Kulinari

Mëmëliga është një specialitet i kuzhinës shqiptare dhe pavarësisht emërtesave të ndryshme që receta e saj ka në zona të ndryshme ajo gatuhet në të gjitha trevat shqiptare.

Është një gatim shumë i thjeshtë dhe përgatitet në shumë pak minuta por shija e tij të përfshin tërësisht.

Sot, ky gatim i veçantë ruan njëlloj traditën e tij e madje është pjesë e më të mirave gatime shqiptare në menutë e restoranteve tradicionalë.

Më poshtë keni përgatitjen e Mëmëligës në shtëpi, një gatim fantastik që do bashkojë me siguri gjithë familjen rreth tryezës.
Përgatitja e Mëmëligës me Miell Misri dhe Arra
(Përbërësit më poshtë janë për 4-5 persona)

3 filxhanë çaji me miell misri

5 filxhanë çaji me ujë (Në vend të ujit mund të përdoret edhe shëllirë djathi e holluar me ujë)

2 lugë gjelle gjalpë të freskët (Për një gatim më të shëndetshëm AgroWeb.org ju sugjeron përdorimi e vajit të ullirit)

4-5 lugë gjelle djathë i thërrmuar (i bardhë ose kaçkavall sipas dëshirës)

4-5 lugë gjelle me arra të thërrmuara
Përgatitja
Në një tenxhere hedhim 5 filxhanët e çajit me ujë ose shëllirë djathi të holluar me ujë dhe e vendosim në zjarr derisa uji të nisë të valojë.

Menjëherë sapo uji nis të nxjerrë bulëzat e para të vlimit shtojmë gjalpin e freskët dhe miellin e misrit të situr.

Në këtë moment, këshillohet që masën ta përzieni shpejt përmes një luge druri dhe pa ndërprerje në mënyrë që të evitohet krijimi i kokërrizave.

Përzihet derisa masa të bëhet kompakte dhe të nisë të shkëputet nga anët e tenxheres.

I shtojmë kripë dhe e përziejmë dhe pak. Në rast se përdorni shëllirën e djathit provojeni nëse ka kripë sa duhet.

Më pas, mëmëligën e përgatitur shtrojeni në një tepsi dhe ndajeni në racione.

Mëmëliga mund të shërbehet në pjatanca edhe lugë-lugë.

Kur shërbehet sipër spërkatet me pak gjalpë të skuqur , arra dhe me djathë të thërrmuar, të bardhë apo kaçkavall.

Kompania Nestle pretendon se është e para në botë që ka ristrukturuar sheqerin që përdor në ëmbëlsirat e saj, për të prodhuar një çokollatë me 30% më pak sheqer.

Nestle është prodhuesi më i madh në botë i ushqimeve të paketuara, por sheqeri i ristrukturuar po prodhohet në fabrikën e saj në Dalston (Britani), si pasojë e presionit të qeverisë britanike ndaj kompanive ushqimore që të reduktojnë sheqerin në produktet e tyre, për të ndihmuar në reduktimin e obezitetit tek fëmijët.

Në këtë kuadër, kompanitë e çokollatave dhe ëmbëlsirave kanë një detyrë titanike, pasi sheqeri është themelor në produktet e tyre. Por, kompania Nestle thotë se ka shfrytëzuar shkencën për të reduktuar sheqerin. Ky i fundit në çokollatat e reja Milkybar Wowsomes, është amorf dhe poroz. Ai krijohet duke sprucuar sheqer, qumësht dhe ujë në një ambient me ajër të ngrohtë dhe më pas e gjithë kjo përzierje thahet. Sheqeri i ri teknologjik nuk është më i ngjeshur si ai i zakonshmi dhe tretet shumë shpejt.

Ndërsa arritja e Nestle është përshëndetur, kritikët thonë se nuk duhet kuzifuar vetëm për Britaninë. Kjo e fundit po i nxit kompanitë e ushqimit që deri në 2020 sheqeri në prudukte të jetë ulur me 20% dhe shpreson që shembulli i Nestle të ndiqet nga të tjerë. /TCH/

Pirja e lëngut të karrotës dhe portokallit është një mënyrë e dobishme për të përfituar shumicën e vlerave dhe rritur konsumin e frutave dhe perimeve, por nëpërmjet tyre merrni vitamina, minerale dhe ushqyes të rëndësishëm për mbrojtjen e shëndetit tuaj.

Në këtë artikull do të keni mundësinë të merrni informacione të sakta mbi vlerat e kombinimit të lëngut të karrotës dhe portokallit.
Vitamina
Nëse përfshini lëngun e karrotës dhe portokallit në dietën tuaj, do të plotësoni dozën e rekomanduar ditore të vitaminës C.

Një gotë normale me lëng të nxjerrë nga një sasi e barabartë karrotash dhe portokallesh ku mund të shtoni edhe pak panxhar përmban 85 përqind e dozës së rekomanduar ditore të kësaj vitamine për femrat dhe 71 përqind për meshkujt.

Vitamina C forcon prodhimin e kolagjenit dhe ndihmon në prodhimin e energjisë.
Vitamina A
Një racion i lëngut të karrotës dhe portokallit është një burim i shkëlqyer i vitaminës A.

Në çdo gotë do të gjeni përafërsisht 508 përqind të dozës së rekomanduar për meshkujt dhe 652 përqind të asaj të rekomanduar për femrat.

Vitamina A ndihmon në zhvillimin e indeve, ruan shëndetin e sistemit imunitar, qelizat e kuqe të gjakut dhe lëkurën.

Kjo vitaminë mbështet funksionet e retinës së syrit dhe përmirëson shikimin.
Folati
Lëngu i karrotës dhe portokallit ofron folat, ose vitaminën B-9 që ndihmon në metabolizmin e acideve nukleike dhe amino acideve, përbërës që janë pjesë e ADN-së dhe proteinës.

Një dietë e pasur me folat e bën jetën tuaj më të gjatë.

Folati mbron kundër difekteve në lindje dhe komplikimeve të tjera tek femrat shtatzënë.

Një gotë normale me lëng karrote dhe portokalli përmban 146 mikrogram folat ose 37 përqind të dozës së rekomanduar ditore.
Vlera të tjera

Pirja e lëngut të karrotës dhe portokallit ofron ushqyes të tjerë të dobishëm për qarkullimin e gjakut. Ky lëng përmban 732 miligramë kalium, ose 16 përqind të dozës së rekomanduar ditore.

Kaliumi ul tensionin e gjakut dhe ndjeshmërinë ndaj ndikimit të kripës në rritjen e tensionit.
Jeni në kërkim të një recete të thjeshtë dhe të shijshme të cilën mund ta ndani me të gjithë familjen?
Karrotat dhe portokallet, në sasi të barabarta, funksionojnë mirë së bashku dhe janë një burim i shkëlqyer i vitaminës C e cila ndihmon organizmin të përthithë më mirë hekurin.

Të dyja ofrojnë beta karoten që kthehet në vitaminë A dhe ju ndhmon të keni një paraqitje rinore nëpërmjet sasive të larta të kolagjenit dhe sistemit të fuqizuar imunitar.
Përbërësit:
• 2 Karrota
• 2 Portokalle

Qërojini portokallet dhe shtoni të gjithë përbërësit e tjerë në shtrydhësen e frutave.
Receta e lëngut të karrotës, portokallit dhe xhenxhefilit
Koha e nevojshme: 5 minuta
Racionet: 2
Përbërësit
• 6 karrota
• 1 portokall
• 1 copë xhenxhefil
• 1 kastravec nëse dëshironi
Udhëzimet
Pasi keni qëruar portokallet dhe larë karrotat, shtoni të gjithë përbërësit në shtrydhësen e frutave.

Nëse dëshironi mund të qëroni edhe kastravecin dhe xhenxhefilin. Përzijeni lëngun dhe pijeni menjëherë që të mos lejoni oksidimin e tij.

Pisipilia është padyshim ndër gatimet më speciale në kuzhinën shqiptare.

E përgatitur me kombinime të ndryshme mbushjesh, me djathë a me gjizë, me kos, qumësht e vezë, spinaq e hithra, apo kunguj e qepë domate, shija e tij në të gjitha variantet mbetet e papërshkrueshme.

Një recetë që mahnit çdo turist të huaj që provon kuzhinën tradicionale shqiptare e që sigurisht nuk mungon në tryezat shqiptare.

Më poshtë recetën fantastike të përgatitjes së pispilisë me qepë të njoma krejt lehtë në shtëpi.

Një gatim special që të kujton jo vetëm shijen e mirë dhe të nxit dëshirën për ta konsumuar sa më parë, por edhe të sjell ndërmend atmosferën në shtëpi kur ai gatuhet nga duart e nënës apo gjyshes.

Pispili me qepë të njoma është një alternativë fantastike për tu konsumuar në çdo kohë të ditës.

Ajo shoqërohet me kos, dhallë e djathë, sallata të freskëta të stinës, turshi e zahire të ndryshme të kuzhinës shqiptare.
Përgatitja e Lakrorit me Qepë të Njoma në Shtëpi
Përbërësit
1 kg qepë të njoma

1 filxhan çaji vaj ulliri

4 filxhanë çaji miell misri

1 kokërr vezë

2 lugë gjelle djathë i thërmuarr

Kopër ose nenexhik
Përgatitja
Qepët e njoma lahen mirë dhe grihen hollë. Kaurdisen në një enë të mbyllur, sa të zbuten.

Kur hiqen nga zjarri, të shtoni edhe një fetë djathë të bardhë të thërrmuar, kripë, vezë, kopër ose nenexhik.

Përzjerja lihet të zjejë derisa të ngelet me pak lëng.

Në një tenxhere hidhet më tepër se gjysma e miellit të misrit.

Shtohet ujë i nxehtë, kripë, vaj uliri dhe përgatitet një brumë i derdhur.

Brumi hidhet në një tavë të lyer me pak vaj.

Mbi të hedhim masën e qepëve të njoma dhe mbulohen me një shtresë mielli misri (hidhet me anë të sitës apo me anë të dorës).

Spërkatet me qumësht ose ujë që të njomet mielli.

Në fund spërkatet me disa pika vaj ulliri apo gjalpë të freskët dhe futet të piqet në furrë derisa të marrë një ngjyrë të kuqërremtë

Pasta Flora është një ndër ëmbëlsirat më të preferuara të shqiptarëve.

E thjeshtë për t’u përgatitur, fantastike për t’u shijuar me një filxhan kafeje apo çaji në çdo kohë të ditës.

Është ëmbëlsira ideale për të pritur miqtë dhe për të ëmbëlsuar më të dashurit në familje.

Kjo ëmbëlsirë është shndërruar tashmë në një traditë të kuzhinës shqiptare.

Pasta Flora në fakt është një tartë e përbërë nga një petë brumi e shkrifët e mbushur me reçelra të ndryshëm.

Shija e kësaj ëmbëlsire është si ajo e një biskote të shkrifët të kombinuar me reçel.

Përgatitja e kësaj ëmbëlsire do të shtonte edhe më shumë atmosferën duke e shijuar në familje apo mes miqsh.

Më poshtë receta tipike të përgatitjes së pastës Flora në shtëpi.
Përgatitja e Pastës Flora në Shtëpi
Përbërësit
2 gota ujë me miell

5 lugë gjelle sheqer

2 filxhanë kafeje margarinë

1 kokërr vezë

Gjysmë luge kafeje me sodë

5 lugë gjelle me kos

Një tas mesatar me reçel (lloji i reçelit zgjidhet sipas preferencës)
Përgatitja
Në një tas të madh rrahim si fillim vezën, më pas shtojmë sheqerin dhe sodën, i përzjejmë dhe shtojmë kosin.

Vijojmë përzjerjen derisa masa është bërë homogjene.

Në vijim, masën e përgatitur e shtojmë nga pak tek mielli që kemi vendosur në një tas dhe përgatisim brumin me dorë.

Pasi brumi është shndërruar në një masë të njëtrajtshme e hapim në tavolinën e punës në formën e një pete të trashë, e cila nuk duhet të jetë më e trashë se një centimetër.

Para se të hapim petën kujdesemi që mënjanë të lëmë një masë brumi më vete, të cilën do ta përdorim për shiritat që do vendosim mbi tartë.

Petën e përgatitur e vendosim në një tavë. Sipër saj shtrojmë masën e reçelit. Në fund marrim brumin që kemi lënë mënjanë, e ndajmë në shirita të hollë dhe e vendosim në formën e rombave (si në foto) mbi reçelin që kemi shtruar.

Shiritat nëse dëshironi mund t’i lyeni me vezë me ndihmën e një furçe kuzhine.

Piqet në furrë, derisa shiritat e sipërm të marrin ngjyrë të artë në të kuqërremtë përreth 40 minuta.

Pritet në pjesë dhe serviret kur është e ftohtë

Një vizitë në Prizren, Pejë apo Prishtinë nuk mund të imagjinohet pa shijen e mrekullueshme të pleskavicës.

Një lloj qofteje e madhe hamburgeri e pjekur në skarë që shoqërohet  me pite, djathë, salca picante, patate të skuqura, spec djegës, sallatë dhe kastraveca turshi.

Ky lloj hamburgeri i përhapur gjërësisht në mbarë Ballkanin konsiderohet një konkurent superior dhe më i shëndetshëm se çdo lloj panine tjetër e mbushur që serviret në rrjetet e famshme të vendeve perëndimore.

Pleskavica është një qofte e madhe me mish viçi e shtypur me dorë dhe e pjekur në skarë.

Atë mund ta gjeni në çdo restorant apo shtëpi të Kosovës.

E mira e këtij ushqimi është se nuk gjen dy pleskavica të njëjta.

Secila prej tyre është e ndryshme dhe e përshtatshme me dëshirën dhe preferencën e atij që e gatuan, ajo mund të jetë e mbushur me djathë kaçkavall ose pa asgjë.

Ndonjëherë, pleskavica përmban edhe kërpudha.

Ajo konsiderohet  një ushqim i shpejtë, por mund të serviret edhe në restorantet më ekskluzive.

Së fundmi, Pleskavica ka fituar shumë popullaritet edhe në vendet e Evropës dhe serviret në disa restorante në Gjermani, Angli dhe Zvicër.
Receta e Pleskavicës
Përbërësit:
500 gramë mish të grirë viçi ose lope

1 qepë e grirë hollë

2 thelpinj hudhër

1 lugë çaji me piper të kuq pluhur

Kripë dhe piper të zi

Pite rrumbullake për servirje

Vaj, nëse do ta gatuani në tigan dhe jo në skarë
Përgatitja
Merrni një enë të thellë dhe përzieni mishin e grirë, qepët, hudhrën, piperin e kuq, të zi dhe kripën.

Përzierjen duhet ta bëni me dorë në mënyrë që ajo të jetë sa më e plotë dhe e njëtrajtshme.

Enën mbulojeni me letër kuzhine dhe mbajeni në frigorifer për disa orë.

Kur të jeni gati për ta gatuar, atëherë mbushni një enë tjetër me ujë që të mbani duart e lagura sa herë që t’i jepni formë mishit.

Duart e lagura parandalojnë edhe ngjitjen e mishit nëpër duar.

Merrni mish në pëllëmbë të dorës dhe jepini formën rrumbullake e të sheshtë.

Trashësia e qoftes duhet të jetë maksimumi 0.5 cm.

Vendosini qoftet e mëdha në një tepsi, mbulojini me një letër transparente dhe vendosini në frigorifer për një orë.

Nëse do të përdorni skarën apo tiganin, pleskavicat kërkojnë një gatim të shkurtër me nga 5 minuta për secilën anë.

Temperatura nuk duhet të jetë shumë e lartë që mishi të mos digjet dhe në brendësi të jetë i pagatuar.

Pasi qoftet të jenë pjekur, hapini pitet në dysh me një thikë dhe mbushini me turshi, qepë, speca dhe qoften e gatuar.

Sipas preferencës mund të shtoni edhe djathë, e patate të skuqura.