Art-Kulture

Koncert by Aulon Naçi
Koncert Premierē

U bë disa kohë që qarkullon se do të bëhet një koncert ndryshe me krijime të komppzitorit Aulon Naçi ! Nëpër disa koncerte të realizuar nga Bashkia Vlorë apo Konsullata Italiane ne kemi dëgjuar Milongën që ështē duartrokitur shumê por tek-tuk edhe gjëra esenciale.
Sot në mbrëmje Auloni vjen me njē koncert të fuqishëm që do të realizohet në një vend të shenjtë, tek Kisha e Nartës ku ai do të luajë vetëm nji pjesë e pastaj instrumentistë shqiptarë e të huaj në nji orkestër prej rreth 25 artistësh do të luajnë 10 pjesë të krijuara nga Auloni por te interpretuara për herë të parë në skenē .!
Them i fuqishëm pasi i kam dëgjuar pjesët nji nga nji dhe e them me sinqeritet se ardhja e Aulon Naçit në Shqipëri, pas njē arsimimi dhe Edukimi jashtë atdheut sjell një ndryshim niveli artistik e kreativ jo vetëm në qytetin e Vlorës, por edhe në Shqipëri .
Ndoshta ju mendon se shtoj, zmadhoj diçka siç mund të komplimentojmë çdo artist tê ri. Gaboni !
Auloni ashtu siç realizoi në Vlorë koncerte të krijuesve shqiptarë e të huaj , sot po prezanton një nivel shumë të lartë të krijimtarisë së tij moderne, bashkëkohore dhe me risi në muzikën shqiptare e cila ka kohë që fle. Të gjitha kompozimet Luledielli, Deti im, Prekja e huaj, Zëri i heshtjes së humbur, Poseidon, Pergjerim nënës sime, Prekja e huaj, Lotët e shiut, Stuhi në det etj paraqesin njē arritje të një niveli të lartë të Aulonit në vetvete, të artit shqiptar në tërësi, por edhe tregon se pērgatitja e studentëve shqiptarë në shkollat e huaja e shkeput nivelin e shkollës profedionale , Universitetit apo formimit të artistëve në vend. Një e vërtetë e hidhur!
Kur hyn në muzikën e Aulonit ndien se shpirti kalon në disa stade të panjohura, forca dhe aftësia shprehëse nëpërmjet tingujve që krijojnë një harmoni të bukur njerëzore dhe hyjnore mund të them të mbajnë peng .
Do të doja të shkruaja pa fund për muzikën e tij pasi aty ndiej forcën, gëzimin, dhimbjen por edhe shpresën në njē forëm që duket sikur shpirti ndihet rob i asaj që dëgjon dhe krenohet që dikush mund të shprehë ato që ai nuk arrin ti thotë, që i vuan në heshtje!
Arti i Aulonit do të lerë gjurmë në Artin shqiptar .
Ju do ta shikoni miq që nuk zmadhoj asgjë …
Do ta ndieni , aty … Në një vend të shenjtë, Në Kishën e Nartës ku as Janullato nuk u kursye para këtij djali të talentuar !
Mos u kurseni as ju të pranoni me shpirt të hapur se diçka duhet të ndryshojê pêr mire !

Ministria e Kulturës ka gati 64 projekte të gatshme për t’u zbatuar, të cilat kanë të bëjnë me restaurimin e objekteve kulturore.

Ministrja e Kulturës, Mirela Kumbaro gjatë takimit të saj ditën e sotme në qytetin e Lezhës për programin “100 fshatrat” theksoi se pikturat murale të katër kishave në Voskopojë do të restaurohen.

“Ministria e Kulturës ka mbi 64 projekte të gatshme për t’u zbatuar, të cilat mund të jenë që nga rindërtimi i një ure, rikualifikimi i një sheshi, rindërtimi i një shtëpie, restaurimi i një kishe apo xhamie, si një tjetër veçori e jashtëzakonshme e turizmit kulturor shqiptar, siç është bashkekzistenca e institucioneve fetare.

Tashmë ka edhe disa kërkesa për mbështetje, madje një bankë, ABI bank, i ka tërhequr projektet e veta për restaurimin e katër kishave në Voskopojë të pikturave murale, kështu modelet i kemi, projektet i kemi dhe na mbetet vetëm që të takohemi më shpesh”, – theksoi Kumbaro.

Duke u ndalur te qyteti i Gjirokastrës, Kumbaro bëri me dije se ky qytet, edhe pse kishte 13 vite që ishte shpallur qytet i UNESCO-s, kishte shumë pak hotele për të akomoduar turistët, ndërsa sot realiteti është ndryshe, hotelet janë shtuar, por përsëri kërkesat janë të larta.

“Po të marr Gjirokastrën dhe nuk mund të merrja shembull tjetër veç Gjirokastrës sigurisht, për 1 milion arsye, që nga ato personale, deri tek ato politike, por sidomos kulturore, sepse është një ndër ato që ne i quajmë klishe, ama vetë Gjirokastra ka 13 vite që është qytet i UNESCO-s, por në qytetin e Gjirokastrës deri në 2013-ën kishte vetëm 2 hotele e gjysmë, tre nuk bëheshin. Ndërsa sot, në qoftë se do të futemi te “booking.com” kemi mbi 67 oferta dhe është e vështirë që të gjesh sidomos në fundjavë hotele të disponueshme. Bëhet fjalë për një qytet të vogël, cilido në fakt nëse e viziton e mbaron atë listën e vendeve për të vizituar në harkun kohor të 48 orëve, por nëse del vetëm 10 minuta nga Gjirokastra dhe fillon të lëvizësh në fshatrat që ka qarku, pa frikë aty ka një ofertë turistike, kulinare, natyrore, turistike dhe bujqësore që të mban minimalisht 10 ditë.

Sipas ministres Kumbaro, zgjedhja e “100 fshtrave” nga pikëpamja kulturore është një lloj ekuilibri mes disa pikave ose fshatrave që e kanë të garantuar suksesin që sot dhe janë sot model.

“Dhe në fakt ky ishte synimi, që të gjitha këto pika që zgjerojnë hartën, turistike, kulturore të zhvillohet përmes “100 fshatrave”.

Po marr Labovën në të cilin kemi ndërtuar rrugët për të aksesuar atje para një viti, në të cilën kemi një nga kishat më të jashtëzakonshme Bizantine, me një histori të mbushur me piktura dhe me një traditë rreth e rrotull, është restauruar tashmë.

Aty ka filluar tendenca për agroturizëm por ajo që mungon është dija se si standardizohet agroturizmi që na mbetet për ta bërë në këtë fshat. Nëse unë do të thosha se çfarë mund të ofroni ju për këtë fshat është pikërisht ngritja e standardeve që janë pjesë e Ministrisë së Turizmit. Ndërsa kemi një fshat tjetër i cili ndoshta nuk ka këtë njohje, por mbetet për t’u ndërtuar, pra ekuilibri mes një fshati që e ka suksesin brenda dhe një tjetri që duhet të fillojë nga zero janë gjithashtu krijime të modeleve të ndryshme brenda “100 fshatrave”, – theksoi Kumbaro.

Kërkesat e larta të turistëve të huaj për vendin tonë, ministrja Kumbaro zgjodhi ta sillte me anë të një shembulli konkret.

“Ja ku jemi në Fishtë, këtë të hënën një grup miqsh të mi francezë, jo thjesht turistë, gazetarë dhe politikanë, janë me pushime në Shqipëri dhe më kërkuan t’i ndihmoja se ku mund të hanim drekë javën e kaluar dhe meqënëse ishim në Shkodër unë mendova për “Mrizin e Zanave”, por nuk kishte vend dhe nuk i pranoi për shkak se nuk kishte vend.

Është lajm i mirë në fakt ky, është një model suksesi i cili nuk u bë i tillë nga “100 fshatrat”, por sepse ishte i tillë prandaj e përfshimë te “100 fshatrat”, – përfundoi Kumbaro. /atsh

Nëpërmjet një shkrimi të publikuar nga kanali “Sky Arte”, i cili i kushtohet kryesisht artit dhe kulturës, i bëhet një pasqyrim zhvillimeve në Tiranë, ku po synohet që të ndërtohet një teatër modern.

Gjiganti mediatik “Sky” i ka bërë jehonë faktit që Tirana i ka besuar projektimin e Teatri të ri Kombëtar një prej arkitektëve më me emër dhe reputacion në botë, Bjarke Ingels.

Artikulli thekson se disa muaj pas përfundimit të “LEGO House” në Billund, Grupi BIG-Bjarke Ingels është gati të matë veten në kryeqytetin shqiptar, për të krijuar në qendrën e tij Teatrin e ri Kombëtar të Shqipërisë.

“Klima e ‘gjallërisë arkitekturore’ e pranishme tashmë prej disa vitesh në kryeqytetin shqiptar, duket se po vazhdon, këtë herë me një ndërhyrje në aspektin funksional”,  thuhet në përshkrimin “Sky Arte”, i cili shton më tej se: “Teatri i ardhshëm Kombëtar i Shqipërisë do të jetë në gjendje të presë një gamë të gjerë të shfaqjeve të drejtpërdrejta, me hapësira të dedikuara për shfaqje brenda dhe jashtë”.

Më tej “Sky Arte” është ndalur në çështje teknike të projektit të Bjarke Ingels, duke raportuar se me rreth 9 mijë metra katrorë në dispozicion, kompleksi mund të krenohet edhe me një teatër të hapur në çati dhe një hapësirë publike të mbuluar, të vendosur poshtë ndërtesës. Për të gjeneruar ndërtesën, vëllimi i saj pëson një shtypje në qendër, për t’u ngritur pjesërisht nga toka. Në këtë mënyrë, krijohet një hendek mes dy pjesëve të sheshit publik, për të formuar një lidhje. Hapësira të mëdha me xhamë do të shtrohen në të dyja fasadat kryesore, duke zvogëluar distancat midis teatrit, i cili do të jetë gjithashtu një vend i prodhimit kulturor, i pajisur me shërbime restorantesh, dhe pjesës tjetër të qytetit./atsh

Kryeministri Edi Rama mori pjesë si i ftuar nderi në eventin kulturor më të madh italian “Çmimi i kulturës Pio Alferano”, i cili u zhvillua gjatë kësaj fundjave në Salento.

Çmimi i kulturës “Pio Alferano” është një nga më të rëndësishmit që ndahet gjatë verës në Itali dhe në mesin e fituesve për këtë vit është edhe Kryeministri Edi Rama me ekspozitën e tij të titulluar, “Karakter i fortë, shpirt i butë.”

Kritiku dhe personaliteti i shquar i artit Italian Vittorio Sgarbi i cili ishte dhe kurator i ekspozitës së Kryeministrit Rama, përmes një statusi në “Facebook”, ka vlerësuar Ramën për ekspresionin e tij si artist i cili nuk e ndan artin nga aktiviteti i tij politik.

Ai thekson se Shqipëria sot është padyshim një vend më i mirë, falë lidershipit të kryeministrit dhe artistit Edi Rama.

“Në Cilento, në Castellabate, mbrëmë, kemi inauguruar tri ekspozita në kuadër të Çmimit “Pio Alferano”. Një nga këto i është kushtuar Edi Ramës, i cili përveç që është një artist i mirë, që nga viti 2013 është gjithashtu Kryeministri i Shqipërisë. E shikoj me admirim, sepse është ndër politikanët e paktë që kreativitetin dhe shpirtin artistik e ndërlidh me menaxhimin e përditshëm të pushtetit dhe në përgjithësi ndaj veprimeve të qeverisë. Nëse sot Shqipëria është një vend më i mirë, kjo është padyshim për shkak të tij”, – deklaroi Sgarbi.

Çmimi “Pio Alferano” organizohet nga Fondacioni me të njëjtin emër në kujtim të gjeneral të Policisë italiane Pio Alferano.

Gjatë viteve ’70 gjeneral Pio Alferano ka luajtur një rol të rëndësishëm në drejtimin e repartit të policisë për mbrojtjen e pasurisë kulturore./atsh