Dukati

Presidenti Ilir Meta dha sot pëlqimin e tij për hyrjen menjëherë në fuqi, pas miratimit nga Kuvendi, të ligjit “Për eurobondin që do të emetohet nga Ministri i Financave dhe Ekonomisë, miratimin e përjashtimeve nga tatimet e taksat dhe të parashikimeve për heqjen dorë nga imuniteti, në marrëveshjet që do të lidhen”.

Në një shkresë drejtuar dje Kuvendit, Presidenti Meta komunikonte mosdhënien e pëlqimit për hyrjen në fuqi menjëherë të këtij ligji, së bashku me arsyet përkatëse.

Ditën e sotme, Presidenti tha se u njoh me sqarimet e kryetares së Komisionit për Ekonominë dhe Financat, dhe dokumentet zyrtare shtesë të paraqitura prej saj, të pavëna në dispozicion në kërkesën e parë.

“Në këtë shkresë zyrtare, Komisioni për Ekonominë dhe Financat shpjegon nevojën dhe urgjencën, si të lidhur me presionin e lartë financiar të shkaktuar pas goditjeve natyrore (tërmeti) dhe shëndetësore (pandemia Covid-19); është rishikuar titulli dhe neni 1 i projektligjit lidhur me çështjen e imunitetit; është vënë në dispozicion qëndrimi dhe vlerësimi i Bankës së Shqipërisë dhe i Avokaturës së Shtetit lidhur me këtë transaksion; është sqaruar procedura e ndjekur për përzgjedhjen e partnerëve që do të mbështesin këtë proces”, vlerëson Meta.

Gjithashtu, ai u shpreh se është informuar lidhur me faktin se, neni 3 i projektligjit, mbi autorizimin që i jepet ministrit të Shtetit për Rindërtimin, do të propozohet të hiqet në seancë plenare.

“Sa më sipër, pas vlerësimit të plotë të të gjithë praktikës dhe sqarimeve shtesë, Presidenti i Republikës jep pëlqimin e tij për hyrjen menjëherë në fuqi të ligjit, pas miratimit nga Kuvendi”, vlerëson Meta.

Nga ana tjetër, Meta theksoi se “çdo transaksion financiar duhet të paraprihet nga një analizë e gjendjes së valutës aktuale, të pritshmërisë së huadhënies për situatën emergjente të dhënë nga institucionet ndërkombëtare (FMN, BE etj.), si dhe të nevojave prioritare për të përcaktuar shumën e duhur në kohë të huamarrjes në tregun ndërkombëtar”.

Ai ritheksoi nevojën që Qeveria dhe Kuvendi, në nisma të tilla ligjvënëse, të veprojnë në kohën e duhur, në mënyrë që t’u lihet hapësira e nevojshme të gjitha strukturave apo institucioneve për shqyrtimin e tyre./atsh

– “Në tokat e Shqipërisë rriten investimet, prodhimi, eksportet, falë shumicës që flet me punë”, thekson Kryeministri Edi Rama teksa ka publikuar një video me investimet në bujqësi.

“Mirëmëngjes dhe ndërkohë që në tokat e Shqipërisë rriten investimet, prodhimi, eksportet, falë shumicës që flet me punë, ndërsa në ekrane, portale e platforma, vazhdojnë llafet si e vetmja punë, ju uroj një ditë të mbarë”, shprehet Rama.

Ndërkaq që prej datës 26 prill kanë nisur aplikimet online për subvencionet në bujqësi për vitin 2020 përmes portalit E-Albania me zero dokumente.

Në Skemën Kombëtare 2020 të mbështetjes së fermerëve janë parashikuar 743,9 milionë lekë dhe pritet të përfitojnë rreth katër mijë fermerë në të gjithë vendin.

Gjatë viteve të fundit vetëm nga skemat kombëtare kanë përfituar mbi 200 aplikantë me vlerë të financuar afërsisht mbi 49 milionë lekë./atsh

Në Ditën Ndërkombëtare të Fëmijëve, delegacioni i BE-së në Tiranë tha sot se mbështetja e fëmijëve është prioritet kryesor i BE-së.

Delegacioni i BE-së në Tiranë u shpreh se zëri i fëmijëve duhet të dëgjohet.

“Gëzuar Ditën e Fëmijëve! Ne duhet të punojmë të gjithë së bashku që zëri i tyre të dëgjohet dhe të drejtat e tyre të respektohen dhe plotësohen! Mbështetja e fëmijëve dhe të rinjve është një përparësi kryesore për Bashkimin Europian”, shprehet delegacioni i BE-së.

Po ashtu, delegacioni i BE-së sjell në kohë punën e bërë për fëmijët.

“Pas në kohë në festimin e Ditës Botërore të Fëmijëve ku fëmijë nga e gjithë Shqipëria u mblodhën në Korçë për të festuar 30-vjetorin e Konventës për të Drejtat e Fëmijëve”, shprehet delegacioni i BE-së, duke përcjellë pamjet festive. /atsh

“Të investojmë dhe të mbështesim fëmijët pa kujdes prindëror dhe të familjeve në vështirësi ekonomike, duke i përgatitur për sfidat e së ardhmes”.
Me rastin e Ditës Ndërkombëtare të Fëmijëve, Presidenti i Republikës, Ilir Meta vizitoi sot Shtëpinë e Fëmijës “Fillime të Reja” në Tiranë, ku u uroi përzemërsisht festën e tyre.

I shoqëruar nga bashkëthemeluesi i Shtëpisë së Fëmijëve, pastori i Kishës Ungjillore Paulin Vilajeti, Kreu i Shtetit u dhuroi libra dhe fletore vizatimi fëmijëve, duke theksuar se në këtë ditë feste të gjithë fëmijët, veçanërisht ata pa kujdes prindëror dhe të familjeve në vështirësi ekonomike kanë nevojë për më shumë dashuri, mbështetje, mirëkuptim, kujdes shëndetësor, edukim falas, dhe mbrojtje nga të gjitha format e shfrytëzimit.

“1 qershori i këtij viti vjen në një atmosferë shumë të ndryshme nga vitet e tjera për shkak të situatës së krijuar nga COVID-19. Në Shqipëri, mijëra fëmijë nuk frekuentojnë prej gati tri muajsh shkollat, një situatë kjo që, ka vështirësuar jetën e tyre, të prindërve dhe të mësuesve dhe ka sjellë vështirësi të mëdha sociale dhe psikologjike. Kjo situatë është më e vështirë veçanërisht për fëmijët pa kujdes prindëror, apo fëmijët e familjeve në nevojë të cilët më shumë se kurrë kanë nevojë për përkujdesje dhe mbështetje të veçantë”, vuri në dukje Presidenti Meta.

“Vlerësoj institucione të tilla si Shtëpia e Fëmijës ‘Fillime të Reja’, që në 25 vitet e punës së saj, ka ndihmuar rreth 200 fëmijë të braktisur, jetimë apo jetimë social, që vijnë nga familje me problematika të mëdha sociale apo financiare. Misioni juaj ka qenë, gjatë gjithë këtyre viteve që të ndihmojë, mbështesë e investojë te kategoria e fëmijëve me probleme të mëdha sociale, në mënyrë që të edukohen dhe dalin nga varfëria ekonomike dhe ajo shpirtërore, duke i përgatitur për sfidat e së ardhmes”, tha Meta.

“Këtyre fëmijëve iu është ofruar jo vetëm një strehë dhe edukim, por mbi të gjitha dashuri, që fatkeqësisht disa prej tyre nuk e kanë njohur më parë në jetën e tyre të re”, nënvizoi Presidenti Meta.

“Siç ka thënë Shenjtorja Nëna Tereza: ‘Varfëria më e madhe nuk është të mos kesh çfarë të hash, por të mos jesh i kërkuar, i dashur nga të tjerët; të mos kesh dikë që të kujdeset për ty. Kjo është varfëria më e madhe’. Shtëpia e Fëmijës ‘Fillime të Reja’ dhe institucionet e kujdesit social nuk mund të ndryshojnë të kaluarën e këtyre fëmijëve, por qëllimi i tyre fisnik e human është që përmes gjuhës së dashurisë të kontribuojnë e të investojnë për të ardhmen e këtyre fëmijëve, duke kontribuar në këtë mënyrë për të gjithë shoqërinë dhe të ardhmen e vendit tonë, investim për të cilin u jemi të gjithë mirënjohës”, u shpreh Presidenti Meta./atsh