Kulinari

Një ëmbëlsirë fantastike, e cila të magjeps e të përfshin tërësisht me shijen e saj.

Kërkon pak durim në përgatitje por rezultati i saj do t’ju kënaqë menjëherë nepsin dhe oreksin.

Ja receta unike të përgatitjes së suflesë me çokollatë në shtëpi. Një mënyrë fantastike për të ëmbëlsuar veten dhe më të dashurit tuaj.
Përgatitja e Suflesë me Çokollatë
(Përbërësit më poshtë janë për 6-7 persona)

150 gr çokollatë e zezë

120 gr gjalpë i freskët

120 gr sheqer pluhur

3 kokrra vezë

2 lugë gjelle me majë me miell gruri

1 lugë çaji me vanilje

Gjysmë luge kafeje me kripë
Përgatitja
Në një tenxhere ose në procesin e njohur si banjo mari, shkrijmë çokollatën e zezë bashkë me gjalpin dhe e lëmë derisa masa të bëhet kremoze dhe e lëmë mënjanë.

Në një tas të thellë rrahim vezët, më pas shtojmë kripën, sheqerin pluhur dhe më pas miellin.

Në fund, pasi i përziejmë të gjitha shtojmë vaniljen.

E përziejmë të gjithë masën mirë në mënyrë që të mos mbeten kokërriza.

Pasi masa të jetë bërë tërësisht kremoze shtojmë çokollatën e shkrirë me gjalpë dhe e përziejmë mire në mënyrë që brumi të bëhet homogjen.

Më pas, masën e shtojmë në tasat e aluminit, në mungesë të tyre mund të përdorni kupa qelqi zjarr duruese.

Duhet të bëni kujdes kur të mbushni tasat me brumin e përgatitur, mbushja duhet të jetë në masën e ¾ e tasit.

Futini për t’i pjekur në furrën e parangrohur në 180 gradë celcius.

Lërini të piqen për maksimumi 15 minuta derisa sipërfaqja e suflesë të ngurtësohet pak. Më pas largojini menjëherë nga furra në mënyrë që çokollata brenda ëmbëlsirës të qendrojë e shkrifët.
Kombinimi i Suflesë me Fruta dhe Akullore
Megjithëse është fantastike edhe pa u shoqëruar me të tjerë përbërës, sufleja me çokollatë kombinohet në mënyrë fantastike me fruta të ndryshme.

Ajo mund të serviret me feta frutash të freskëta, siç janë luleshtrydhet, mollët apo edhe bananet.

Ose mund të përgatisni një miks frutash dhe të servirni disa prej tyre bashkë me suflenë e çokollatës.

Sufleja shoqërohet në mënyrë të shkëlqyer edhe me akullore me shije të ndryshme.

Kadaifi është një ëmbëlsirë që shqiptarët e konsumojnë shumë për festa dhe jo vetëm.

Kjo ëmbëlsirë me origjinë turke është përvetsuar në traditën tonë dhe pasuruar me elemëntë të kulturës shqiptare duke u bërë një ëmbëlsirë mjaft e shijshme, nga ato që të ngelet në mend

Nëse ballkavaja ka nderin të serviret vetëm gjatë Vitit të Ri, kadaifi fijehollë nuk ka nevojë për justifikim.

Atë amvisat e përgatisin sa herë të kenë dëshirë për vetë faktin se bëhet shumë lehtë.

Kadaifi përgatitet nga mielli dhe uji, por sipas preferencës pasurohet me gjalpë, arra, fistik e çokollatë.

Ai piqet duke marrë një ngjyrë të artë dhe më pas përzihet me shërbetin duke u zbutur dhe marrë një shije për të lëpirë gishtat.

Zakonisht, kadaifi përgatitet në tepsi dhe ndahet në feta të vogla katrore.

Kjo është metoda tradicionale por Agroweb.org do t’ju mësojë edhe një mënyrë interesante për servirjen e kadaifit në toptha të vegjël të mbushur me shumë ëmbëlsi.
Kadaif i Mbushur me Çokollatë
Mbushja e kadaifit nuk kërkon shumë mund.

Ajo mund të bëhet në dy mënyra: me duar duke i dhënë kadaifit formën e topthit ose duke përdorur filxhan çaji.

Nëse zgjidhni këtë të fundit, ju rekomandojmë të mbushni gjysmën e filxhanit me fije kadaifi të përziera me gjalpë të shkrirë, më pas shtoni arrat dhe pjesën tjetër mbusheni sërish me kadaif.

Arrat kombinojini me çokollatë të shkrirë për një shije më superiore.

Shtypeni kadaifin mirë që të zëjë formë dhe më pas kthejeni filxhanin përmbys mbi një tepsi të lyer me pak gjalpë.

Nëse nuk ju shkon për shtat kjo metodë, mund të përdorni duart dhe t’i jepni kadaifit formën që dëshironi.

Shërbeti është një tjetër element i rëndësishëm i ëmbëlsirës. Ai duhet të jetë i ngrohtë në mënyrë që të përthithet më mirë nga kadaifi.
Receta Tradicionale e Kadaifit me Arra
Përbërësit

180 gramë kadaif
90 gramë gjalpë të shkrirë dhe të vakët

Për shërbetin

2 gota me ujë
100 gramë sheqer
1 lugë gjelle me lëng limoni

Për mbushjen

60 gramë arra të copëtuara

Udhëzimet

Përzieni sheqerin me ujin. Vendoseni tenxheren në zjarr dhe lëreni të marrë një valë.

Më pas uleni temperaturën dhe zijeni për 15 minuta. Shtoni lëngun e limonit dhe prisni 3 minuta përpara se ta hiqni tenxheren nga zjarri.

Ndizeni furrën në 180C. Hidheni kadaifin në enë shtoni gjalpin dhe përzijini me dorë që të garantoni një lyerje gjithëpërfshirëse të fijeve.

Merrni një filxhan kafeje ose çaji dhe mbusheni gjysmën me kadaifin.

Shtoni pak arra dhe më pas sërish kadaif. Shtypeni me duar dhe vendoseni kokëposhtë në një tepsi të lyer me pak gjalpë.

Vazhdoni me rradhë deri sa të jetë mbushur tepsia.

Futeni në furrë dhe piqini kadaifët e mbushur deri sa të marrin ngjyrë të artë. Hidheni shurupin e ftohtë menjëherë sapo ta keni nxjerrë nga furra.

Mbulojeni mirë dhe lëreni kadaifin të përthithë shërbetin për 1-2 orë. Përpara se ta servirni, hidhni pak pluhur kanelle sipër nëse preferoni.

Qeshqeku është padyshim një suvenir në mesin e recetave autentike të kuzhinës shqiptare.

Fantastik në shije dhe krejt unik në përbërës dhe përgatitje, ky specialitet tipik shqiptar mbetet ndër pjatat më të përsosura të traditës.

Dikur, Qeshqeku përgatitej në raste të veçanta festash familjare apo kur shtëpinë e vizitonin miq e të afërm.

Servirja e Qeshqekut në tryezë ishte një nga mënyrat fantastike përmes së cilës të zotët e shtëpisë nderonin me mikpritjen e tyre miqtë.

Sot, kjo pjatë gjendet si një ndër gatimet më të çmuara tradicionale pjesë e menuve të restoranteve tradicionalë.

Përgatitja e Qeshqekut kërkon durim dhe mbi të gjitha mjeshtërinë e amvisave në mënyrë që shija e tij të dalë vërtetë perfekte.
Përgatitja e Qeshqekut me Pulë dhe Grurë
Përbërësit
1 pulë e majme 1 kg

2 filxhan çaji me grurë

3 lugë gjelle me gjalpë të freskët

Për një gatim më të shëndetshëm, AgroWeb.org ju sugjeron përdorimin e vajit të ullirit.

Gjysmë filxhan çaji me arra të thërrmuara

Kripë

Piper i zi

2-3 lugë me rrush të thatë (sipas preferencës)
Përgatitja
Si fillim, pastrojmë me ujë të rrjedhshëm pulën.

E ndajmë në copa, e vendosim në një tenxhere me ujë dhe kripë dhe e lëmë të ziejë.

Lihet që të ziejë sa të zbutet mishi.

Lëngun e pulës ruajeni mënjanë sepse do përdoret për përgatitjen e grurit.

Nëse preferoni pulën mund ta fusni dhe ta piqni edhe në furrë, duke e kriposur, lyer me pak gjalpë dhe duke i hedhur 1 gotë e gjysmë ujë.

Edhe në këtë rast mundohuni që të lini mënjanë disa lugë gjelle nga lëngu i pulës.

Ndërkohë përgatisim grurin. E pastrojmë me ujë të bollshëm dhe më pas e kulloj

Para nisjes së përgatitjes së kësaj recete gurin ta vendosni në një tas me ujë dhe ta lini përreth dy orë në mënyrë që të zbutet më shpejt.

Më pas, shtypeni grurin përmes një çekani kuzhine (rrahës mishi).

Vendoseni në një tenxhere me 700 ml -1l ujë dhe vendoseni në zjarr derisa gruri të ziejë.

Në momentin që gruri ka zierë dhe masa është trashur shtoni arrat, pak nga lëngu i pulës, gjalpin e freskët, kripën dhe piperin e zi.

Salcën e përftuar e vendosni në një pjatancë të madhe, sipër i hidhni pak rrush të thatë si dhe pulën e pjekur ose thelat e mishit të saj.

Të shijshme, të lehta, të ëmbla e të kripura, krepa ka rrëmbyer zemrat e gjithë shqiptarëve me shijen e tyre fantastike.

Me mjaltë, çokokrem apo reçel, kombinuar me feta bananesh, biskota, arra e lajthi të thërmuarra. Me djathë të bardhë a kaçkaval, domate, kastraveca e sallatë jeshile.

Janë të panumërta mënyrat e kombinimit të krepave dhe shijes fantastike që ato ofrojnë në çdo kombinim.

Krepat janë ideale për një mëngjes të shëndetshëm, të shijshëm që të bën ta nisësh ditën me humor të mirë, por ato janë ideale gjithashtu edhe për t’u konsumuar në vaktet e ndërmjetme.

Më poshtë keni një recetë të thjeshtë fantastike në përgatitjen e krepave në shtëpi.
Përgatitja e Krepave në Shtëpi
Përbërësit
500 ml qumësht

3 kokrra vezë

Kripë

250 gr miell

50 gr gjalpë
Përgatitja
Hedhim në një tas të madh miellin dhe pak kripë.

I përzjejmë bashkë e më pas nisim të hedhim nga pak qumështin duke trazuar pa ndërprerje brumin.

Pasi kemi hedhur gjithë qumështin e brumi ka marrë formë të njëtrajtshme hedhim vezët e rrahura.

Përzjejmë mirë masën derisa të bëhet homogjene.

Më pas, tek masa e përgatitur shtojmë gjalpin të cilin e kemi shkrirë më parë.

Duhet të bëni kujdes që gjalpin e shkrirë të mos e hidhni të nxehtë.

Trazojini mirë të gjithë, derisa të keni arritur një masë të njëtrajtshme dhe të lëngshme.

Më pas vendosni një tigan që nuk ngjit në zjarr. Përmes një furçe kuzhine lyejeni me pak gjalpë.

Hidhni në qendër të tiganit një garuzhde me brumin e krepave dhe me ndihmën e garuzhdes hapeni brumin në formën e petës në të gjithë sipërfaqen e tiganit.

Lëreni të piqet për 2 minuta dhe me pas kthejeni nga ana tjetër, lëreni dhe dy minuta që të piqet.

Vijoni kështu me të gjitha krepat derisa të mbarojë brumi i përgatitur.

Mbushja e krepave bëhet sipas preferencave.

Mund të mbushet me djathë të bardhë, domate e kastraveca, djathë kaçkavall e ton peshku e gjithashtu për krepa të ëmbla mund të përdorni mjaltë, çokokrem apo reçel të kombinuar me biskota e lajthi të thërmuara