Ambientalisti Sazan Guri i ka bërë një pyetje që e ka ‘zënë’ paksa ngushtë mjekun e njohur Pëllumb Pipero. Të dy kanë qenë të ftuar mbrëmjen e djeshme në emisionin Zonë e Lirë.
I pyetur nga Sazan Guri nëse besonte realisht te mbajtja e maskës, Pipero u shpreh “Jo vetëm besoj, por në rradhë të parë ua këshilloj juve. Maska jep një mbrojtje deri në 90 e ca %. Jo vetëm që parandalon hapjen e spërklave të pështymës, por parandalon dhe spërklat e të tjerëve për t’i marr neve.”
“Pse kryeministri nuk mban maskë? Për të gjithë këta? Apo mos kanë ndonjë ilaç?”, e pyeti sërish ambientalisti Guri Piperon. “Unë ua këshilloj dhe atyre ta mbajnë maskën. Në ato dalje televizive kryesisht e kam parë me maskë”, u përgjigj mjeku.
Sudiuesi Auron Tare, ish-drejtori i Parkut Arkeologjik të Butrintit, u shpreh kundër dhënies së kësaj trashëgimie arkeologjike me koncesion për menaxhim te privati.
Qeveria e Edi Ramës ka vendosur t’ia japë Butrintin me koncesion për 10 vite kompanisë britanike “Prince & Pearce”, dhe ky duket se është një rast unik në Europë.
“Situata në 10-vjeçarin e fundit në Butrint lë për të dëshiruar, si situata e vizitorëve dhe ekspeditat arkeologjike, shkolla e restaurimit e cila nuk është më”, – thotë Auron Tare.
Më tej ai shton se kjo do t’i hapë rrugën kompanive të tjera private për të marrë në menaxhim trashëgimi kulturore, ku sipas tij nuk është çudi nëse një kompani greke merr në menaxhim Gjirokastrën apo Tepelenën.
“Megjithatë do të thosha me gjithë këtë situatën që ka trashëgimia kulturore në Shqipëri, Butrinti i qëndroi, i rezistoi”.
“Në asnjë mënyrë nuk mund t’i jepet një fondacioni të huaj për menaxhim. Nëse kjo do të ndodhë, atëherë ne do të mund të kemi shumë mirë një fondacion grek që mund të marrë Gjirokastrën, Tepelenën, apo Krujën”, theksoi Tare.
Sipas ish-drejtori i Parkut Arkeologjik të Butrintit, teksa ishte i ftuar në “Ora News”, – “PPP në trashëgiminë kulturore është shumë e rrezikshme. Nuk mund t’u jepen të huajve. Nuk kemi një model tjetër në Europë. Ose do të pranojmë që Butrinti ka falimentuar, dhe i jepet një pale të huaj”.
“Ose themi që Butrinti është i suksesshëm, dhe nëpërmjet një fondacioni të mblidhen të gjithë ekspertët më të mirë shqiptarë. Por duhet të jetë një bërthamë shqiptare, nuk mund ta dorëzosh trashëgiminë tënde te një i huaj”, – tha Auron Tare.
Partia Socialiste nuk është streha e ëngjëjve apo e elitës së këtij vendi.
As Partia Demokratike nuk është shpëtimtarja që vetëm mos ardhtë në pushtet, se do i japë secilit shqiptar nga një ‘lugë floriri’ të hajë në detin që do bëhet kos.
Jo! Te Rilindja dalin mbi ujë arrogantët me stile acarues autoriteti për karrige që edhe vetë e dinë se nuk i meritojnë. Papërgjegjshmëri akute!
Tek PD notojnë mbi ujë e nën të hije pa identitet.
Të dyja mbajnë peng gati 60% të popullatës shqiptare që nuk del fare në votime, se nuk u bëjnë duart të votojnë as për njërën palë, as për tjetrën.
Ama në Partinë Socialiste ka njerëz me mendje, punë, përqasje, produkte, gjurmë e karakter të admirueshëm. Nuk i njihni, se nuk janë (më) në majë të ajsbergut rilindas. Vetë brenda llojit, u kanë hequr zërin. Figurën. Dinjitetin, për të cilin aq shumë kemi nevojë.
Te Partia Demokratike flitet për risi me të njëjtat emra që dëgjoja në radio e shihja në ekran kur mundohesha të kuptoja 1997-ën në Vlorë. Të njëjtët që erdhën në 2005-ën, por i larguan me frymë-çlirim në 2013-ën.
Ka shumë zonja e zotërinj të djathtë që kanë finesë në mendim, analizë, ligjërim publik, përkujdesje, fisnikëri, profesionalizëm e dashamirësi për vendin. As këta nuk i njihni, se edhe nëse kanë pasur zë, i kanë zhytur, anashkaluar e shpërfillur me amatorizëm.
Ndaj, nuk është problemi i qeverisjes së vendit PD-ja apo PS-ja. (lëvizjet e tjera politike, me meritë të plotë të tyre, nuk mund të merren në konsideratë).
Problemi është se modelet që promovojnë të dyja kahet janë të ulëta, demotivuese, çjerrëse, antishqiptare, abuzuese, narcize e të dëmshme. Oh sa të dëmshme!
Nuk është drama tek emrat e përveçëm, por tek sjellja e secilit, tek modeli që është mbjellë, ujitur e trashur në mënyrë kaq të rëndmotë, sa duket sikur po i zë vendit frymën.
Nuk duhen ndryshuar vetëm emrat, por edhe brenda emrave, modelet: Modeli i punës në secilin individ, majtas, djathtas e nga Hëna qoftë!
Modelin e përforcon partia ku aderohet, ama thelbin, karakterin, e ka secili të lindur, të mbrujtur e të gatuar që në vegjëli, deri në papjekuri, kur i kthehen vendit në bumerang.
Prandaj: jini njerëz për të qenë, para se të jeni militantë të dëmshëm e të rëndomtë, që mbani peng ç’ju vjen në dorë nga thesi publik!
Bëjini Shqipërisë një nder: Në keni moral, fe, besim, rrënjë a mend, JINI NJEREZ të mirë para se të pretendoni se jeni edhe të zotë!
Mjeku infeksionist, Tritan Kalo, ripërsërit thirrjen për qytetarët, që të respektojnë masat kundër koronavirusit.
Përmes një mesazhi të gjatë në ‘Facebook’, mjeku Kalo ‘thumbon’ dhe politikën, teksa shprehet se ‘nuk e meritojmë të jemi aty ku duhej të ishim edhe 30 vite pas ndryshimeve të menduara dhe dëshiruara si demokratike, por që në fund të fundit rezultuan të ishin vetëm e vetëm ndryshime demon-kratike, ku demonët e klasës/kastës/glasës sonë të politiqenërve zotërojnë gjithçka, si dhe tallen me fatet tona’.Mesazhi i Kalos:
KOHË KOVIDIANE…..KAM lindur I-LIR dhe I-LIR do të vdes…..Të qënurit SOVRAN në Trojet Arbërore për mua don të thotë, të “qëndrosh e ushqehesh në SOFRËN/SOVRAN tënde me DINJITET”, të jesh në çdo kohë e rrethanë ZOT i “menysë së saj”, si dhe të mos “gëlltitësh çdo lloj çorbe që të ofrohet” me hir apo me pahir mbi të….A JEMI NE SOVRANË???….UNË THEM SE JO!!!….Mes Nacionalizmës dhe Internacionalizmës, do të zgjidhja të parën….Mes Shqiptarizmës dhe Globalizmës si moto, si shtysë mendore të jetësimit të mbrothësimit socio-politiko-ekonomik të Trojeve Arbërore, pa as më të voglin hezitim do të zgjidhja të parën….PA DINJITET e MBROTHËSI socio-ekonomike mbetesh përjetësisht si një nxënës i vobegtë përballë tryezës së “mësuesit” tënd, mbetesh hallka e fundit dhe më e thyeshme e një Bashkësie vendesh në Europë e kudo gjetkë…….NATYRA na ka falur bujarisht pasuri mbi dhe nëntokësore të pallogaritëshme, për të qënë të LIRË dhe për të jetuar me DINJITET….
NUKU e meritojmë të jemi aty ku nuk duhej të ishim edhe 30 vite pas ndryshimeve të menduara dhe dëshiruara si DEMOKRATIKE, por që në fund të fundit rezultuan të ishin vetëm e vetëm ndryshime DEMON-KRATIKE, ku demonët e klasës/kastës/glasës sonë të politiqenërve zotërojnë gjithshka si dhe tallen me fatet tona….FRYMOJMË mbi ato troje ku u thelbësua CIVILIZIMI, GJUHA dhe KULTURA e përbotëshme, NDAJ nuk e meritojmë aspak të jemi aty ku KURRË nuk duhet të ishim….ZGJOHUNI Bashkëkombas të mi kudo që frymoni në viset e Shqipërisë Natyrale të 28 Nëntorit 1912, për sa kohë që ende flitet SHQIP dhe për sa kohë që ende frymojnë SHQIPTARË në këto vise….NUKU duhet të jemi thjesht aktorë, POR vetëm e vetëm faktorë të zhvillimeve në “Illiricum Peninsula”….
Në kushte të tilla historike, BASHKIMI KOMBËTAR si fillesa e ringritjes, rimbrothësimit, faktorizimit sicio-ekonomiko-politik mbetet i vetmi opsion për NE, për të rifituar vendin meritor në mesin e KOMBEVE të emancipuar të Njerzimit…..SOFRËN e mbrothësimit NUKU ta shtron Bota, por vetëm e vetëm ventërgjegjësimi, puna, përkushtimi e atdhedashurija….. Demokracija na e ofron mundësinë e rradhës më 25 Prill 2021, për t’i dhënë peshën e forcën e duhur VOTËS sonë, si mekanizmi kryesor i ndryshimeve socio-politike në këtë sistem, e për të bërë më së fundmi NDRYSHIMIN e kërkuar kaherë që në Dhjetor 1990!!!….WAKE UP MY ALBANIANS!!!….
Kryeministri Edi Rama u shpreh se: Ilir Meta, Saliu, Monika po e po janë shumë më patriot se unë.
Për detyrën që ka presidenti iu takon që ta kuptojë çfarë ka thënë kryeministri grek. Transparencë bëhet për diçka që nuk ka ndodhur. Negociatat nuk zhvillohen në Jalë. As në maunet në formë varke, as në gjirin e Lalëzit, por me delegacione. Njerëzit që i kanë peshkuar ose që janë shqetësuar të kuptojnë disa gjëra të thjeshta. Ambasadori e shtoi konfuzionin duke thënë që nuk ka transparencë. Kur u ndryshua qeveria në Greqi, nuk kanë rifilluar. Nuk ka zhvillime të reja. Nuk ka marrëveshje për detin, me qeverinë e mëparshme. Llogarit me të renë. Dimë që Mistotakis ka qasje të mirë me Shqipërinë për të ndërtuar një marrëdhënie solide dhe të fqinjësisë së mirë. Presidenti është peshkatar sepse nëse ka një pikë që Ilir Meta, Lulzim Basha dhe Saliu duhet ta qepin gojën është kjo pikë. Siç e qelbën këta nuk e bën dot asnjë qeveri shqiptare. E kanë treguar se janë të paaftë për të mbrojtur interesat kombëtare.
Kryetarja e LSI-së Monika Kryemadhi është e ftuar në Open në Top Channel ku foli për çështje aktuale. Kryemadhi ironizoi Edi Ramën për mos mbajtjen e premtimeve.
“Edi Rama u ka thënë të dua deri në vdekje 7 grave deri tani, edhe i ka ndarë të gjitha. Edi Rama i ka të humbura zgjdhjet.
Unë nuk kam frikë nga Edi Rama. Po të ishte dikush tjetër në krye të PS do ta kishim shumë më të vështirë. Po të ishte Pandeli Majko në krye të PS do ta kishim më të vështirë në zgjedhje”- tha Kryemadhi.
Avokati, Spartak Ngjela, lëshoi deklarata të forta në A2, ku u shpreh se e ardhmja e Shqipërisë nuk është e lidhur me dy grupet aktuale politike. Madje, ai shkoi edhe më tej, duke thënë se nëse BKH-ja do të krijohet deri në vjeshtë, asnjë nga politikanët aktualë nuk do të jenë kandidatë në zgjedhjet e vitit 2021.
“Shqipëria nuk ka asnjë shpresë tjetër përveç reformës antikorrupsion. Mos i merrni seriozisht këta që fillojnë të flasin për fushata elektorale. Ambasadorja amerikane i goditi sot duke thënë se po sabotohet ngritja e Byrosë Kombëtare të Hetimit.
Shqiptarët e mençur presin BKH-në. Nëse do të kemi forca që të fillojë funksionimi i BKH-së, asnjë nga këta nuk i ke më kandidat për deputet. Jam i sigurt për këtë.
Hetuesit e BKH-së janë edhe me shtetësi shqiptare, janë edhe me shtetësi amerikane. Vetëm kryetari është vetëm me shtetësi shqiptare. BKH i ka shqetësuar këta. Këta dy grupime politike nuk kanë lidhje me fatin e ardhshëm të Shqipërisë.
Nëse politika e madhe që po drejton antikorrupsionin në Shqipëri e formon Byronë Kombëtare të Hetimit brenda vjeshtës, asnjëri nga këta nuk i ke kandidatë për deputetë. Nuk do të jenë kandidatë pasi do të jenë për hetim. Nuk kam të dhëna konkrete, por edhe Rama nën hetim do të jetë. Kjo është edhe arsyeja e reagimit të ambasadës amerikane”, tha Ngjela.
Por kush do ta drejtojë vendin nëse do të largohen këto dy grupe politike, sipas avokatit?
“Vakumi do të ndërtohet nga influenca perëndimore. Ne kërkojmë të shkojmë në BE dhe reformën antikorrupsion e kërkon Brukseli. Por unë mendoj se aktualisht nuk mund të flasim për emra, por për frymë. Fryma e politikës së sotme shqiptare është dekadente dhe duhet ndërruar.
Problemi është shumë i thjeshtë, ne duhet të presim reformën. Ata që do të vijnë do të jenë nga bota akademike dhe sidomos nga shqiptarë të iluminuar në perëndim dhe që janë në pozicione të rëndësishme sot në perëndim. Mos mendoni se nuk ka filluar ingranimi i tyre në politikën e re që do të vijë në Shqipëri. Kam të dhëna që janë të kontaktuar. Ne kemi këtë shpresë, atë të një reforme absolute antikorrupsion”.
Presidenti Ilir Meta reagon lidhur me raportin e Departamentit Amerikan të Shtetit, për klimën e investimeve në vend.
Kreu i shtetit thotë se Shqipëria perceptohet në raportin vjetor të Departamentit Amerikan të Shtetit si vendi me korrupsionin më të lartë në Ballkanin Perëndimor, ku klima mbytëse e të bërit biznes është përkeqësuar nga vendimet arbitrare e politikat fiskale jo transparente dhe klienteliste që cenojnë konkurrencën dhe sipërmarrjen e lirë.
Meta thotë se sipas konkluzioneve tronditëse të DASH “investitorët e huaj përmendin korrupsionin, veçanërisht në gjyqësor, mungesën e transparencës në prokurimin publik dhe zbatimin e dobët të kontratave si probleme të vazhdueshme në Shqipëri. Përdorimi në rritje i kontratave të Partneritetit Publik Privat (PPP) ka ulur mundësitë e konkurrencës, përfshirë investitorët e huaj, në infrastrukturë dhe sektorë të tjerë. Investitorët amerikanë sfidohen nga korrupsioni dhe vazhdimi i praktikave informale të biznesi. Të drejtat e pronës vazhdojnë të jenë një sfidë sepse titulli i qartë është i vështirë për t’u fituar. Ka pasur raste që individë dyshohet se manipulojnë sistemin gjyqësor për të marrë tituj të paligjshëm të tokës”.
Në vijim shprehet se ky raport vjen në një kohë kur shoqatat e biznesit, Dhomat e Tregtisë, përfshi dhe atë Amerikane, kanë ngritur në mënyrë të përsëritur shqetësimin në lidhje me përkeqësimin e klimës së biznesit dhe të investimeve.
Presidenti nënvizon se edhe Banka Botërore në raportin e saj të ‘Doing Business’ ka ngritur me shqetësim rritjen e barrës fiskale dhe ndryshimet e shpeshta në aktet ligjore dhe nënligjore.
Ndërsa sipas tij, Fondi Monetar më herët ka ngritur me shqetësim rrezikun nga rritja e numrit dhe të kostos së PPP-ve, si dhe rritjen e borxhit publik si pasojë e tyre.
“Sjell në vëmendje se shumë dekrete për kthimin e ligjeve që denoncojnë antikushtetutshmërinë e tyre, cenimin e interesit publik e kombëtar, si dhe cenimin e financave të shtetit me ligje speciale me efekt favorizues për një grup të caktuar individësh janë rrëzuar nga Kuvendi i Shqipërisë. Procesi ligjbërës po shpërdorohet haptazi, në mënyrën më flagrante të mundshme, ku tashmë nuk po shkelet ligji për të kryer favore, por po bëhen ligje të posaçme për t`i realizuar ato”, shkruan Presidenti.
Ai shton se në këtë klime mbytëse për investitorët e brendshëm dhe të huaj, kur PPP-të dhe tenderat janë përqendruar vetëm në një grusht oligarkësh, në kushtet e tentativave për amnisti fiskale korruptive, si dhe të mungesës së transparencës në sistemin e prokurimeve, është domosdoshmëri kthimi i ekonomisë në normalitet në funksion të zhvillimit të qëndrueshëm.
Meta thotë se i ka bërë thirrje publike prej muajsh Prokurorisë së Posaçme Antikorrupsion (SPAK) të nisë hetimet për të gjitha procedurat e propozimit dhe shqyrtimit të këtyre ligjeve për të vënë përpara përgjegjësisë autorët, të cilët përmes ligjit duan të përmbushin qëllimet e tyre favorizuese klienteliste, por se ende nuk ka marrë asnjë përgjigje dhe ende nuk ka asnjë hetim.
Presidenti deklaron se procesi ligjbërës dhe interesat klienteliste nuk mund të fusin në qorrsokak procesin e integrimit dhe të ardhmen europiane të Shqipërisë.
“Është koha që shqiptarët të marrin në dorë fatet e tyre!”, thotë në mbyllje kreu i shtetit. /noa.al
