Kulinari

Brokoli është një ndër perimet të pasura me vlera të fuqishme ushqyese. Por shpesh mënyra e konsumimit të saj, në formën e gatuar  bën që shumë vlera ushqyese të kësaj perimeje të humabsin.

Shumë minerale, vitamina dhe vlera të tjera humbasin gjatë gatimit, vlera të cilat janë shumë të dobishme për shëndetin e organizmit.

Sa më shumë ujë të përdorni për gatimin e brokolit aq më shumë vitamina të kësaj perimeje do të humbasin.

Rekomandimi i shumë dietologëve është që brokolit të konsumohen të gatuara shumë pak ose aspak.

Në rastin e fundit, lulet e brokolit pastrohen mirë, ndahen në pjesëza të vogla, marinohen me vaj ulliri,kripë e lëng limoni dhe konsumohen në formën e sallatës.

Në këtë rast bëni kujdes që të konsumoni jo sasi të mëdha të tyre veçanërisht për personat që kanë probleme me stomakun dhe tretjen.

Vlerat që përfiton organizmi

Brokoli është një nga perimet e gjelbra më të shëndetshme në botë.

Bëhet fjalë për një perime miqësore me stomakun, të lirë në çmim por shumë të pasur në vlera dhe shije.

Brokoli është i pasur edhe me fibër të tretshme që nxjerr kolesterolin e keq jashtë trupit.

Kjo perime shërben edhe si antioksidant duke qenë se ka nivele të larta e të përqendruara të vitaminës C dhe flavonoidëve që përmirësojnë funksionet e kësaj vitamin.

AgroWeb.org ju tregon se tek brokoli gjeni edhe luteinë, zeaksanthinë, beta karoten dhe shumë antioksidantë të tjerë të fuqishëm.

Imunitet i fortë, shëndet i fortë

Brokoli është i pasur me mineralet alkalinë dhe si çdo perime tjetër e ndihmon organizmin të ulë nivelet e dëmshme të aciditetit dhe e pastron atë nga toksinat.

Proçesi i detoksifikimit mbështetet nga substancaa si glukorafanina, glukonasturtina dhe glukobrasicina, të cilat aktivizojnë, neutralizojnë dhe eliminojnë ndotësit e dëmshëm të organizmit.

Për më tepër, brokoli përmban isothiocinates që mbajnë nën kontroll proçesin e detoksifikimit në nivel gjenetik.

Brokoli përmban nivele të larta të kalciumit dhe vitaminës K, të cilat janë të rëndësishme për shëndetin e kockave dhe parandalimin e osteporozës. Kjo perime e gjelbër bën mrekullira për zemrën.

Vlerat anti-inflamatore të brokolit e bëjnë atë të rëndësishëm për mbrojtjen e enëve të gjakut nga problemet që shkaktohen nga sëmundjet kronike që kanë lidhje me sheqerin e gjakut.

Nëse e keni të vështirë ta konsumoni të pagatuar, mundohuni ta gatuani sa më pak, në mënyrë që të maksimizoni potencialin e tij ushqyes. Mjafton ta gatuani për një kohë shumë të shkurtër me avull.

Këto ditë të ftohta kërkojnë receta interesante që shkojnë përtej atyre që jemi mësuar të përgatisim çdo vit.

E tillë është edhe receta e uthullës së ngrohtë të mollës, e cila përgatitet shumë lehtë dhe shpejt.

Nuk e keni lexuar gabim. Me uthull molle mund të përgatitet një pije e ngrohtë, e shijshme dhe befasuese.

Për përgatitjen e saj kërkohet padyshim mollë, uthull molle, erëza aromatike siç është kanella, por edhe agrume të ndryshme.

Këto nuk janë përbërësit e vetëm të recetës, të cilën do e gjeni të zbardhur më poshtë në këtë artikull .

Përbërësit:

1 ose dy mollë

Dy lugë çaji me fara karafili

Një portokall i prerë hollë

Katër gota me uthull molle

Çerek filxhani çaji me sheqer kaf

Një lugë çaji me erëza të përziera sipas dëshirës

3 shkopinj kanelle

Udhëzimet

Prijini portokallet në feta të holla.

Mollët ndajini në gjysmë.

Në tulin e tyre dhe në pjesën e jashtme ngulni farat e karafilit

Hidhini të gjithë përbërësit në një tenxhere mesatare dhe vendoseni në zjarr.

Lëreni të marrë një valë në zjarr të ngadaltë për rreth 10 minuta.

Gjatë kësaj kohe, aromat e përbërësve do të jenë ndërthurur mirë me njëra tjetrën.

Hiqeni tenxheren nga zjarri dhe shtoni rum nëse dëshironi.

Lëngun kullojeni me një napë ose kullesë dhe hiqini mollët dhe portokallët.

Lëngun mund ta hidhni nëpër gota apo filxhanë dhe të shtoni nga një shkop kanelle në secilën prej tyre.

Koha e përgatitjes së kësaj recete është 20 minuta.

Me përbërësit e lartpërmendur mund të prodhoni lëng të ngrohtë e të shijshëm për 4 deri në 8 persona.

Kjo recetë ofron 229 kalori dhe shumë vitaminë C, përkatësisht 27 përqind.

Vitamina C është shumë e dobishme sidomos në këto ditë të ftohta, ndaj duhet të konsumoni sa më shumë ushqime dhe pije të pasura me këtë vitaminë.

AgroWeb.org ju këshillon që gjithsesi të mos e teproni me sasinë e kësaj pije, pra mund të pini një gotë në ditë.

Për shumë njerëz, kafeja është një pije ekzaltuese.

Ajo arrin të ndezë trupin dhe të largojë lodhjen, dhimbjen e kokës dhe plogështinë.

Pavarësisht kësaj, kafeja mund të krijojë varësi dhe të shoqërohet me nervozizëm dhe të dridhura.

Një gjë e tillë, i shtyn njerëzit të zgjedhin çajin, një alternativë më e butë për organizmin.

Për më tepër, çaji ka fituar reputacionin e të qenurit një pije shumë e shëndetshme.

Përfitimet

Kafeja dhe çaji kanë avantazhe dhe disavantazhe.

Studimet për të dyja janë kontradiktore, ndonëse disa prej tyre pohojnë se kafeja ka aftësinë të ulë predispozitën e shfaqjes së sklerozës, Alzheimerit apo të diabetit.

Kafeja ka përmbajtje më të lartë të kafeinës dhe stimulantët e saj ndihmojnë njerëzit që vuajnë nga azma të qetësohen.

Kafeina pakëson migrenën dhe rekomandohet të pihet pasi e keni tepruar me alkolin.

Shkencëtarët e Harvardit që kanë analizuar rolin e kafesë në shëndet thonë se ajo nuk shkakton probleme shëndetsore, por nuk ka ndonjë përfitim të mirëfilltë.

Çaji është i pasur me antioksidantë dhe substanca që luftojnë qelizat e dëmshme.

Të dhënat  konfirmojnë se këto antioksidantë luajnë rol në parandalimin e shfaqjes së tumorëve por jo në uljen e rrezikut të këtyre sëmundjeve.

Megjithatë çaji është konsideruar gjithnjë një pije mjekësorë dhe terapeutike.

Çaji i zi, i bardhë dhe jeshil përmbajnë polifenolë që ofrojnë shumë përfitime shëndetsore.

Këto çajra dhe jo ato të ftohtë e të konservuar janë të pasur me polifenolë që mbrojnë qelizat nga dëmet e radikaleve të lira.

Rreziqet

Nëse e teproni me çajin ose kafenë do të përballeni me më shumë ankth, takikardi, çrregullime të rrahjeve të zemrës, pagjumësi, parehati dhe të përziera.

Sasitë e mëdha të kafesë pa filtër rrisin nivelet e kolesterolit të keq.

Çaji mund të përmbajë edhe floride, një substancë që u rrit rrezikun e frakturave të kockave.

Disa çajra me bustinë me origjinë nga Kina, India apo Sri Lanka përmbajnë alumin dhe plumb që janë shumë të rrezikshme.

Rrjedhimisht, origjina e produktit ka shumë rëndësi.

Armiku

Sipas studimit ka një tjetër armik më të fortë. Duhet të hiqni dorë nga sheqeri dhe kremërat e ndryshëm dhe mos u shqetësoni se cila pije është më e mira.

Të dyja janë të mira nëse nuk e teprioni.

Shqetësimi kryesor duhet të jetë sheqeri.

Ai është armiku i vërtetë e i fshehur në garën mes kafesë dhe çajit të cilat nuk i kanë bërë keq askujt që kur u shfaqën në jetën e njeriut mijëra vite më parë.

Kolla është një mekanizëm që trupi e vë në punë për të eliminuar çdo substancë të huaj që akumulohet në rrugët e frymëmarrjes dhe në mushkëri.

Por nëse kolla përsëritet gjithnjë e më shpesh, atëherë ajo shkakton dhimbje, irritim në fyt dhe pagjumësi.

Trajtimet kundër kollës janë të panumërta por shumë prej tyre kanë aftësi qetësuese dhe jo shëruese ndaj viruseve dhe baktereve që e shkaktojnë atë.

Në këtë artikull  do të mësoni për një kurë natyrale me karrotë që shëron kollën, shkatërron bakteret dhe forcon sistemin mbrojtës të organizmit për tu përballur me të.

Kura Me Karrotë Dhe Mjaltë Kundër Kollës

Sekreti i kësaj kure qëndron tek kombinimi i këtyre dy përbërësve të vyer të kuzhinës.

Si karrota, ashtu edhe mjalti janë shumë të suksesshëm në mjekësinë popullore.

Ato kanë aftësinë të forcojnë sistemin mbrojtës të organizmit kundër të ftohurës, gripit dhe sëmundjeve respiratore që shkaktojnë kollën.

Karrota dhe mjalti ndihmojnë organizmin të largojë më shpejt sekrecionet dhe të qetësojë rrugët e frymëmarrjes.

Karrota është e pasur me antioksidantë që parandalojnë dëmtimin e qelizave dhe ushqejnë mushkëritë.

Karrota përmban shumë vitaminë A, B, C, K, hekur, kalium, magnez dhe fosfor.

Po ashtu, Organizata Botërore e Shëndetësisë e ka cilësuar mjaltin si një prej ushqimeve më të mira kundër kollës dhe të ftohurës.

Ai qetëson fytin dhe përmirëson mekanizmat mbrojtës të organizmit.

Mjalti përmban antioksidantë dhe luftojnë mikrobet dhe patogjenët që pushtojnë rrugët e frymëmarrjes.

Sheqernat natyralë tek mjalti janë një burim energjie për trupin dhe metabolizmin.

Nga pikpamja ushqimore, mjalti përmban acide organike, vitaminat B dhe C, minerale si magnezi ,fosfori, kalçiumi e të tjerë.

Mjalti përmban edhe enzima, flavonoidë dhe polifenolë.

Si Ta Përgatisni Kurën Me Mjaltë dhe Karrotë

Kjo pije mund të përgatitet shumë lehtë në shtëpi dhe është e përshtatshme si për fëmijët ashtu edhe për të rriturit.

Përbërësit:

500 gramë karrota

100-150 gramë mjaltë (rreth 6 lugë gjelle)

Përgatitja:

Lajini karrotat dhe pritini në copa të vogla.

Vendosini në një tenxhere me ujë dhe ziejini deri sa të zbuten.

Më pas futini në një mikser bashkë me mjaltin.

Masën e trashë hidheni në një kavanoz dhe konsumojeni sapo të vëreni shenjat e para të kollës.

Ju mund të konsumoni deri në katër lugë gjelle gjatë ditës.

Dozën e parë mund ta merrni menjëherë në mëngjes dhe të tjerat gjatë vakteve.

Nëse kolla vazhdon edhe natën, mund të merrni një lugë tjetër për qetësim.

Efekti i kurës ndihet në ditën e dytë, megjithatë ju duhet të vazhdoni ta merrni kurën deri sa kolla të jetë larguar plotësisht.

Nëse kolla vazhdon për më shumë se një javë, atëherë duhet të konsultoheni menjëherë me një mjek.