Dukati

”Liria nuk konsiston në të bërit atë që na pëlqen, por të kemi të drejtën të bëjmë atë që duhet”

Aktualitet / /

Kryeministri Edi Rama ka cituar mëngjesin sotëm një shprehje nga Shën Gjon Pali II, në rubrikën “Fjalë të Shenjta”.

“Liria nuk konsiston në të bërit atë që na pëlqen, por të kemi të drejtën të bëjmë atë që duhet”, citon Rama Shën Gjon Palin II.

E gjithë bota po përballet me pandeminë ndërsa qytetarët janë të detyruar të zbatojnë rregullat dhe të ruajnë distancën për të parandaluar përhapjen e koronavirusit./atsh

”Liria nuk konsiston në të bërit atë që na pëlqen, por të kemi të drejtën të bëjmë atë që duhet” Read More »

Kur e bardha bëhet e zezë dhe s’ka asgjë në mes, mbetet vetëm një “merr e jep” shterpë mbi lirinë e medias

Politike / /

“Shqipëria është vendi me indeksin më pozitiv të lirive demokratike në Ballkanin Perëndimor”, deklaroi sot Kryeministri Edi Rama duke iu referuar Raportit të “Freedom House”.

“Kur e bardha bëhet e zezë dhe s’ka asgjë në mes, mbetet vetëm një “merr e jep” shterpë mbi lirinë e medias, që ka pa diskutim të gjithë lirinë e të drejtat të thotë ç’i vjen për mbarë dhe ankohet gjithnjë për mungesë lirie, sa herë të tjerët, përfshirë edhe mua, ushtrojnë të drejtën e tyre të kundërshtimit ndaj të pavërtetave apo gjysmë të vërtetave të saj, të cilat janë edhe gënjeshtrat më të mëdha”, thekson Rama.

“Sot një gazetar i dëshpëruar për Shqipërinë që paskej rënë teposhtë, e fundit në Ballkan sipas tij, në Raportin e “Freedom House” për lirinë, donte të dinte sa më vriste mua ndërgjegjja për këtë lajm të zi! Mirëpo ja çfarë del në fakt nga raporti që mat lirinë demokratike në 195 shtete të botës qysh prej vitit 1973: Shqipëria është vendi me indeksin më pozitiv të lirive demokratike në Ballkanin Perëndimor”, nënvizon Kryeministri.

Duke iu referuar raportit, Rama thekson se Shqipëria ka një indeks të lirisë prej 67 pikësh.

“Në krahasim me një vit më parë, Shqipëria ka një indeks të lirisë demokratike prej 67 pikësh. Serbia, vendi i dytë në klasifikimin rajonal, ka shënuar një regres të lehtë duke kaluar nga 67 në 66, një pikë poshtë Shqipërisë. Maqedonia e Veriut renditet e treta, me 63 pikë, ndërsa Mali i Zi ka pësuar rënien më të madhe në rajon, duke zbritur në 62 pikë nga 65 që kishte vitin e shkuar. Kosova mbetet e parafundit në listë, por me një progres prej dy pikësh (56 pikë nga 54 të vitit të kaluar), ndërsa Bosnja është në një stanjacion të plotë, duke qëndruar në vendnumëro, e fundit për sa i përket lirive demokratike në rajon. Në 2013-n, Serbia dhe Mali i Zi konsideroheshin vende të lira dhe jo pjesërisht të lira si tani, ndërsa Shqipëria me Bosnjë-Hercegovinën ishin vendet me renditjen më të ulët në rajon”, shprehet ai.

Kryeministri shton se “po, e vërtetë, kemi rënë me një pikë krahasuar me vjet dhe mund të kishim rënë edhe më shumë nëse klima e zjarrtë politike do të kishte djegur, largqoftë, vendin, siç ishte plani i dështuar i trazirave të vjetshme, të cilat u projektuan për t’i vënë zjarrin Shqipërisë dhe dogjën opozitën”. /atsh

Kur e bardha bëhet e zezë dhe s’ka asgjë në mes, mbetet vetëm një “merr e jep” shterpë mbi lirinë e medias Read More »

Meta dekreton 4 ligje

Politike / /

Presidenti i vendit, Ilir Meta ka dekretuar sot 4 ligje të miratuara së fundmi në parlament.

Presidenti Meta dekretoi sot shpalljen e ligjin për mbrojtjen e biodiversitetit si dhe ligjin për ndryshimet dhe shtesat në ligjin për standardizimin.

Konkretisht presidenti Meta dekretoj shpalljen e ligjit për disa ndryshime dhe shtesa në ligjin “Për mbrojtjen e biodiversitetit”, ligjin “Për ratifikimin e protokollit shtesë 6 mbi tregtinë e shërbimeve të marrëveshjes për amendimin dhe aderimin në marrëveshjen e tregtisë së lirë të Europës Qendrore” si dhe ligjin “Për ratifikimin e marrëveshjes për një hua shtesë ndërmjet Republikës së Shqipërisë dhe Fondit të Kuvajtit për zhvillimin ekonomik arab për financimin e projektit të rehabilitimit të rrugës së Lumit të Vlorës.

Gjithashtu, Presidenti dekretoi shpalljen e ligjit “Për disa ndryshime dhe shtesa në ligjin nr. “Për standardizimin”, të ndryshuar”. /atsh

Meta dekreton 4 ligje Read More »

Meta: Beteja e parë dhe e fundit e çdo presidenti është mbrojtja e Kushtetutës

Aktualitet, Politike / /

“Beteja e parë dhe e fundit e çdo presidenti është mbrojtja e Kushtetutës”, deklaroi sot Presidenti Ilir Meta.

Në një intervistë, Meta u shpreh se, “unë në çdo kohë përpiqem të bëj gjënë e duhur. T’i qëndroj fort bindjeve të mia dhe detyrës sime, pavarësisht se cila është ajo në kuptimin e institucionit që përfaqësoj. Por është e padiskutueshme që në të gjitha kohët, edhe nëse ka pasur luftë apo jo, nuk i kam zgjedhur unë: – ato kanë qenë të imponuara, – kanë vënë në diskutim bindjet e mia dhe detyrën time, ndaj edhe unë nuk u jam shmangur asnjëherë. Pra gjithmonë unë kam qenë një kërkues i bashkëpunimit, në respekt të Kushtetutës, në përmbushje të objektivave të integrimit evropian të vendit, të çështjeve më madhore”.

Meta theksoi se, “kjo është beteja për mbrojtjen e Kushtetutës që është beteja e parë dhe e fundit e çdo Presidenti për sa kohë ai është në detyrë”.

I pyetur nëse është kjo beteja më e fortë në të gjithë karrierën e tij, Meta tha se, “nuk e di, se nuk mendoj që jemi në fund të karrierës, kështu që… Do të dëshiroja që të ishte e fundit në kuptimin e rivendosjes së normalitet kushtetues, ligjor, politik, ekonomik, shoqëror në vend, sepse kur bëhet fjalë për betejën për mbrojtjen e Kushtetutës, nuk bëhet fjalë thjesht për të mbrojtur një dokument, por bëhet fjalë për të mbrojtur të gjitha liritë dhe të drejtat e qytetarëve shqiptarë, cenimi i të cilave i detyron ata që të zbrazin vendin tonë siç praktikisht ka ndodhur dhe po ndodh”.

I pyetur mbi sjelljen e tij nga protesta e 2 marsit, Meta tha se, “ne duhet të jemi në koherencë me të gjitha zhvillimet dhe me të gjithë sfondin e ngjarjeve, ku kanë ndodhur edhe qëndrimet apo sjelljet politike që mund të duken jo shumë koherente, ndërkohë që koherenca jam i sigurt që është e plotë, ndërkohë sikurse është përgjegjshmëria në adresimin e sfidave më të mëdha”.

“Me vendosjen e gjendjes së situatës së jashtëzakonshme, sikurse është kjo situatë për shkak të pandemisë, padyshim që përballimi në një mënyrë sa më mbarëvajtëse dhe bashkëpunuese të kësaj situate, ka qenë dhe mbetet detyra më kryesore e të gjithëve mendoj unë, jo vetëm e Presidentit të Republikës, jo vetëm e qeverisë që padyshim ka më shumë detyra, duke përfaqësuar tërësisht ekzekutivin, por edhe e opozitës, edhe të gjithë grupeve të interesit dhe vetë qytetarëve”, theksoi Meta.

“Kështu që sjelljet e mia duhen parë gjithmonë në këtë kontekst, të interesit më të mirë të përbashkët për ta tejkaluar këtë situatë dhe gjithmonë unë kam bërë thirrje që edhe në këtë situatë duhet të ruajmë ligjshmërinë, duhet të respektojmë kushtetutshmërinë, sepse Kushtetuta jonë i ka parashikuar edhe këto raste të jashtëzakonshme, të veçanta, në mënyrë që të ruajmë edhe shëndetin e qytetarëve, por edhe një balancë me ruajtjen dhe mbrojtjen e lirive të tyre, pavarësisht se disa prej tyre edhe mund të kufizohen, pikërisht për të mbrojtur shëndetin e tyre”, u shpreh Meta.

I pyetur se çfarë do të ndodhë pas kërkesës së paraqitur Këshillit të Lartë Gjyqësor për ndërprerjen e mandatit të Ardian Dvoranit, Meta tha se, “se çfarë do të ndodhë, kjo është diçka tjetër që nuk varet vetëm nga unë. Së pari duhet të keni parasysh konsideratën në qoftë se e keni lexuar të plotë kërkesën që Institucioni i Presidentit i ka bërë Këshillit të Lartë Gjyqësor, por jo vetëm atij, por edhe Gjykatës së Lartë, Kuvendit të Shqipërisë, Gjykatës Kushtetuese”.

“Është e qartë se mandati i zotit Dvorani ka përfunduar që prej shtatë vitesh, kur kryetari i Gjykatës së Lartë i asaj kohe i ka dërguar njoftimin zyrtar Presidenti të Republikës së asaj kohe, zotit Nishani për përfundimin e mandatit të tij dhe për zëvendësimin e tij. Bazuar mbi këtë akt, Presidenti Nishani konform Kushtetutës ka propozuar emrin e një gjyqtari tjetër për të zëvendësuar pikërisht zotin Dvorani”, theksoi Meta.

“Kjo gjë nuk ka ndodhur, sepse në atë kohë Kuvendi nuk e ka miratuar gjyqtarin tjetër. Dhe për shkak të shumë arsyeve të tjera që janë aty në letër, si dhe për faktin që Gjykata e Lartë u zbraz dhe mbeti vetëm me një anëtar në detyrë, por që i kishte përfunduar mandati, kemi këtë situatë të paprecedentë ndoshta në të gjithë kontinentin tonë, por menjëherë me zgjedhjen e të parit anëtar të Gjykatës së Lartë dhe dekretimin e tij, mandati i tij është në çdo aspekt i shuar apo i përfunduar, nga ana kushtetuese, ligjore, morale, justifikuese, e kështu me radhë”, u shpreh Meta.

“Për më tepër, të mos harrojmë se nuk është një, por kemi tre anëtarë të Gjykatës së Lartë. Kështu që për mua kjo është një çështje tepër e qartë dhe e shteruar në mënyrë tepër objektive në letrën që unë u kam dërguar KLGJ-së dhe institucioneve të tjera”, nënvizoi Meta.

I pyetur se si i përgjigjet atyre që thonë se largimi i Dvoranit është pjesë e marrëveshjes me zotin Rama, Presidenti Meta tha se, “zero marrëveshje, nga ana ime në respektin e Kushtetutës, të ligjeve! Dhe sidomos të Kushtetutës, sepse ajo është mbi çdo ligj dhe për fat të keq ne kemi nxjerrë gjatë kësaj kohe mjaft ligje që dalin mbi Kushtetutën dhe që është një çmenduri! Është sikur në ushtri të dalë një kapter mbi gjeneralin! Apo në diplomaci që një atashe ambasade të dalë mbi ambasadorin, sepse kështu është e ndërtuar e gjithë arkitektura e shtetit ligjor”.

“Megjithatë, këto gjëra, për fat të keq këto gjëra kanë ndodhur në vendin tonë dhe ne kemi mjaft probleme në funksionimin e shtetit ligjor, sepse ka humbur respekti mbi Kushtetutën. Kushtetuta është mbi çdo gjë, edhe mbi gjithçka. Kështu që nuk ekziston dhe nuk ka asnjë arsye që të ketë një marrëveshje mbi këtë gjë, sepse këto janë çështje që zgjidhen nga vetë Kushtetuta, dhe ligjet në respekt të Kushtetutës, jo në dhunim të Kushtetutës, sepse secili duhet të bëjë detyrën e tij”, përfundoi Meta./atsh

Meta: Beteja e parë dhe e fundit e çdo presidenti është mbrojtja e Kushtetutës Read More »

Rama komentuesve: Jeni padiskutim më të vështirë në debat se ata që ju përfaqësojnë në mexhelis, Grupi 7X7=42

Debat, Politike / /

Kryeministri Edi Rama iu drejtua sot komentuesve në rrjetet e tij sociale duke theksuar se “nuk ka asgjë personale me askënd, thjesht debatoj, pa dorashka, me ata që sulmojnë e shpeshherë shajnë e fyejnë pa frena fare”.

“Miq. Kush nga ju ka menduar se e kam fyer në replikat e mia këtu, ndjesë! Nuk është kurrë ky qëllimi dhe as arsyeja pse unë replikoj me ju në këtë faqe, qofshin edhe urrejtësit e mi më të mëdhenj ata që kundërshtoj! Unë s’kam kurrësesi asgjë personale me askënd, thjesht debatoj, pa dorashka, me ata që sulmojnë e shpeshherë shajnë e fyejnë pa frena fare, se përndryshe pse na duhet kjo faqe! Disa thonë që tallem, por jo, kurrësesi, përndryshe nuk do harxhoja asnjë sekondë me replika e me bam e bume këtu…”, tha Rama.

Disa thonë, vijoi ai, “s’bëjnë kryeministrat kështu, por jo, unë vërtetë jam përkohësisht kryeministër, por s’kam qenë e s’do jem asnjëherë asgjë tjetër përveçse ai që kam qenë dhe ky që jam”.

Rama tha se “ka dhe disa demokratikas të paepur, që kujtojnë se bëjnë lufte politike me mua këtu e shajnë e nuk pushojnë, mendim ndryshe thonë, por jo, sharja s’është mendim fare apo jo?!”

“Megjithatë as ata s’dua t’i bëj të ndjehen keq! Në asnjë mënyrë! Debati me tërheq shumë dhe të ma bëjnë hallall, kur s’e kam dot me ata që demokratikasit e kësaj faqeje votojnë, sepse janë pa lidhje të votuarit e tyre, s’kam me kë e bëj tjetër përveçse me ta direkt debatin politik – meqë ra llafi, jeni padiskutim më të vështirë në debat se ata që ju përfaqësojnë në mexhelis, Grupi 7X7=42 e kam llafin. Nejse, s’po e zgjas më tutje. Përqafime pa parti”, tha Kryeministri./atsh

Rama komentuesve: Jeni padiskutim më të vështirë në debat se ata që ju përfaqësojnë në mexhelis, Grupi 7X7=42 Read More »

Ballkani e fitoi betejën kundër COVID-19

Aktualitet / /

Në përgjithësi, vendet e Ballkanit e fituan betejën kundër pandemisë COVID-19, ndërsa parashikime të caktuara tregojnë se vala epidemike duhet të përfundojë deri në fund të majit ose në fillim të qershorit, tha në një intervistë Dragan Danilovski, epidemiolog dhe shef i Institutit të Epidemiologjisë dhe Biostatikës me Informatikë Mjekësore në Fakultetin e Mjekësisë, pranë Universitetit “Shën Cirili dhe Metodi” në Shkup.

Prof. Dr. Danilovski, i cili ka qenë edhe ish-ministër i Shëndetësisë në Maqedoninë e Veriut, iu përgjigj pyetjeve për mënyrën se si në vendet e rajonit numri i personave të infektuar dhe të vdekur me llojin e ri të koronavirusit (COVID-19) është më i ulët se vendet më të mëdha të Europës Perëndimore, për parashikimet në lidhje me përhapjen e virusit në rajon dhe në botë, por edhe për përvojat e marra nga njerëzimi në trajtimin e “armikut të padukshëm” të quajtur koronavirus.

Në lidhje me pyetjen pse në vendet e Ballkanit numri i personave të infektuar me COVID-19 dhe vdekjet ishin më të ulëta se në vendet e tjera më të mëdha dhe më të zhvilluara në botë, Daniloski shpjegon se treguesi më real i dinamikës së pandemisë nuk është numri i të infektuarve, por numri i vdekjeve, sepse numri i të infektuarve varet nga numri i personave të testuar.

Ballkani, vaksinimet e detyrueshme si avantazh në luftën kundër COVID-19

Sipas mendimit të tij, një nga arsyet e shkallës së ulët të vdekshmërisë të shkaktuar nga COVID-19 në vendet e rajonit mund të jetë fakti që të gjitha vendet e Ballkanit 30 vjet më parë kishin sisteme të centralizuara shëndetësore, në të cilat vaksinimet e popullatës ishin të detyrueshme kundër shumë sëmundjeve infektive.

Në të njëjtën kohë, ai shtoi se vendet e pasura të Evropës Perëndimore dhe SHBA kanë sisteme shëndetësore relativisht liberale, dhe në shumicën e rasteve vaksinimet nuk janë të detyrueshme.

“Në këtë kontekst u shfaqën supozime interesante, se të gjitha popullatat në të cilat vaksinat kundër tuberkulozit (BCG) ose poliomielitit ishin të detyrueshme, tani kanë shkallë më të ulëta si të pacientëve të infektuar, ashtu edhe të vdekur nga COVID-19. Mund të jetë kështu”, tha Danilovski.

Ai shtoi se një arsye e mundshme është fakti se masat kufizuese të përcaktuara janë teknikisht më të lehta për t’u zbatuar dhe kontrolluar në vendet e vogla, siç është Ballkani, sesa në vendet me popullsi të madhe.

“Flaka nuk u shndërrua në stuhi zjarri”

Prof. Dr. Danilovski është i mendimit se qëllimi kryesor në luftën kundër koronavirusit është arritur duke mos tejkaluar kapacitetin e sistemit shëndetësor në vend.

“Përkundër të gjitha ‘papërsosmërive’ në zbatimin e masave kufizuese (për shembull, mbyllja jo në kohën e duhur e kufijve, vonesat në masën e mbajtjes së detyrueshme të maskave, etj.), unë ende mendoj se ne të gjithë kemi arritur qëllimin themelor, dhe kjo është nivelizimi i kurbës së epidemisë, në mënyrë që të mos tejkalohet kapaciteti i sistemit shëndetësor. Flaka nuk u shndërrua në stuhi zjarri”, tha ai.

Lidhur me parashikimet e tij në lidhje me përhapjen e virusit dhe situatën që ai nuk pret në vend, në rajon, por edhe globalisht, prof. dr. Danilovski thotë se epidemia duhet të përfundojë deri në fund të majit ose fillim të qershorit.

“Përafërsisht të tilla janë parashikimet për rajonin, por edhe për botën. Akoma nuk dihet si do të ecin punët në Afrikë. Atje duket se pandemia është në fillim. Meqenëse nuk e njohim virusin sa duhet, nuk mund të supozojmë me siguri se si do të sillet më tej”, tha ai.

Vaksina si shpresa më e mirë për imunitetin kolektiv

Aktualisht ka tre momente të panjohura kur bëhet fjalë për koronavirusin. Secila nga këta faktorë do të ndikojë në infektivitetin e ardhshëm të sëmundjes.

“Ne ende nuk e dimë nëse koronavirusi do të bëhet sezonal, si gripi, apo do të jetë konstant gjatë gjithë vitit. Ne nuk e dimë si do të jetë mutacioni i koronavirusit me kalimin e kohës. Viruset që shkaktojnë ndikimin e gripit ndryshojnë vazhdimisht, kështu që njerëzit kanë nevojë për vaksinime vjetore. Do të shohim se çfarë ndodh me këtë koronavirus. Ai me siguri pëson mutacion me një ritëm më të ngadaltë dhe nëse vazhdon të qarkullojë, do të shohim se çfarë ndryshime janë shkaktuar. Pyetja është se çfarë do të bëjnë këto ndryshime: a do ta bëjnë ata virusin më të mirë në shmangien e sistemit tonë imunitar apo mbase do të bartet më lehtë?”, tha Danilovski.

“Ne nuk e dimë se sa kohë ata që janë të infektuar janë imunë. Disa viruse të tjerë në familjen e koronavirusit, siç janë ato që shkaktojnë ftohjen e zakonshme, sigurojnë vetëm imunitet për rreth tre muaj. Vlerësohet se duhet të jemi imunë ndaj koronavirusit për të paktën një vit, ndoshta dy, në mënyrë që popullata të ndërtojë imunitet kolektiv. Nëse nuk ndodhë kjo, shpresa jonë më e mirë për imunitet kolektiv është vaksina”, shton Danilovski.

“Kufizimet duhet të hiqen së shpejti”

Sipas Danilovskit, tashmë janë krijuar kushte për relaksim të pjesshëm të masave kufizuese, sepse, siç thotë ai, “numri bazë riprodhues i virusit që nga 15 prilli është në nivelin nën 1.0, por kjo nuk do të thotë që ne mund të relaksohemi”.

“Mund shumë e lehtë të vijë deri te rikthimi i problemit. Derisa të arrihet pragu i imunitetit kolektiv prej 60 për qind ose të vihet në dispozicion një vaksinë kundër COVID-19, do të duhet të mësohemi të jetojmë një jetë të re normale, madje edhe kur të hiqen kufizimet. Do të jetojmë me virusin pranë nesh, duke iu përmbajtur rregullave të reja të sjelljes që do të zvogëlojnë shanset për transmetimin e virusit”, shprehut epidemiologu.

Me kalimin e kohës prof. Dr Danilovski thotë se është e pashmangshme që sistemi imunitar gradualisht të rritet.

”Masat kurrë nuk duhet të shkaktojnë më shumë dëme sesa shkaku i tyre”, theksoi ai.

“Leksion nga kriza: Mësuam përsëri të jemi njerëz”

Nga kriza e shkaktuar nga pandemia COVID-19, sipas Danilovskit, njerëzimi ka mësuar shumë gjëra, ndër të tjera se “bota është bërë një fshat global”.

Siç thekson ai, ne kemi mësuar se cilat janë pikat e forta dhe të dobëta të sistemit të mbrojtjes nga fatkeqësitë masive në vend.

Sipas tij, njerëzit kanë mësuar se çka duhet të ndryshojë brenda sistemit, çka mund të përmirësojmë dhe çka mund të hedhim poshtë.

“Ne kemi mësuar se suksesi në trajtimin e një pandemie, në përgjithësi, nuk varet aspak nga niveli i zhvillimit, pasuria e vendeve. Ne mësuam se pa marrë parasysh sa efektive janë masat shtrënguese, gjithmonë do të ketë njerëz të pakënaqur. Mësuam se përballë një kërcënimi të përbashkët, na duhet vetëm unitet, pavarësisht nga dallimet politike, fetare apo të tjera. Mësuam se sa e lehtë është të bëhesh viktimë e një armiku të padukshëm. Mësuam se cilët ishin egoistët e maskuar mes nesh dhe cilët ishin miq të vërtetë. Mësuam se sa e rëndësishme ishte të marrësh pak ajër të pastër dhe stërvitje. Mësuam të jemi përsëri me familjen. Mësuam të lexonim. Mësuam përsëri të jemi njerëz”, përfundon epidemiologu i njohur maqedonas, Danilovski./atsh

Ballkani e fitoi betejën kundër COVID-19 Read More »

Shqipëria një prej alternativave më të mira për turizëm

Turizem / /

Ndërsa udhëtimet drejt disa prej destinacioneve më të preferuara në juglindje të detit Mesdhe nuk janë më të sigurta, njerëzit kërkojnë një alternativë më të mirë dhe shumica vendosin të vizitojnë Shqipërinë dhe ne e mbështesim shumë këtë ide, shkruan faqja e njohur polake e udhëtimeve turistike, www.mywanderlust.pl.

Bregdeti shqiptar është i mrekullueshëm dhe plazhi i Kasmili është tashmë një thesar i njohur në botë, por ky vend ka shumë më shumë për të ofruar. Aty ndodhen disa nga vendet më të bukura të Ballkanit.

Qytete të bukura prej guri, peizazhe të mrekullueshme natyrore, male fantastike dhe një kryeqytet të këndshëm. Nëse vizitoni Shqipërinë, mund t’i shihni të gjitha këto.

Tirana

Kryeqyteti, Tirana është jashtëzakonisht i lezetshëm dhe i këndshëm.

Tirana nuk është qyteti më i bukur dhe nuk do të gjeni shumë monumente historike. Por, atmosfera që ka, është një nga më të mirat,.

Pika kryesore turistike e Tiranës është një piramidë e madhe betoni, një strukturë mjaft intriguese që tashmë shërben si qendër transmetuese e stacionit televiziv vendas dhe vendi ku rinia del më së shumti.

Dhe kështu është Tirana, e çuditshme, por magjepsëse. Edhe shumëngjyrëshe.

Edhe pse boja zbehet dalëngadalë nga ndërtesat dhe ngjyrat veniten, përshtypja e përgjithshme është ende e shkëlqyer.

Tirana dhe veçanërisht Blloku, është shtëpia e një prej kulturave më të mira të kafeneve dhe kjo është një arsye e mirë për të kaluar ca kohë atje.

Berati

Nuk mund të kërkosh prezantim më të mirë sesa Berati, pasi ai është në listën e UNESCO-s.

Qyteti shpesh quhet “qyteti i një mbi një dritareve” dhe e ka këtë titull për një arsye.

Shtëpi të shumta, të bukura me grumbull dritaresh të mëdha mbi njëra-tjetrën, duke formuar një pamje të veçantë.

Është veçanërisht i bukur kur shihet nga shëtitorja ose nga përtej lumit.

Gjithashtu, ia vlen të ngjiteni në kështjellë pasi pamjet e Beratit dhe rrethinave janë vërtet spektakolare dhe vetë kjo zonë është shumë e bukur.

Gjirokastra

Ndërsa Berati quhet qyteti i një mbi një dritareve, Gjirokastra ka titullin e qytetit të 1 000 shkallëve.

Shëtitja përreth mund të jetë pak e lodhshme, pasi rrugët bëhen mjaft të pjerrëta, por pamjet nga kështjella dhe avioni i braktisur, që duket aq i rastësishëm, janë shpërblimi i shkëlqyeshëm për përpjekjen.

Vetë Gjirokastra është një qytet i bukur me gurë, që duket se koha ka ndaluar.

Ashtu si edhe Berati, Gjirokastra është pjesë e Listës së Trashëgimisë Botërore të UNESCO-s.

Ksamili

Një thesar i vërtetë në bregdetin shqiptar. Ksamili konsiderohet te jetë një nga plazhet më të bukura në Shqipëri. Uji i kaltër, plazhet me rërë dhe ishujt përreth, e bëjnë Ksamilin të duket si parajsë.

Butrinti

Vetëm pesë kilometra larg nga Ksamili, gjendet Butrinti, një tjetër vend i mbrojtur nga UNESCO.

Ky vend antik, që daton në shekullin e VIII para Krishtit, është magjepsës dhe me kaq shumë objekte nga e kaluara, saqë për disa orë do ju mbajë të zënë.

Mund të popullohet me turistë nga Korfuzi, por nuk është e vështirë të shpëtosh nga turmat.

Nëse ju pëlqen historia, do e dashuroni këtë vend.

Saranda

Fillimisht duket si një rezort turistik jo tërheqës, me asgjë përveç ndërtimeve, por Saranda është shumë më interesante nga çfarë duket.

Nëse jeni në kërkim të një destinacioni me shumë gjallëri, kjo është pergjigjja për ju.

Por, qyteti është shumë më tepër sesa thjesht një vend në të cilin mund të kalosh bukur. Në Sarandë ndodhen disa monumente, duke përfshirë dhe rrënoja antike që gjenden në mes të qytetit.

Gjithashtu Saranda shërben si bazë perfekte për të vizituar zonën, ku përfshihet Ksamili, Butrinti, Gjirokastra dhe Syri i Kaltër.

Pogradec

Liqeni i Ohrit është një nga vendet më të bukura në Ballkan.

Ndërsa shumë turistë shkojnë në qytetin e Ohrit në Maqedoni, Pogradeci në anën shqiptare të kufirit është gjithashtu një vend i mrekullueshëm për t’u vizituar.

Me male madhështore në sfond, liqeni këtu duket shumë bukur. Restorantet janë një mundësi e shkëlqyer për drekë me pamje mahnitëse.

Nëse dilni për shëtitje përgjatë plazhit, që është një nga aktivitetet kryesore në Pogradec, sigurisht që do të ecni nëpër disa bunkerë që gjenden përreth.

Liqeni i Komanit

Disa e quajnë si më të bukurin në botë dhe duke qenë se jemi pak skeptike për tituj të tillë, ky vend me të vërtetë duket i mahnitshëm në foto.

Me gjithë shkëmbinjtë dhe ujëvarat duket i ngjashëm me fiordet norvegjeze.

Valbona dhe Thethi

Këto janë dy nga fshatrat malorë më të rëndësishëm dhe më të bukur në Shqipëri, të gjendura në të dy anët e Alpeve Shqiptare.

Kruja

Kruja është e përsosur për udhëtim njëditor nga Tirana.

Kështjella atje, ndodhet në një vend vërtet mbresëlënës, e rrethuar nga male, por arsyeja kryesore pse mund të dëshironi të vizitoni Krujën është pazari.

Konsiderohet të jetë më i miri në Shqipëri për suvenire.

Kruja është gjithashtu vendlindja e heroit kombëtar, Skënderbeut./atsh

Shqipëria një prej alternativave më të mira për turizëm Read More »

Provimet e maturës/Shahini-nxënësve: Do të jeni plotësisht të informuar, tri javë për përgatitje

Arsim, Lajmi i fundit / /

Ministrja e Arsimit, Sportit dhe Rinisë, Besa Shahini ka deklaruar se nxënësit që duan të vijojnë konsultat online pas 18-majit dhe nuk duan të vijojnë në klasë, do të mund të vijojnë nga shtëpia.

Përmes një videomesazhi, Shahini ka sqaruar se nga data 4 maj do të jetë Rozana Vrapi, Drejtore e Qendrës së Shërbimeve Arsimore që do informojë mbi detajet e provimeve të maturës.

“Nga data 4 maj Rozana Vrapi, Drejtore e Qendrës së Shërbimeve arsimore çdo ditë do ju informoj mbi detaje të ndryshme për provimet e maturës, jo vetëm për përmbajtjen e testit, por dhe për elementë të administrimit, që do të jeni plotësisht të informuar përpara se të bëni provimin. Paralelisht Akademi.al ka xhiruar pyetje dhe zgjidhje të detyrave për provimet kryesore në matematikë dhe shkenca, do transmetohen në RTSH. Sivjet do jeni më të përgatitur si kurrë më parë për provimet e maturës”,- tha Shahini.

“Kthimi në shkollë nuk është i detyrueshëm, por dyert janë të hapura për maturantët që duan të kenë konsultim në klasë. Nëse mendoni dhe keni besim se ia dilni edhe pa konsultat mund të vijoni nga shtëpia gjatë kësaj kohe e të punoni individualisht dhe duhet të lajmëroni Drejtorinë e shkollës para datës 11 maj me qëllim që të planifikojnë uljen e nxënësve nëpër klasa dhe distancimin social”,- thekson Shahini.

Lidhur me nxënësit që ndodhen jashtë vendit, Shahini tha se “më datë 11 maj është e mundur të merret një vendim për hapjen ose jo të kufijve, nëse s’kemi një vendim deri atëherë do merremi me ju individualisht, nëse hapen kufijtë s’do keni problem të vini. Për çfarë do arsye nuk do të ktheheni përpara 18 majit, do vijojmë punën përmes mësimit online dhe në qershor do jeni gati për të dhënë provimet e maturës”,- tha Shahini.

“Jo nuk do ketë nevojë të punohet të shtunë e të diel. Do jenë tri javë për përgatitje për maturën shtetërore dhe do të mjaftojë koha e paracaktuar. Fatkeqësisht sivjet s’do ketë mbrëmje mature, pasi nuk mundësojnë distancimin social. Do gjenden forma të tjera për të festuar”,- tha ministrja Shahini. /atsh

Provimet e maturës/Shahini-nxënësve: Do të jeni plotësisht të informuar, tri javë për përgatitje Read More »