, që ia ka rrëzuar gjykata.
Pra, Bavaria NV nuk bën asnjë përpjekje për të futur një markë që mos të ketë përplasje me Arseni Shpk, por të gjitha markat i zgjedh të ngjashme me B52.
DPPI ia pranon sërish këtë markë me gjithë kundërshtimin e Arsenit Shpk, pra nuk e le në pritje si markat e kompanisë Arseni shpk. Kompania shqiptare i drejtohet prapë gjykatës dhe rrëzon markën 852 me vendim të formës së prerë në Gjykatën e Apelit. Bavaria NV nuk bën rekurs, por tashmë ndodhet në shkallën e parë për rivendosje në afat.
Abuzimi nuk ndalet këtu. Më 23 janar të këtij viti, Bavaria NV ka aplikuar dhe për markën e katërt, pikërisht 8S2, të ngjashme me B52 dhe 852, që janë çregjistruar nga gjykata. Marka 8S2, ende nuk është pranuar nga Drejtoria e Përgjithshme e Pronësisë Intelektuale, por është në proces ekzaminimi.
Por pse Bavaria NV vijon të nxjerrë marka të ngjashme me B52, që është prodhuar nga Arseni shpk dhe këto marka shiten në treg me emrat e rinj që u janë vënë apo si B52?
Të gjitha markat, për të cilat ka aplikuar Bavaria NV, por që tashmë janë rrëzuar nga gjykata duket se kanë pasur vetëm një qëllim; Të konkurrojnë padrejtësisht produktin B52 nga Arseni shpk, i cili rezulton se është i vetmi pronar i ligjshëm në Shqipëri për këtë pije.
Por sa janë marrë parasysh vendimet e gjykatave nga institucionet shqiptare?! Zero.
Kjo kuptohet më së miri nga fakti që kompania BM shpk, e cila përfaqëson në Shqipëri kompaninë Bavaria NV, ka vijuar të nxjerrë në treg të gjitha markat e rrëzuara nga gjykata, duke i shitur si B52. Pra, ajo ka nxjerrë në treg jo vetëm dy markat B52, që janë shfuqizuar nga gjykata, por ka shitur si B52 edhe pijet 852 dhe tashmë ka filluar me pijen 8S2, e cila ende nuk është miratuar nga Drejtoria e Përgjithshme e Markave, duke deklaruar për tregtarët se ajo është e vetmja pije energjike origjinale B52.
Madje, në panairin Horeca që u zhvillua në Tiranë në muajin mars, ata kanë reklamuar pije të çregjistruara nga gjykata, duke i prezantuar si B52, që në fakt është pronë e Arseni Shpk dhe asnjë institucion shtetëror nuk i ka ndaluar për këtë produkt të paligjshëm.
Por, tashmë që janë dhënë të gjitha vendimet e gjykatës, DPPI ka çregjistruar markat që përdor Bavaria NV në Shqipëri, nëpërmjet kompanisë BM shpk. Madje, kjo vërtetohet edhe me një shkresë të datës më 23 janar 2018 të DPPI.
Vendimi i Drejtorise se Pergjithshme te Pronesise Industriale (Markat), i janarit 2018
Edhe Drejtoria e Përgjithshme e Doganës, me shkresën Nr. Prot. 26597/2, datë 19.01.2018 miratoi aplikimin për veprim për mbrojtjen e markës tregtare B52 me Nr. Regjistrimi kombëtar 11992 në pronësi të shoqërisë Arseni shpk. Vendimmarrja u bazua në shkresën e Drejtorisë së Përgjithshme të Pronësisë Industriale (Nr. prot. 443/1, datë 13.12.2017) në të cilën informoheshim që Gjykata e Lartë e Republikës së Shqipërisë kishte vendosur çregjistrimin e markës tregtare B52 me Nr. Regjistrimi Ndërkombëtar1082916 në pronësi të shoqërisë Bavaria N.V.
Të gjitha vendimet përshirë dhe Vendimin Nr. Prot. 26597/2, datë 19.01.2018 që merren për mbrojtjen e të drejtave të pronësisë intelektuale i janë drejtuar për njohje dhe zbatim Degëve Doganore dhe Departamentit Operativ-Hetimor (DOH) por duke mos e kufizuar mbrojtjen e të drejtave të Pronësisë Intelektuale, jo vetëm në informimin e Degëve Doganore dhe Strukturave paralele të DOH-së, është ngritur dhe një profil risku për Mbrojtjen e Markës tregtare B52 në pronësi të Shoqërisë Arseni shpk.
Por pas këtij urdhri, kompania BM shpk ka ndryshuar taktikë për të futur B52 pa markë, imitime të B52 të Arseni shpk, por këtë herë me markën që ende nuk është regjistruar, pikërisht 8S2. Kjo vërtetohet edhe nga një deklaratë doganore e datës 6 mars në doganën e Kukësit, kur është zhdoganuar një trajler, nga 10 që kanë hyrë në Shqipëri pas urdhrit të bllokimit.
Të ndodhur në këto kushte me shkresën Nr. prot. 6143, datë 12.03.2018, Drejtoria e Përgjithshme e Doganave i është drejtuar DPPI-së me një shkresë në të cilën i është kërkuar interpretim ligjor nëse pija energjike 8S2 bie ndesh me vendimin ligjor, por DPPI nuk i ka kthyer përgjigje.
Por, pavarësisht se Bavaria NV sjell në Shqipëri nëpërmjet kompanisë shqiptare BM shpk pije energjike, të cilat në doganë i deklaron si 8S2, në të vërtetë në tregun shqiptar, ato i shet si B52, duke imituar markën që mbrohet nga Arseni shpk. Për këtë arsye, Arseni shpk ka bërë kallëzimet përkatëse edhe pranë institucioneve shtetërore, si Krimi Ekonomik, AKU, Inspektorati i Mbikëqyrjes së Tregut dhe Autoriteti i Konkurrencës, por askush nuk e ndalon këtë abuzim në tregun shqiptar.
Madje, për t’ia bërë edhe më të qartë doganës, Arseni shpk mësohet se ka shtuar dhe listën e këtyre markave të shfuqizuara në kërkesën e tij për doganat shqiptare, me shpresën se nuk do lihen hapësira ligjore për të lejuar konkurrencën abuzive, duke u fshehur pas emrave fiktivë.
Pra kompania BM shpk nuk pyet as për vendime gjykate dhe as për markë. Madje mashtron doganat sikur sjell pije tjetër dhe e shet si B52, ndërkohë që institucionet shqiptare fshihen pas shkresave dhe kompanisë shqiptare i bëhet presion me qeveri shqiptare dhe holandeze për të hequr dorë nga një e drejtë që tashmë i njihet, jo vetëm si regjistrues i parë i B52 në Shqipëri, por dhe nga drejtësia në të gjitha shkallët.
Kështu, të ushqehesh i sigurt në këtë vend, duket një mision i vështrië. Po aq i vështirë, sa dhe të kesh informacionin e duhur për produkte të ndryshme ushqimore, po aq i vështirë sa të kesh një markë tënden dhe ta mbrosh. Dhe po aq mision i vështirë, sa një vendim gjykate apo marke, të gjejë zbatim. Prej disa vitesh, të gjithë konsumatorët shqiptarë kanë parë në vitrinat e dyqaneve, në markete apo lokale, si dhe pafund reklama televizive, për pijen energjike B52, me ambalazh ngjyrë gri dhe për të cilën, pretendohej se prodhohej në Holandë e ky ishte produkti origjinal me këtë emër. Bavaria N.V në Holandë, deri para disa vitesh, nuk e njihte as vetë këtë produkt dhe kjo pijenuk ekziston në Holandë, por prodhohej vetëm më Shqipërinë. Por, ky produkt me vendim të gjykatave shqiptare, të të gjitha shkallëve, nuk prodhohet më për Shqipërinë dhe për asnjë vend tjetër.
Në këto kushte, konsumatorët shqiptarë, si dhe të gjitha njësitë tregtare të Republikës së Shqipërisë, duhet të dinë që, në tregun shqiptar, nuk duhet të ekzistojë apo qarkullojë më asnjë pije energjike me emrin “B52 me ambalazh ngjyrë gri”, e drejtë e cila i është hequr kompanisë Bavaria N.V, si dhe përfaqësuesit të saj në Shqipëri, “B.M” sh.p.k.
Që pas këtij vendimi të të gjitha institucioneve përgjegjëse, kompania ka ndërprerë reklamimin e saj në media, ndërkohë që po tenton të luhet një tjetër lojë, në dëm dhe rrezik të konsumatorit shqiptar, si dhe të kompanisë “Arseni” sh.p.k. e cila ka të gjitha të drejtat e prodhimit e tregtimit të kësaj marke, e cila është e regjistruar në pronësi të saj.
Shoqëria “B.M”, po tenton të regjistrojë një tjetër emër, të quajtur 8S2, pije energjike, me të njëjtin ambalazh, imazh dhe çdo detaj, përveç një grremçi të germes B, duke e bërë të duket si 8. Ky produkt që gjendet në treg, në asnjë rrethanë nuk e bën konsumatorin që të zgjedhë një pije energjike tjetër, pasi është identike, në 99,9 për qind të detajeve, logos, ngjyrave të ambalazhit etj, me B52 ngjyrë gri, marke kjo e çregjistruar dhe që nuk lejohet të importohet apo prodhohet e tregtohet në vendin tonë.
Në tregun tonë, nuk duhet të ekzistojë më asnjë pije tjetër energjike me emrin B52, e cila ka të gjitha të drejtat ligjore (kjo që shikoni në këtë foto). Ndërsa kjo pije me ambalazhin ngjyrë gri, nuk mund të jetë gjë tjetër veçse një imitim i pijes B52 të Holandës, e cila nuk mund të importohet dhe tregtohet më hë Shqipëri, që në muajin Janar 2018, duke vënë në rrezik shëndetin dhe jetën e konsumatorëve, të painformuar dhe mashtruar nga imazhi.
Rreziku për konsumatorin
Të ushqehesh i sigurt në këtë vend, duket një mision i vështrië. Po aq i vështirë, sa dhe të kesh informacionin e duhur për produkte të ndryshme ushqimore, po aq i vështirë sa të kesh një markë tënden dhe ta mbrosh. Dhe po aq mision i vështirë, sa një vendim gjykate apo marke, të gjejë zbatim.
Po të vini re në foto, ambalazhi i pijes B52 ngjyrë gri, e cila pas janarit 2018 nuk lejohet më të treghtohet në Shqipëri, tek germa B kishte një bisht, ndërsa imitimi i saj dhe tendenca për ta regjistruar si markë 8S2, nuk ka asnjë ndryshim në emërtim, në logo, në ngjyra, në dizajn e formë, përveç bishtit të germës B që është fshirë.
Për më tepër, përveç shkeljes kryekëput të ligjit, konsumatori është në rrezik. Kjo, pasi nëse më parë konsumonte një pije me ambalazh gri, që prodhohej në Holandë për Shqipërinë, tashmë pija e ashtuquajtur 8S2, nuk dihet ku prodhohet, nga vjen, nga kush prodhohet dhe sa të sigurt janë përbërësit e tij. Autoriteti Kombëtar i Ushqimit apo Instituti i Sigurisë Ushqimore dhe Veterinarisë, nuk kanë kryer asnjë analizë të tij. Madje, nuk dihet nëse etiketa e këtij produkti është apo jo e miratuar nga AKU, ndërkohë që ka edhe ndryshime. Mbi të gjitha, në çdo rast konsumatori është dhe i mashtruar, sepse niset të marrë prodhimin e mëparshëm B52 gri, nëse e shikon në një frigorifer apo stendë, pa e ditur se është një mashtrim në imazh, ambalazh dhe logo.
Ndërkohë, askush nuk e di, që pija B52 nuk eshte brand (markë) i Holandës. Asnjë holandez nuk e njeh dhe ai produkt është është dizenjuar dhe prodhuar për herë të parë me kërkesë të ARSENI sh.p.k, kompani kjo që edhe sot gëzon të drejtën e markës, të regjistruar nga Drejtoria e Pronësisë Industriale, të marrë në brojtje dhe nga doganat, që gjithkund mund të shikohet në ambalazhin e pijes energjike B52, me sfond të zi.
Të tjera skema skandaloze të mashtrimi me pronat zbulohen. Këtë herë janë të vdekurit që ngrihen nga varri dhe firmosin për tu bërë pronarë. Fiks Fare denoncoi një skandal, ku tre të vdekur, të cilët prehen në varrezat e fshatit Vrakë në Malësinë e Madhe, rezultojnë në dokumente se kanë “firmosur” për të shitur një tokë prej 10 dynymësh buzë rrugës nacionale Shkodër-Koplik.
Kontratat janë përpiluar në një zyrë noterie në qytetin e Koplikut, madje, përkrah emrave të personave të vdekur, janë për çudi edhe firmat e tyre. Në redaksinë e “Fiks Fare” mbërriti një denoncim nga zonja Millojka Brajoviq, e cila denoncon se disa pjesëtarë të familjes së saj, megjithëse kanë ndërruar jetë, kanë firmosur për të shitur një pronë.
“Në 23 shkurt 2004, disa pjesëtarë të familjes tim nga babai, Brajoviq, bëjnë një akt noterial te noteri në Koplik, Sabri Kurtaj. Firmosin disa persona, për të shitur një sipërfaqe prej 10 dynymësh toke vëllait të tyre, po në fshatin Vrakë, buzë rrugës nacionale Shkodër-Koplik. Mes personave që firmosen ishte edhe Roza Brajoviq, nëna ime, Gjurgje Brajoviq (Stajkiç), motra ime dhe Gojko Stajkiç nipi im” thotë Millojka. Sipas saj, nëna e saj ka ndërruar jetë në vitin 2008, ndërsa motra, në shkurt të vitit 2004, 10 ditë para se të firmoste te noteri Sabri Kurtaj.
Gazetarët e Fiks Fare shkuan në zyrat e gjendjes civile në Shkodër dhe Malësi e Madhe, ku morën certifikatat e vdekjes së këtyre personave. Sipas certifikatave, Roza Brajoviq ka vdekur ne vitin 1998, ndërsa Gjurgje Brajoviq në datë 14 shkurt 2004. Më pas, gazetarët shkojnë te varrezat e fshatit Vrakë, ku prehen të ndjerat. Rezultoi se Roza, Gjurgje dhe Gojko kishin ndërruar jetë para datës 23 shkurt 2004, ku figuronin se kishin “firmosur” te noteri. Madje, në një nga aktet noteriale, rezulton se Gojko Stajkiq, i cili, megjithëse i vdekur, ka firmosur më 22 shkurt 2004, duke autorizuar nënën e tij po të vdekur, për të shitur tokën.
Grupi i Fiks Fare shkoi te noteri Sabri Kurtaj, në qytetin e Koplikut. Noteri tha se e kanë mashtruar dhe ua ka dhënë në mirëbesim aktin noterial në shtëpi personave. Ata e kanë firmosur dhe ia kanë sjellë sërish në zyrë. Ai pranoi se vëllezërit denoncueses e kanë fituar tokën me mashtrim.
“Po me mashtrim e kanë marrë. Po, ua kam dhënë me mirëbesim” thotë ai. Më tej shton se akti duhej anuluar, por deri me tani nuk është anuluar megjithëse çështja ka shkuar disa herë në gjykatë. Pyetjes se çfarë dokumentesh kanë sjellë familjarët e të ndjerave, noteri tha se kanë sjellë disa certifikata dhe se përgjegjëse janë zyrat e gjendjes civile. Por, pas një verifikimi, rezultoi se para noterit janë dërguar certifikatat e regjistrit të vitit 1974. Pra, jo të muajit shkurt 2004!
Pjesëtarë të familjes Brajoviq kërkojnë që të rishikohen kontratat e shitjes, ndërsa denoncuesja Millojka Brajoviq tregon edhe tokën, buzë rrugës nacionale Shkodër-Koplik. Pas disa minutash, në truall mbërrin një person, duke i kërkuar denoncueses dhe grupit të Fiks Fare të dalin nga prona e tij, madje mos të qëndrojnë as në rrugën kryesore. “Pronari” i tokës thotë se e ka blerë truallin në vitin 2006, ndërsa denoncueses i bën me dije që të shkojë në Mal të Zi, se atje e ka tokën. Madje, i tregon se, sa të jetë ai, këtë tokë nuk do e gëzojë kurrë.
