Politike

Politika në përgjithësi nuk i do gjykatat dhe në veçanti Gjykatën Kushtetuese, ku secili lider politik ka pasur dhe ka problemet e veta me të. Prandaj të gjithë duan “varrin” e kësaj gjykate.

Sali Berisha pavarësisht se qahet dhe derdh “lotë” se Gjykata Kushtetuese është shuar nga Vettingu i Ramës, sa është katandisur në dy anëtarë, ka pasur probleme të mëdha me këtë gjykatë.

Madje e ka akuzuar dhe si të ndikuar nga forca të huaja dhe rasti ka qënë me rrëzimin që Kushtetuesja, në mënyrë unanime i bëri marrëveshjes së “Detit” me Greqinë të nënshkruar nga ministrat e jashtëm respektivë të asaj kohe Basha dhe Bakojanis.

Kushtetuesja e quajti madje tradhëti kombëtare, në termat juridikë, pasi ka falur territor të Shqipërisë vendit fqinj Greqisë dhe jo pak por 350 km katror territor detar.

Ndaj Berisha e akuzoi Kushtetuesen se ka marrë para nga Erdogan, Edi Rama dhe tërë kundërshtarët sipas tij të kësaj marrëveshjeje. Tani qahet se është shkatërruar Gjykata Kushtetuese nga Edi Rama.

Për të vetmen gjë që ka të drejtë jo vetëm Berisha por kushdo që shfaq shqetësim për shkatërrimin e Gjykatës Kushtetuese është se Edi Rama është i interesuar që Gjykata Kushtetuese të qëndrojë sëpaku dhe dy vite pa u ngritur.

Pasi për “shuarjen” e saj kanë menduar vetëm anëtarët e Gjykatës Kushtetuese, që të vendosur aty me vendim politik nga Berisha dhe Meta për t’i shërbyer klientelës e kishin trashur aq shumë zullumin sa mbetën në “rrjetën” e Vettingut.

Dhe kryeministri Edi Rama po e shfrytëzon me shumë efikasitet “shuarjen” e  Kushtetueses, madje shumë vonë do të marrë ndonjë masë për të ngritur në këmbë një gjykatë të tillë që të jetë efektive dhe të japë vendime për çështjet që janë në ankimim.

Që Rama është i interesuar për të pasur një gjykatë Kushtetuese vetëm me dy vetë u pa dhe në debatin për kalimin e ligjit të magjistraturës.

Të kishte qënë ndonjë ligj për dhënie koncesioni, Rama do ti kishte “blerë” ata pesë deputetë që i duheshin për të votuar ligjin me shumicë të cilësuar. Por ishte tërësisht i ç’interesuar për këtë ligj. Dhe pse?

Në Kushtetuese është ankimimi i ish pronarëve, të cilët kërkojnë shfuqizimin e Ligjit për Trajtimin e Pronave, të miratuar dhe që hyn në fuqi plotësisht për të mbyllur trajtimin e pronave në vitin 2019.

Ish Pronarët e kanë kundërshtuar me forcë ligjin e miratuar nga qeveria sidomos në përcaktimin në mënyrë të ndryshme të standardit të kompensimit të pronave.

Pronarët kanë kundërshtuar dhe ankimuar në Kushtetuese ligjin nr.133 të vitit 2015 “Për trajtimin e pronës”, duke argumentuar se ligji ka efekte prapavepruese dhe për vendimet përfundimtare të dhëna është bazuar në kriteret e ligjeve të mëparshme që nuk janë ekzekutuar nga autoritete e brendshme, duke shkelur parimin e sigurisë juridike.

Ndërkohë që sipas nenit 6 të ligjit, e njëjta pronë vlerësohet me dy standarte të ndryshme pasi për pronarët që kanë përfituar kthim në natyrë për një pjesë të pronës, për pjesën tjetër që kompensohet përfitojnë një vlerë deri në 100 herë më të vogël për shkak të metodologjisë së ndryshuar të vlerësimit.

Thelbi i ligjit është neni 6, këmbëngulin ish pronarët, nen i cili në arsyetimin e ligjvënësit ka pasur vetëm një qëllim; si të ulet në mënyrë maksimale detyrimi që shteti shqiptar ka kundrejt pronarëve. Ky është thelbi i nenit 6, i cili përcakton se kompensimi do të bëhet sipas zërit kadastral që ka pasur prona në momentin e shpronësimit, që i bie para 50 viteve. Ky është një proces, i cili ul dhe zhbën detyrimin e shtetit shqiptar kundrejt pronarëve.

Ky ka qenë qëllimi, pas të cilit shteti mendon se duhet të mbyllë njëherë e mirë procesin e kthimit dhe kompensimit të pronave, për të cilin pronarët kanë ankimuar.

Ligji nga njera anë dhunon parimin e proporcionalitetit dhe nga ana tjetër nuk cënon interesin publik.

Por Qeveria shqiptare në këtë ligj që ka miratuar, ka kërkuar që çështjet e Gjykatës së Strasburgut, të kthehen në Shqipëri dhe të trajtohen sipas këtij ligji.

Madje disa herë dhe përmes letrave zyrtare të dërguar nga qeveria shqiptare por dhe përmes Avokatit të Shtetit, Rama i është lutur gjykatës së Strasburgut që t’i bllokojnë këto 86 dosje, pasi ligji i miratuar gjithçka për ish pronarët dhe kompensimin e tyre.

Sot në Strasburg janë mbi 390 dosje, nga të cilat janë këto 86, për të cilat pritet vendimi. Shuma që ka pranuar ish-ministri i Drejtësisë, por edhe Avokati i Shtetit, që vlerëson këto vendime gjykohet të jetë në trendin e mbi 400 milionë eurove. Por ajo kalon vlerën e shumë miliardave.

“Ne presim që të bëhet shpallja e këtyre vendimeve. Në momentin që, qoftë edhe në një rast të vetëm të këtyre 86 vendimeve do të shikohet që është rrëzuar pretendimi i qeverisë shqiptare që toka e pronarit të vlerësohet si tokë bujqësore, (se e tillë ka qenë në kohën e shpronësimit dhe jo si tokë truall që është sot), atëherë, automatikisht ne na lind e drejta që t’i ridrejtohemi edhe një herë Gjykatës Kushtetuese për t’i kërkuar shfuqizimin e nenit 6 të ligjit që do të thotë realisht, rrëzimi i komplet ligjit”, nënvizojnë pronarët.

“Vlerësimi financiar i vendimeve përfundimtare për kompensim, do të bëhet duke vlerësuar financiarisht pronën e njohur për kompensim, sipas nenit 6 të këtij ligji, në përputhje me procedurën e mëposhtme: a) nëse vlerësimi i pronës së kthyer me vendim përfundimtar rezulton se është më i madh se sa vlerësimi i tokës së  njohur për kompensim, atëherë subjekti i shpronësuar konsiderohet i kompensuar; b) nëse vlerësimi i pronës që është njohur për kompensim është më i madh sesa vlerësimi i tokës së kthyer, atëherë subjektit i kompensohet diferenca, sipas përcaktimeve të këtij ligji”, thuhet në ligjin e qeverisë.

Duke kompensuar pronarët jo për tokë truall por për tokë bujqësore dhe kullota me çmimin në momentin e shpronësimit që mund të ketë qënë viti 1950-1960 e në vijim, qeveria shqiptare u heq pronarëve 100-fishin e vlerës së pronës, e përkthyer në vlerë monetare, miliarda euro.

Ndaj ish pronarët i janë drejtuar Kushtetueses dhe presin me padurim që kjo gjykatë të vendosë për kompensimin e pronave të tyre, që qeveria shqiptare me të padrejtë ua ka ulur vlerën në shuma marramendëse.

Ndërkohë që Edi Rama është më se i interesuar dhe do punojë fort që Gjykata Kushtetuese të mos ngrihet të paktën për dy vite në mënyrë që ligji për trajtimin e pronave të zbatohet plotësisht dhe t’u rrëmbejë me të padrejtë përonarëve miliarda euro kompensim që u takon.

Bllokimi i Kushtetueses u heq të drejtën ish pronarëve që të ankimojnë dhe në Gjykatën e Strasburgut, pasi që një çështje të shkojë në Strasburg, duhet të kalojë të gjitha nivelet e gjykimit në gjykatat shqiptare.

Rama po përdor pronat e ish pronarëve si “dhurata” për oligarkët që i shërbejnë

Pronarët nënvizojnë se sipas ligjit nr.133 të vitit 2015 për kompensimin e pronarëve qeveria do të përdorë pronat shtetërore nëpërmjet shitjes së tyre dhe kalimin e fondeve financiare në favor të pronarëve.

Por, praktikisht qeveria është duke falur mijra metra katrore tokë në favor të individëve ose kompanive private.

Me ligjin nr.56/2017 datë 13.04.2017 (FZ 102/2017, f.5664), Parlamenti miratoi një ligj për negocimin e një marrëveshje ndërmjet shtetit shqiptar dhe një kompanie private të huaj për ndërtimin e njëqendre biznesitë lartë.

Në këtë rast qeveria i transferon kompanisë private në pronësi dhe pa kosto një sipërfaqe 25,000 m2 në qytetin e Tiranës dhe përjashtim nga të gjitha taksat për 15 vjet.

Ky investim nuk konsiderohet për interes publik dhe dhënia e këtij bonusi për një kompani private është i pajustifikueshëm. Ky fakt tregon se qeveria ka patur gjithmonë burime për të ekzekutuar vendimet për kompensimin e pronarëve, por transaksione të tilla kanë penguar implementimin e ligjeve të mëparshme, por edhe të ligjit të ri 133/2015.

Kompensimi i parashikuar nga ligji shqiptar është aq i ulët për secilin prej kërkuesve sa është praktikisht qesharak. Gjithashtu, siç e kemi thënë në komentet kryesore, autoritetet shqiptare kishin njohur një herë me vendime përfundimtare detyrimin e tyre ndaj kërkuesve për shpërblim të plotë sipas tregut, në bazë të legjislacionit të mëparshëm.

Nga kjo pikëpamje, pozita e kërkuesve tone është shumë më e fortë dhe e qartë se ajo e kërkuesve në çështjen “Preite”.

Sipas vendimit “Brumarescu k. Rumanisë”, kur ligji i brendshëm lejon vetëm një kompensim të pjesshëm, atëhere Gjykata duhet të jape shpërblim sipas nenit 41.

Theksojmë se shpërblimi që akordon formula e re në raport me ligjin e zbatueshëm kur janë marrë vendimet, varion nga 1/30 deri në 1/100 të vlerës. Pra jemi hapur në gjendjen e një shkelje të neneve 6, 13 dhe nenit 1 të Protokollit 1 në të gjitha çështjet që përfaqësojmë.

Ligji nr.133 i viti 2015 është një ndërhyrje e qartë ligjore nga pushteti legjislativ dhe kjo është konstatuar në kundërshtim me nenin 6 dhe 1 të Konventës dhe nenin 1 të Protokollit nr.1 nga Gjykata Europiane në disa çështje si “Scordino k. Italisë” (GC-2005) dhe së fundi në “Preite k. Italisë”.

Ligje të tilla janë konsideruar antikushtetuese nga disa Gjykata Kushtetuese në Evropë, siç është Gjykata Kushtetuese italiane në vendimet 348 dhe 349 datë 22 Tetor 2007, duke konstatuar se shkalla e ulët e kompensimit ishte në kundërshtim me nenin 1 të Protokollit nr.1 të Konventës. Nëse dispozitat italiane ishin në shkelje, dispozitat e ligjit shqiptar nr.133/2015 janë të tilla në mënyrë të qartë dhe të hapur./Pamfleti

Kryeministri Edi Rama gjatë konferencës së përbashkët me Komisionerin për Zgjerim, Johannes Hahn theksoi se krahasuar me 1 vit më parë Shqipëria ka shënuar progres të dukshëm dhe mjaft pozitiv, çka lidhet drejtpërdrejt me përmbushjen e 5 prioriteteve kyçe të integrimit.

I pyetur se cila është arma që Shqipëria mund ta përmbushë këtë ambicie brenda një viti kreu i qeverisë, Edi Rama theksoi se: “Ajo që është shumë e rëndësishme besoj që edhe shpeshherë dhe që lihet mënjanë është progresi që bën vendi në këtë proces muaj pas muaji dhe vit pas viti, pavarësisht se si shkojnë gjërat në raport me dëshirën tonë nga niveli i Komisionit, te niveli i Këshillit, pra e thënë ndryshe Shqipëria sot krahasuar me një Shqipëri të një viti më parë është një Shqipëri shumë më e përparuar në ato aspekte që lidhen drejtpërdrejt me punën tonë të përbashkët dhe me 5 prioritetet”.

Duke u ndalur te një nga reformat kyçe për integrimin Europian të Shqipërisë, siç është procesi i “Vetting”, Kryeministri theksoi se ky proces po kryen një pastrim të përditshëm dhe brutal të pallatit të drejtësisë.

“Nëse një vit më parë ne ishim në një betejë të madhe politike dhe publike dhe në një ethe kombëtare do ketë “Vetting” apo s’do ketë “Vetting”, një vit më parë fiks, a do hidhet apo nuk do hidhet ky hap, a do fillojë apo nuk do fillojë pastrimi i pallatit të drejtësisë, sot 1 vit më vonë ne po shikojmë pastrim të përditshëm dhe brutal, nëse mund ta përdor këtë fjalë, të pallatit të drejtësisë.

Natyrisht që nëse e shohim në raport se ku duhet të jemi një vit më vonë, apo dy vjet, apo 3 vjet më vonë, është e pamjaftueshme, por nëse e shohim në raport me 1 vit më parë është e jashtëzakonshme, që do të thotë që procesi në fund të fundit është një proces që bëhet për Shqipërinë dhe për fëmijët tanë këtu, jo se e kërkon Komisioneri, apo se u mblodh Këshilli dhe na tha “bëni këto gjëra, se kështu duam ne”, por sepse e kërkon e ardhmja e vendit tonë, kjo është shumë, shumë e rëndësishme.

Dhe ajo që është themelore është që, siç tregojnë raportet e Komisionit dhe siç tregon vendimi i Këshillit, ne kemi marrë një vlerësim të merituar.

Nuk do ishte afruar kurrë Franca dhe Holanda në pozicionin e afruar në momentet e fundit nëse nuk do të ishin rezultatet që do të flisnin për të”, – theksoi Kryeministri.

Gjatë fjalës së tij, kreu i ekzekutivit u ndal edhe te procesi i “Screening”.

“Nuk do kishte “Screening””.

“Screening” është proces që fillon pas procesit të marrjes së negociatave dhe të mos harrojmë që historia e integrimit, të paktën e afërta, thotë që i është dhënë Serbisë data e negociatave dhe i ka marrë më shumë se 1 vit pasi ka marrë datën; i është dhënë Malit të Zi data e negociatave dhe i ka marrë më shumë se 6 muaj pasi ka marrë datën, pse? Sepse është ky proces që ne po bëjmë tani”, – përfundoi Rama./atsh

Procesi përgatitor për hapjen e negociatave për anëtarësim të Shqipërisë me Bashkimin Europian ka nisur, ku në prezencën e Komisionerit për Zgjerim Johannes Hahn me anëtarëve të kabinetit qeveritar, Kryeministri Edi Rama theksoi vendosmërinë për të bërë një punë sa më cilësore përgjatë këtyre 12 muajve deri në qershorin e ardhshëm.

Gjatë këtij takimi, mbajtur sot në Pallatin e Kongreseve, Rama tha se “vendimi i Këshillit Europian të qershorit, shënon një moment shumë të rëndësishëm që konsolidon përfundimisht perspektivën europiane të Shqipërisë dhe përcakton pakthyeshmërisht rrugën e anëtarësimit në BE duke i hapur rrugë shtratit për të filluar negociatat Shqipëri-BE, vitin e ardhshëm”.

“Besoj që vendimi i marrë në një moment tejet kompleks për BE dhe në një proces intensiv, ku siç dihet, për arsye të dinamikave të brendshme të disa vendeve, u desh një përpjekje e të gjithëve duke filluar nga Komisioneri, të cilin e kam falenderuar edhe më parë. Ashtu sikundër edhe të gjithë ekipin e tij së bashku me Mogherinin dhe Presidentin e Komisionit Europian, që bënë të mundur arritjen e një zgjidhje pozitive që çliron procesin dhe duke përcaktuar një afat të qartë, e bën përgjegjësinë tonë jo vetëm të plotë, por edhe të përcaktuar dhe të ndarë sipas të gjithë aspekteve të procesit në shpatullat e atyre që janë këtu të pranishëm, ministra, zv.ministra dhe sekretarë të ministrive”, – deklaroi Rama.

Sipas tij, nisja e kësaj faze përgatitore dhe pune në një plan të qartë ndërveprimi me KE, nuk do të jetë e lehtë dhe përbën një hap të rëndësishëm, por edhe të vështirë dhe kërkon angazhim solemn të përditshëm nga të gjitha strukturat përkatëse të shtetit dhe ritëm të lartë, në funksion të arritjes së të gjitha objektivave në këtë fazë.

“Që nga sot jemi të detyruar ta përdorim me efikasitet maksimal kohën dhe të garantojmë një nivel të lartë koordinimi dhe ndërveprimi jo vetëm për të thelluar reformat, për të arritur të tjera rezultate që nuk janë kërkesa të Brukselit, por detyrimi ndaj vendit dhe për të ardhmen e vendit tonë, por edhe për të riorganizuar deri në qelizat fundore, të gjitha njësitë koordinuese të procesit negociues”, – theksoi ai.

“Ne i kemi analizuar rresht për rresht qoftë rekomandimin e Komisionit, qoftë konkluzionin e Këshillit dhe jemi të qartë për detyrat. Ashtu sikundër që jemi të vetëdijshëm, sepse përderisa arritëm të marrin një rekomandim pa kushte, asgjë nuk na pengon që edhe punën e madhe që kemi përpara në këto 12 muaj ta bëjmë me cilësi të lartë dhe ta bëjmë pa asnjë të sharë, kur i themi ne në shqip”, – deklaroi Kreu i Ekzekutivit.

Sipas tij, rruga e Shqipërisë drejt BE është e pakthyeshme.

“Puna përgatitore për negociatat nuk do të jetë e lehtë. Kemi lexuar me vëmendje konkluzionet e KE për rekomandimet. U përcaktua një afat i qartë për negociatat. Rruga drejt BE është e pakthyeshme. Forcimi i kapaciteteve që lidhen me procesin e negocimit është një tjetër provë që ne duhet ta japim. Dëshiroj të theksoj tre aspekte me këtë proces përgatitor që do na shoqërojë deri në pranverën e ardhshme. Procesi të vazhdojë dhe të ngrihet mbi procesin e stabilizim-asocimit. Aspekti i dytë është përmirësimi i komunikimit me vendet anëtare dhe misionin e BE në Tiranë. Aspekti i tretë lidhet me rëndësinë themeltare që procesi teknik dhe ai politik të veprojë në mënyrë elastike me njëri-tjetrin”, – nënvizoi Kryeministri.

Rama sqaroi se qeveria do të ketë si koordinatore për këtë process, Ministrinë për Europën dhe Punët e Jashtme, ministri e cila do të shndërrohet në sekretariatin e ardhshëm për procesin e integrimit.

“Shqipëria dhe Maqedonia ia dolën të kapërcejnë dallgën e madhe të momentit, – tha Rama duke shtuar se, – padiskutim që kjo fazë e re, e kësaj rruge aspak të lehtë, nuk do të shihej me aq optimizëm nëse nuk do të kishim përkrah komisionerët, të cilët treguan një përkushtim shumë të shtrenjtë për Shqipërinë”.

Gjithashtu, Kryeministri evidentoi faktin se “qoftë Franca, apo Holanda, u hapën dhe ofruan një zgjidhje pozitive kompromisi që e vlerësojmë shumë, ashtu sikundër vlerësojmë faktin, që pas kësaj marrëdhëniet tona me Komisionin dhe këto vende që na kanë mbështetur, por edhe Francën dhe Holandën janë forcuar dhe intensifikuar”.

“Me Presidentin e Francës apo Kryeministrin e Holandës, kam parë vullnet pozitiv për të vendosur në dispozicion eksperiencën dhe mbështetjen e tyre, me dëshirën e madhe që Shqipëria t’ia dalë dhe bindjen e krijuar, që qershori i ardhshëm do të jetë i formalizimit të negociatave. I shpreh Komisionerit mirënjohjen për gjithçka ka bërë dhe besimin që ne do ia dalim falë edhe mbështetjes. Rezultatet edhe të Vetingut po flasin çdo ditë, pavarësisht se nuk ka asnjëherë asgjë perfekte, pastrimi i sistemit të drejtësisë është i pakthyeshëm dhe përjashtimi i shumë figurave që mbanin deri dje peng drejtësinë dhe ishin superpushteti, janë provë e vullnetit dhe drejtësisë së gjithë asaj pune. Rruga deri në funksionimin e plotë të drejtësisë është ende e gjatë”, – tha Rama. /atsh

https://www.facebook.com/edirama.al/videos/10155964495456523/?t=0