Arsim

Të gjithë ata që dëshirojnë të vazhdojnë studimet në një nga programet e ciklit të parë bachelor, në një nga degët me karakter profesional apo në një nga programet e integruara master, duhet të zhvillojnë konkurset e pranimit në muajin gusht.

Në datat 30 korrik – 04 gusht 2018 do të kryhet aplikimi për studimet në IAL, nëpërmjet formularit online në portalin U-Albania. Aplikimi mund të bëhet kudo, mjafton të keni akses në internet.

Aplikimi kryhet nga maturantë/kandidatë të cilët:

Janë pajisur me dokumentacionin ligjor të perfundimit të arsimit të mesëm.

Plotësojne kriterin e notës mesatare sipas VKM (nota 6 për të gjitha degët dhe 7 për degët e mësuesisë). Nëse keni notë mesatare më ulët se 6, iu sygjerojmë disa programe studimi 2-vjeçare  Plotësojnë kriteret e përcaktuara nga Universitetet

Nuk rezultojnë të regjistruar në një program tjetër studimi, me përjashtim të nxënësve dhe studentëve të shkëlqyer.

Maturantët/kandidatët përpara aplikimit duhet të paguajnë tarifën prej dy mijë lekë të reja në zyrat e Postës ose në Bankat e Nivelit të dytë brenda datave 5 Qershor – 15 Korrik 2018, nëpërmjet faturës që e shkarkojnë në portalin U-Albania. Mandatin duhet dorëzuar në shkollë.

Aplikantët duhet të zgjedhin deri në 10 programe studimi përfshirë këtu programet në universitetet publike ose jopublike. Nëse nuk plotësohet kushti i notës mesatare sipas VKM, aplikimi nuk do të pranohet.

Sipas udhëzimit të ministrisë së Arsimit, në datën 10 gusht  do të afishohen listat me emrat e aplikantëve në institucionet e arsimit të lartë që zhvillojnë konkurse.

Kështu, pas datës 23 gusht 2018, IAL-të mund të shkarkojnë nga portali “U-Albania”, për çdo program studimi të ofruar nga ana e tyre listën e aplikantëve që kanë përzgjedhur ato programe studimi, notat e të gjitha viteve të shkollës së mesme, rezultatet e provimeve të Maturës Shtetërore, mesataren e të gjitha viteve të shkollës së mesme, mesataren e provimeve të Maturës Shtetërore, mesataren e përgjithshme, indekset e profileve të shkollave të mesme.

Më tej, të gjitha IAL-të, duke përfshirë edhe ato që zhvillojnë konkurse/testime, pas kryerjes së përllogaritjes së pikëve për çdo konkurrent, sipas kritereve të pranimit të përcaktuara nga IAL-ja me vendim senati, si dhe renditjes së tyre në varësi të pikëve të grumbulluara, do të afishojnë në mjediset publike, si dhe në faqen e saj zyrtare listat e renditjes.

Pas fituesit të fundit vendoset vija e kuqe, në varësi të kuotave të ofruara për programin përkatës të studimit. Brenda datës 28 gusht 2018 të gjitha IAL-të, duke përfshirë edhe ato që zhvillojnë konkurse/testime, do të afishojnë dhe publikojnë listat e renditjes së aplikantëve, duke përdorur si element identifikimi vetëm ID-në e tyre, në mënyrë që të respektohen përcaktimet e kuadrit ligjor për mbrojtjen e të dhënave personale.

Brenda datës 28 gusht 2018, IAL-të do të ngarkojnë një kopje elektronike të këtyre listave në portalin “U-Albania”. Gjithashtu, brenda datës 28 gusht 2018, IAL-të i përcjellin zyrtarisht një kopje elektronike të këtyre listave QSHA-së.

Ndërkohë, kandidatët që do të aplikojnë për t’u pranuar në programet e studimeve dyvjeçare me karakter profesional nuk kanë detyrimin të plotësojnë kriterin e notës mesatare.

Aplikanti, pasi ka bërë regjistrimin me dokumentacion dhe ka nënshkruar në regjistër, ka të drejtë të çregjistrohet vetëm në datën 13 shtator 2018.

Ai mund të paraqesë një kërkesë për çregjistrim pranë sekretarisë mësimore të fakultetit ku është regjistruar, duke tërhequr dokumentet e dorëzuara. Nëse nuk e kryen këtë veprim brenda kësaj date, ai nuk ka të drejtë ta ndryshojë programin e studimit për këtë vit akademik.

Çregjistrimi kryhet në portalin ‘U-Albania’ nga sekretaria mësimore e fakultetit. “Sekretaritë mësimore pas çregjistrimit të aplikantëve dhe dorëzimit të dokumentacionit, i dërgojnë QSHA-së dhe RASH-së, brenda datës 14 shtator 2018 listën e aplikantëve të çregjistruar”,  thuhet në udhëzim.

Gjithashtu, aplikantët kanë të drejtën e ankimimit në IAL në datën 29 gusht 2018. Brenda 24 orëve nga momenti i paraqitjes së ankesave, IAL-të duhet të shprehen me vendim lidhur me ankimimet. Vendimet e IAL-ve ankimohen në gjykatën kompetente. /atsh

Disa prindër, kur dëgjojnë fëmijët e tyre që qajnë, bërtasin dhe insistojnë që t’u plotësohen kërkesat e tyre, nënshtrohen.

Por kjo nuk është zgjidhja e duhur, pasi kjo do ta fiksojë edhe më shumë këtë sjellje të fëmijës tuaj. Shkencëtarët e shpjegojnë këtë sjellje të fëmijëve si një tregues inteligjence.

Fëmija përpiqet të imponohet për të realizuar dëshirat dhe kërkesat e veta.

Prindërit duhet ta marrin me qetësi dhe të mos plotësojnë kërkesën e fëmijës pse qan apo bërtet. Duhet t’i japin të drejtë që mërzitet, por zgjidhja duhet të ndodhë pasi fëmija të pushojë të qarën apo të bërtiturën.

Prindërit duhet t’i thonë: mbaro të qarën dhe më pas flasim për të gjetur zgjidhje. Kur fëmija pushon dhe kërkesa është e plotësueshme, plotësojani duke i thënë e shikon, gjërat zgjidhen me fjalë dhe jo me të qarë.

Prindër, mos u turpëroni kur skenat ndodhin në rrugë, por ruani qetësinë dhe përsëritni shprehjen:- mbaro të qarën, unë jam këtu me ty, nuk je vetëm, përpiqu ta qetësosh veten siç e bëre dje. Ose pasi pushon, përgëzojeni duke i thënë, se radhën e shkuar t’u desh më shumë kohë për të qetësuar veten dhe të pushoje së bërtituri.

E shikon që po e mëson edhe këtë mundësi që ke për të qetësuar ti vetë veten tënde. Tek e fundit i rrituri prandaj është pranë fëmijës që ta ndihmojë të arrij vetëqetësimin ashtu siç e ka nxitur të ecë, të flasë po ashtu po i mëson të vetëqetësohet.

Kështu i mëson fëmijës të mendojë e të zgjedhë e të gjejë forcat e veta për t’ia dalë. Edhe një gjë të fundit, mos lejoni të huajt të ndërhyjnë në këtë proces ndërgjegjësimi dhe zhvillimi të fëmijës për veten, qofshin këta edhe gjyshërit. Prindërit duhet të jenë të vetëdijshëm, se vërtet e rrisin ata fëmijën, por po aq e vërtetë është, që fëmija çdo gjë e bën vetë, e përballon vetë, e mëson vetë. Dhe prindërit duhet ta vlerësojnë dhe mos ta anashkalojnë këtë të vërtetë.

Përpjekjet që fëmija bën për të ekzistuar dhe integruar në jetën njerëzore janë tejet të mëdha dhe natyrisht i duhet i rrituri për t’u mbështetur, për të kuptuar që nuk është vetëm që ka një njeri si dëshmitar që ai  ia del, që e nxit që të mësojë dhe me qetësi i ofron edhe një model sesi të jetë. Për fat të keq, të rriturit shpesh janë indiferentë ndaj përpjekjeve të fëmijës.

Mos harroni shprehjet “ku merr vesh ky”, “këta janë rehat nuk kanë halle se i kemi ne të rriturit” e me radhë nga këto shprehje të pamenduara. Kjo mënyrë tregon, ta shohësh fëmijën jo njeri, por thjesht një gjë e vogël.

Fëmija është më të shumtën e kohës, një objekt kënaqësie apo bezdie, se sa përgjegjësi dhe mision që tek e fundit, vetë e kanë zgjedhur. Të rriturit sjelljet e fëmijëve më shumë i paragjykojnë sesa i njohin dhe i kuptojnë. Më të shumtën i ndëshkojnë fëmijët, në vend që t’ua lehtësojnë konfuzionin dhe vështirësitë që përjetojnë në këtë fazë të jetës./atsh

Ministrja e Arsimit dhe Sporteve, Lindita Nikolla, e ftuar në emisionin “Kjo Javë” në News24 ditën e sotme foli për ndryshimet ligjore që do të bëhen në arsim dhe pritet të votohen të hënën në seancën plenare.

Nikolla tregoi se si nisma “Mësues për Shqipërinë” do të kthehet në ligj dhe çfarë synohet të arrihet me atë.

“Do ketë meritokraci për mësuesit. Ka plot dëshmitarë që janë punësuar falë kësaj nisme. Me reformat e ndërmarra kemi mbetur pas në dy momente kryesore për të sjellë cilësi. Deklaroj që ka dy momete që ndjehem kokëulur, që lidhen me cilësinë e mësuesit. Se nëse ka mësues të dobët në një shkollë me infrastrukturë të riparuar, nuk kthehet investimi.

Portali “Mësues për shqipërinë”, ka shërbyer si diga e parë për të nxjerrë më të mirën në gjithë këtë shumicë mësuesish.  Janë mësues shumë të mirë ata që vijnë nga portali.

Ende kemi shumë për të bërë në drejtimin e shkollës. Unë jam në mandatin e dytë dhe ende nuk kemi shkuar aty ku meritojnë fëmijët e shqiptarëve përsa i përket mësimdhënies.

Mungon një instrument i plotë që të thuash Po, ky është drejtori që do të sjellë një frymë të re për shkollën” tha Nikolla.

Mendoni se kështu do shmanget influenca e politikës me shkollat?

“Ne marrim modelet europiane dhe amerikane për të certifikuar këdo që kërkon të bëhet drejtues shkolle. Sepse drejtori nuk duhet të jetë vetëm mësuesi më i mirë, por edhe të ketë cilësi të tjera si menaxhues i mirë”.

Burimi: Balkanweb

Duket se kufiri i Shqipërisë është jashtë kontrollit të policisë.

Në këtë konkluzion dilet kur mësohet se vetëm në 24 orë, 36 refugjatë janë vetëdorëzuar dhe kapur nga policia në Tiranë e Shkodër.

Kështu thuhet në deklaratën zyrtare të Policisë së Shtetit të bërë në faqen zyrtare.

Sipas policisë, 36 refugjatë nga vende të Afrikës veriore janë shoqëruar për në ambientet e Qendrës së Pritjes në Babrru.

Në Tiranë

Më datë 14.07.2018, në DVKM Tiranë, janë paraqitur 12 shtetas të huaj 5 Irakenë, 4 Marokenë, 2 Jemenas dhe 1 Somalez, të cilët deklarojnë se më datë 11.07.2018, në afërsi të S.P.K Kakavijë, kanë hyrë ilegalisht. Në përfundim të kryerjes së procedurave kërkuan azil dhe u dërguan në QKPA, Babru Tiranë.

Në Shkodër

Më datë 14.07.2018, në Hanin e Hotit, në kufirin e gjelbër nga shërbimet e policisë kufitare u kapën 5 shtetas të huaj nga vendet e treta, të cilët tentonin të kalonin kufirin në mënyrë të paligjshme, të cilët janë shoqëruar për në Babru Tiranë në pritje të plotësmit të dokumentacionit për kthim vullnetar në vendin e origjinës.

Më datë 13.07.2018, nga shërbimet e Komisariatit të Policisë Shkodër dhe DVP Shkodër, në hyrje të  qytetit, u kapën 19 shtetas të huaj, 13 Irakenë, 5 Sirianë dhe 1 Algjerian, emigrantë të paligjshëm. Në përfundim të procedurave, u dërguan në qendrën e azilkërkuesëve në Babrru, Tiranë.

Sikurse të mos mjaftonte shqetësimi për mungesën e dëftesave, probleme nga më të ndryshmet shfaqen në shkollat e sistemit para universitar nuk kanë fund. Ministria e Arsimit nuk ka asnjë datë se kur do të bëjë gati dëftesat që këtë vit kanë një specifike ndryshe pasi nxënësve çdo notë do tu shënohet me komentin përkatës. Por shkodranews mëson se ato janë problemi më i ndjeshëm i momentit, por ndoshta jo i vetëm as më i vogli. MAS nuk ka sjellë ende as regjistrat për vitin shkollor 2018 – 2019 dhe për fat të keq duket se gjendja do të shkojë si ky vit që u mbyll, ku regjistrat u sollën në nëntor, 2 muaj pasi shkolla kishte filluar.

Mësuesit sërish do të jenë të detyruar të mbajnë fletoret si pika referimi për notat që do të vënë në shtator kur të nisë proçesi mësimor. Gjithashtu nuk është përcaktuar struktura drejtuese që çdo shkollë duhet ta ketë gati për vitin e ri shkollor. Asnjë të dhënë nuk ka drejtoria arsimore e cila deri më tani nuk i ka dhënë asnjë informacion shkollave dhe mësuesve se si do të procedojnë. Të gjithëve u ka mbetur vetëm të presin e duket se pritja do të jetë e gjatë derisa ministria të mbarojë pushimet e të kujtohet për detyrimet qe ka./korrieri

Nga Dr. Hasan Bello, historian

Në verën e vitit 1921 shoqëria Metodiste amerikane për të zgjeruar veprimtarinë e saj misionare në rajonin e Ballkanit dërgoi në Shqipëri prof.Elmer E.Jones. Ai kishte si detyrë të hartonte një raport mbi gjendjen arsimore të Shqipërisë dhe të propozonte ngritjen e institucioneve arsimore amerikane. Në mesin e nëntorit 1921 prof.Jones dorëzoi pranë drejtuesve të Bordit të Misionerëve të Jashtëm në New York raportin e detajuar. Por shuma financiare që nevojitej për zbatimin e propozimeve që parashtronte prof.Jones nuk ishte e lehtë për t`u siguruar. Megjithatë Bordi organizoi disa konferenca në qytete të ndryshme të Amerikës ku i shpjegoi besimtarëve rëndësinë e hapjes së një Universiteti Amerikan në Vlorë. Kjo do ta forconte e zgjeronte akoma më shumë aktivitetin e misionit ungjillizues në Shqipëri, duke e kthyer atë në qendër të aktivitetit të tyre fetarë për të gjith Ballkanin. Në konferencat e mbajtuara në Filadelfia, Bordi arriti të mblidhte rreth 50.000 dollarë, të cilat do të përdoreshin për hapjen dhe mbajtjen e Univeristetit Amerikan të Vlorës.

Prof.Jones kërkonte nga prefektura e Vlorës dhe qeveria shqiptare dhënien e truallit për ngritjen e universitetit. Ai propozonte si vende më të përshtatshme hapësirën e spitalit, truallin ku ndodheshin ish-kazermat e ushtrisë italiane dhe fushën e aviacionit. Ndërkoh që e njoftonte këtë prefekturë se së shpejti në Shqipëri do të vinte Peshkop Blake, një nga drejtuesit kryesor të misionit në New York dhe rektori i universitetit, të cilët do të zhvillonin takime me drejtuesit lokal. Më pas ata do të takoheshin me drejtuesit e qeverisë në për të nënshkruar marrëveshjetzyrtare për dhënien e truallit dhe hapjen e universitetit. Prof.Jones shkruante se në fillim do të vinin 6 profesorë amerikanë me familjet e tyre dhe me zgjerimin e procesit mësimorë numri i tyre do të rritej. Ai falenderonte prefektin Qazim Koculin, duke vlerësuar virtytet e kombit shqiptar, dhe bashkëshorten e tij, e cila para se të largohej drejt Amerikës i kishte qëndisur prof.Jones një flamur shqiptar.
Por ëndërra amerikane për të hapur një universitet në Vlorë, për arsye që ende nuk i dimë, përfundoi këtu. Ndoshta destabiliteti i shtetit shqiptar në këtë periudhë nuk ishte një element favorizues për të bindur drejtuesit e Bordit për këtë invenstim./faktor.al