Kulinari

Janë të lehta si një pupël, të shijshme ndërsa të përfshijnë tërësisht me ëmbëlsinë e tyre.

Duhen vetëm 10 minuta në përgatitje dhe 25 minuta në pjekje dhe në fund rezultati do t’ju mrekullojë me shijen e tij.

Sekreti i shijes së këtyre amaretave qëndron tek arra e kokosit e grirë, e cila është edhe përbërësi kryesor i këtyre ëmbëlsirave.

Nëse zakonisht ëmbëlsirat, biskotat apo amaretat përgatiten me miell gruri apo edhe misri, rolin e miellit tek përgatitja e këtyre amaretave e luan arra e kokosit e grirë.

Një tjetër përbërës fantastik që i bën këto amareta edhe më të veçanta është qumështi i kondensuar, i cili e bën brumin të shkrifët dhe të butë njëkohësisht.

Ndiqni më poshtë recetën fantastike  dhe përgatiteni krejt lehtë në shtëpi për të ëmbëlsuar veten dhe më të dashurit tuaj.

Përgatitja e Amaretave të Shkrifëta në Shtëpi

Përbërësit

400 gr arrë kokosi e grirë (e gjeni në supermarkete)

400 gr qumësht i kondensuar i ëmbël (e gjeni në supermarkete)

1 një lugë çaji pluhur vanilje

2 të bardha vezësh të mbajtura në temperaturë ambjenti

Më pak se gjysma e një luge kafeje me kripë

Përgatitja

Parangrohni furrën e sobës në temperaturë maksimale.

Në një tas të madh përzieni arrën e kokosit të grirë, qumështin e kondensuar të ëmbëlsuar dhe vaniljen.

Përziejeni mirë të gjithë masën derisa të bëhet e njëtrajtshme.

Në një tas tjetër, shtoni të bardhat e vezëve si dhe kripën dhe rrihini fortë.

Bashkojini me masën e arrave të kokosit dhe qumështit të kondensuar.

Përzjeini të gjitha bashkë. Shtroni letër pjekjeje në tavë dhe vendosni nga një lugë gjelle me brumin e përftuar.

Vendosini amaretat rreth 2 centimetra larg njera tjetrës sepse gjatë pjekjes amaretat do të fryhen dhe zmadhohen disi.

Piqini përreth 25 minuta derisa ngjyra e tyre të bëhet e artë në të kaftë. Lërini të ftohen dhe më pas shërbejini. Mund t’i shoqëroni me një filxhan kafeje por edhe çaji gjithashtu.

Kur vjen puna tek qepët, konsumatorët kanë larmishmëri në zgjedhje. Kemi qepë të kuqe, të verdhë, ose të bardhë.

A keni menduar ndonjëherë se cila prej tyre është më e shëndetshme?

Shqiptarët e duan qepën kaq shumë saqë vendi ynë plotëson 90% të nevojave të tregut vendas.

Korça dhe Elbasani janë qytetet me prodhimtari më të lartë të qepës me 94.940 dhe 72.529 kuintal respektivisht.

Në nivel kombëtar, Shqipëria prodhon rreth 175.129 kuintal qepë në vit, duke u renditur në vendin e 66-të në botë.

Në vitin 2011, Shqipëria u rendit ndër vendet e para për konsumin e qepës duke thyer rekordet me konsumin e 33.3 kilogramë qepëve për frymë.

Të dy llojet e qepëve, si e bardha ashtu edhe e kuqja, konsiderohen si super ushqime. Ato luftojnë qelizat e dëmshme, virozat, bakteret dhe radikalet e lira.

Të shumtë janë ata që mendojnë se i vetmi ndryshim mes qepëve është paraqitja dhe shija, por ndryshimi mes qepëve të kuqe dhe atyre të bardha nuk qëndron vetëm tek ngjyra.

Qepët e kuqe përdoren të gjalla kryesisht në sallata, panine dhe salca. Ndërsa qepët e bardha kanë një shije më të butë.

Ndryshimi mes qepëve të bardha dhe të kuqe:

Vitaminat dhe mineralet

Të dy tipet e qepëve kanë shumë të përbashkëta. Niveli i glicemisë në to është i ulët dhe të dyja plotësojnë me 10 përqind nevojën ditore për vitaminë C dhe kalcium.

Vitamina C është e rëndësishme për prodhimin e kolagjenit, një proteinë që kufizon aktivitetin e radikaleve të lira në organizëm.

Përveç vitaminës C, të dyja qepët plotësojnë me 2 përqind nevojën ditore për kalcium, ndërkohë që vetëm qepa e kuqe plotëson me 2 përqind nevojën ditore për hekur.

Fibra

Në 100 gramë qepë të kuqe gjenden 2 përqind fibër, ndërkohë që në të njëjtën sasi të qepës së bardhë gjenden 1.2 gramë fibër.

Asnjëra prej qepëve nuk është burim i pasur fibre, e megjithatë të dyja plotësojnë nevojën për fibër me 14 gramë në 1000 kalori ose 28 gramë në 2000 kalori.

Nëse konsumoni më shumë fibër, atëherë do të jeni më pak të rrezikuar nga sëmundjet e zemrës, diabeti, tensioni i lartë i gjakut, obeziteti dhe goditjet në tru.

Në përgjithësi, qepët kanë një shije të fortë karakteristike. Qepa e kuqe përmban shumë antioksidantë dhe konsiderohet fituese në përpjekjet për të holluar gjakun.

Për më tepër, qepa e kuqe përmban më pak sheqer në krahasim me qepën e bardhë.

Antioksidantët

Në përgjithësi, qepa e kuqe përmban më shumë antioksidantë se sa qepët e bardha, ndërkohë që në renditje, qepët e verdha janë të dytat.

Qepët e kuqe përmbajnë 415 nga 1917 mg flavonolë në krahasim me të verdhat të cilat përmbajnë 270 nga 1187 mg.

Një nga vlerat më të mira të qepës së kuqe është kuercetina, një polifenol që lufton ashpër radikalet e lira në organizëm.

Qepët e kuqe janë të pasura me anthocianinë që u jep edhe ngjyrën e ndezur. Studimet kanë provuar se qepët e kuqe përmbajnë 25 lloje të ndryshme anthocianine.

Hollimi i gjakut

Të dyja llojet e qepëve arrijnë të hollojnë gjakun falë flavonoideve dhe përmbajtjes së sulfurit.

Megjithatë, qepa e kuqe ka një efekt shtesë në hollimin e gjakut sepse është më e pasur me flavonoide.

Si të përfitoni më shumë prej tyre

Pjesa e jashtme e qepës përmban nivelin më të lartë të antioksidantëve, ndaj sigurohuni të mos e teproni me qërimin e qepës, dhe të mos hidhni shtresat më të pasura me vlera.

Një studim i kohëve të fundit tregoi se dy shtresat e para të qepës përmbajnë 75% të antioksidantëve.

Sigurohuni të konsumoni shumë qepë në dietën tuaj. Rekomandohet që të hani të paktën 3 qepë çdo javë.

Është e rëndësishme që të hani një larmi qepësh, por sigurohuni që të paktën një herë në javë të konsumoni një qepë të kuqe.

Zhvillimi i vazhdueshëm global duket se ka patur një ndikim të fortë në mungesat e mineraleve tek produktet e natyrës.

Një prej tyre është pamjaftueshmëria e jodit, që sipas Organizatës Botërore të Shëndetësisë prek deri në 2 miliardë njerëz në të gjithë planetin.

 Sipas OBSH, 5 milionë njerëz janë duke vuajtur nga simptoma shumë serioze siç është edhe dëmtimi në tru.

Një nga efektet e pamjaftueshmërisë së jodit në organizëm, është prodhimi jo normal i hormoneve nga gjëndrra tiroide.

Duke qenë se kjo gjendër përpunon dhe prodhon hormone që kontrollojnë metabolizmin, problemet shëndetësore që mund të lindin si pasojë e tiroides problematike janë të mëdha.

Fillimisht mund të mos ketë tregues nga i cili mund të mësoni se po vuani nga pamjaftueshmëria e jodit.

Tiroidja do të arrijë të kompensojë këtë mungesë duke prodhuar më shumë hormone, një veprim që do të çojë në zmadhimin e saj.

Rrjedhimisht, mosmarrja e mjaftueshme e jodit nga ushqimi do të shkaktojë një sërë problemesh siç janë pesha, ngadalësimi i funksioneve të trurit, depresioni, lodhja dhe një sistem i dobësuar imunitar.

Për më tepër, komplikacionet që vijnë nga defiçenca e jodit kanë nevojë për kundërveprim të menjëhershëm mjekësor.

Komplikacionet mund të variojnë nga humbja e kontrollit, konfuzioni, deliri, halucinacionet, dhimbjet në kraharor ose vështirësitë në frymëmarrje.

Femrat shtatzënë që nuk arrijnë të marrin sasi të mjaftueshme të jodit mund të përjetojnë hemoragji.

Përfshirja e ushqimeve të pasura me jod në ushqimin tuaj mund t’ju ndihmojë të mbani larg problemet që shkakton mungesa e këtij minerali të rëndësishëm.

Por, përpara se të diskutojmë për këto probleme, lexoni më poshtë disa prej shenjave të listuara nga AgroWeb.org, ndaj të cilave duhet të tregoni kujdes.

Po shtoni peshë të padëshiruar

Një nga efektet e të pasurit probleme me tiroiden është dobësimi i metabolizmit që shkakton shtimin në peshë.

Mund të jeni duke u lodhur shumë për të humbur kilogramët e tepërta, duke ngrënë shëndetshëm ose duke u stërvitur mjaftueshëm.

Por ritmi metabolik mund të rimëkëmbet vetëm duke e rivendosur tiroiden në rrugën e duhur.

Jeni vazhdimisht të lodhur dhe pa gjallëri

Një metabolizëm i ngadaltë ju bën të shtoni në peshë, por gjithashtu ju bën të ndiheni të lodhur gjatë gjithë kohës.

Kjo është një gjë që pritet nëse gjendra e tiroides nuk është në gjendjen e duhur, sepse kthimi i karbohidrateve dhe yndyrnave në energji në shërbim të qelizave tuaja, është i ngadalësuar.

Ndiheni në depresion

Është normale që herë pas here, të ndiheni të këputur e të rënë përtokë. Por nëse kjo gjendje nuk largohet shpejt, dhe nëse shoqërohet me ndryshime në fjetje, mungesë oreksi dhe dobësi, atëherë situata nuk është aspak normale.

Nëse vini re që ndiheni të depresionuar për shumë kohë, mundohuni të hani ushqime të pasura me jod.

Vuani gjithmonë nga alergjitë dhe infeksionet

Një nga efektet e mungesës së jodit është dobësia e sistemit imunitar. Nëse nuk jeni duke marrë mjaftueshëm jod nga dieta juaj, atëherë do të vuani vazhdimisht nga i ftohti, kolla, gripi dhe virozat.

Me çorientimin e gjendrës tiroide, ju do të jeni më të brishtë ndaj dëmeve të shkaktuara nga radikalet e lira dhe mikrobet pushtuese.

Keni lëkurë të thatë dhe ju bien flokët

Nëse jeni të kujdesshëm për pamjen tuaj, atëherë sigurohuni që në tryezën tuaj nuk mungojnë ushqime të pasura me jod.

Në të kundërt, do të keni një lëkurë shumë të thatë dhe do t’ju bien flokët. Nëse flokët janë një nga karakteristikat më të mira fizike që keni, atëherë duhet të kujdeseni për to, dhe të konsumoni ushqime të pasura me jod.

Këto janë disa prej shenjave që tregojnë se ju keni shumë nevojë për ushqime të pasura me jod. Por cilat janë këto ushqime? Lexoni më poshtë listën e përgatitur nga AgroWeb.org:

• Qumështi
• Kosi
• Djathi Cheddar (i verdhë)
• Patatet
• Merluci
• Peshku ton
• Karkalecat
• Aragosta
• Alga deti të thata
• Gjoks gjeldeti
• Bishtaja
• Kumbulla të thata
• Boronica të kuqe
• Banane
• Luleshtrydhe

Nëse vuani nga mungesa e jodit, kujdesuni që këto ushqime t’i keni në ushqimin tuaj të përditshmëm.

Sigurisht, dita e të gjithëve nis me kafen e mëngjesit.

Dikush e pi në shtëpi, dikush në kafene e dikush tjetër në zyrë.

Të gjithë i drejtohemi kafesë pavarësisht kemi ngrënë apo jo mëngjes.

Shumë njerëz ndjekin zakonin e përditshëm atë të shoqërimit të kafesë me pak qumësht e sheqer.

Por nëse doni vërtetë të ëmbëlsoni paksa kafen tuaj në mëngjes, e jo vetëm, provoni si alternativë kafenë me pak mjaltë.

Është jo vetëm një mënyrë e shijshme e konsumimit të kafesë por mbi të gjitha një mënyrë e shëndetshme, përmes së cilës luftoni të ftohurën, gripin dhe virozat.

Mjalti përmban vitamina A, C dhe B, gjithashtu ai është i pasur me lëndë minerale si magnez, kalium, hekur dhe kalçium.

Mjafton të shtoni një lugë çaji me mjaltë në filxhanin e kafesë dhe ta trazoni mirë atë. Nëse e dëshironi më të ëmbël mund të shtoni edhe pak më shumë mjaltë.

Krahas shijes fantastike që i jep kafesë, kombinimi i saj me mjaltë është edhe një metodë natyrale kundër virozave dhe gripit.

A është mjalti më i mirë se sheqeri?

Falë vlerave të tij ushqyese dhe vetitë antioksiduese, mjalti padyshim është më i miri.

Sheqeri nga ana tjetër nuk ka asnjë nga këto vlera ushqyese dhe sapo ai zbret në stomak shndërrohet në përbërës acidi.

Kafe me Mjaltë Kundër të Ftohurës

Kërkimet shkencore thonë se kombinimi i kafesë me mjaltë është efektiv në çlirimin e rrugëve të frymëmarrjes kur të prek i ftohti.

Trajtimi i gripit të lehtë përmes kësaj metode ka rezultuar e suksesshme, e sigurtë, me pak kosto dhe mbi të gjitha e shijshme.

Kafeja me mjaltë ndihmon edhe në shërimin e fytit të thatë si dhe problemet me kollën gjithashtu.

Megjithatë, në rastet kur organizmi është prekur nga e ftohura dhe simptomat janë të forta krahas metodave natyrale, mënyra më e mirë është t’i drejtoheni mjekut.