Dukati

Tirana nderon “Heroin e Popullit”/ Busti i Selam Musait vendoset te Komuna e Parisit

Aktualitet / /

Në 100-vjetorin e Luftës Kombëtare të Vlorës, busti i një prej figurave më të shquara të saj, “Heroit të Popullit” Selam Musai (Salaria), u vendos pranë rrethrrotullimit te Komuna e Parisit. Zbulimi i bustit të heroit u bë në një ceremoni të posaçme, ku morën pjesë Kryetari i Kuvendit, Gramoz Ruçi, Kryetari i bashkisë së Tiranës, Erion Veliaj, Ministri i Diasporës, Pandeli Majko, e mjaft personalitete të tjera.

Në fjalën e tij përshëndetëse, kryebashkiaku Veliaj tha se kjo është mënyra më e mirë për të kujtuar edhe 100-vjetorin e Tiranës kryeqytet. “Të presim Selam Musanë në Tiranë pas 100 vitesh është mënyra më e mirë për të kujtuar edhe 100-vjetorin e Tiranës kryeqytet. Kemi shumë nevojë të flasim për modernizimin, për integrimin, sesi do të ecim përpara, por një popull që nuk e di nga ka ardhur, nuk di as ku do tëshkojë. Teksa sot përballemi me situata si pandemia apo rindërtimi i shtëpive pas tërmetit, lipset tëkujtojmë se kemi mbërritur këtu falë betejave të vazhdueshme”, deklaroi ai.

Veliaj shtoi se vepra e Selam Musait, ndonëse në moshë të madhe, tregoi se asnjëherë nuk është vonë për t’i shërbyer kombit. “Asnjëherë nuk është vonë për t’i shërbyer vendit tënd. Selam Musai, në moshën 63-vjeçare, tregoi se kurrë nuk është vonë për të kontribuuar, edhe në qofsh burrë në moshë. Kemi mjaftueshëm shembuj se pavarësisht moshës, askush nuk është shumë i ri apo shumë i vjetër për t’i shërbyer Tiranës, Shqipërisë dhe Atdheut tonë, kurdo kur jemi thirrur të shërbejmë”, u shpreh ai.

Veliaj nënvizoi se Tirana do të vijojë nderimin e figurave historike, që kanë lënë gjurmë në ndërtimin e shtetit shqiptar. Pas bustit të Selam Musait, Bashkia e Tiranës do të vazhdojë me një tjetër projekt, atë të bustit dhe të përmendores së Ismail Qemalit.

Deputeti i PS, Pandeli Majko falenderoi kryebashkiakun Veliaj dhe kryeparlamentarin Ruçi për angazhimin dhe nderin që i bëjnë Njësisë 5, ku jeton një komunitet i rëndësishëm nga Vlora.“Jemi shumë të nderuar që kjo figurë e Labërisë, simbol i rezistencës sëpopullit shqiptar, do të jetë nëNjësinë 5. Ai i tregoi botës dhe opinionit ndërkombëtar se shqiptarët dinë të luftojnë”, tha Majko.

Kryetari i Kuvendit, Gramoz Ruçi, dhe personalitetet shtetërore të pranishëm në këtë ceremoni vendosën kurora e buqeta me lule pranë monumentit të Heroit të Popullit Selam Musai Salaria.

Ceremonia e zhvillua nga Shoqata Kulturore Atdhetare “Labëria”, bashkia e Tiranës dhe Muzeu Historik Kombëtar, me rastin e 100 vjetorit të Luftës së Vlorës dhe rënies së Heroit. Selam Musai vjen nga një familje me tradita patriotike dhe ishte udhëheqës i kryengritjeve në Vlorë dhe ra heroikisht për çlirimin e saj. /atsh

Tirana nderon “Heroin e Popullit”/ Busti i Selam Musait vendoset te Komuna e Parisit Read More »

Restaurohet piktura murale në Xhaminë e Et’hem Beut, Margariti: Një arsye më shumë për të vizituar këtë monument të rrallë

Aktualitet, Art-Kulture / /

Pas një pune disamujore ka përfunduar restaurimi i pikturës murale në Xhaminë e Et’hem Beut, në Tiranë.

Lajmin e bëri të ditur sot ministrja e Kulturës, Elva Margariti, e cila deklaroi se “kjo është një arsye më shumë për të vizituar këtë monument të rrallë”.

“Pas heqjes së skelerisë ka dalë në dritë piktura e mrekullueshme murale e Xhamisë së Et’hem Beut, në Tiranë. Një punë disamujore, që kërkon përqendrim e vullnet, e realizuar në mbi 300 metra katrorë sipërfaqe nga grupi i palodhur i restauratorëve Andi Spahia, Fatmir Carkanji (ndihmësrestaurator) nën drejtimin e Adrian Çenes”, tha Margariti.

Xhamia e Et’hem Beut në Tiranë, po i nënshtrohet një ndërhyrjeje tërësore, financuar nga Agjencia Turke e Bashkëpunimit dhe Koordinimit, TIKA.

Xhamia e Haxhi Et’hem Beut, është një xhami e ndërtuar në Shqipëri nga Mulla Beu, nga Petrela, rreth fundit të shekullit të tetëmbëdhjetë.

Mbi derën e parë të xhamisë edhe sot e kësaj dite gjendet një rrasë, në të cilën vërtetohet që kjo xhami u ndërtua nga Mulla Beu, një njëri i pasur tiranas, i cili me qëllim bamirësie i hodhi themelet e para të kësaj xhamie më 1791,/atsh

Restaurohet piktura murale në Xhaminë e Et’hem Beut, Margariti: Një arsye më shumë për të vizituar këtë monument të rrallë Read More »

42 raste të reja, rritet edhe numri i të shtruarve në Spitalin Infektiv

Lajmi i fundit, Shendetesi / /

Sot është shënuar dita me numrin më të lartë të rasteve të reja të prekur nga COVID-19. Në 24 orët e fundit janë kryer 311 testime nga të cilat janë konfirmuar 42 raste pozitive, përkatësisht, 21 raste në Tiranë, 9 në Shkodër, 4 në Durrës, 3 në Krujë, 2 në Lushnjë, dhe nga 1 rast në Pukë, Berat dhe Ura Vajgurore.

Marjeta Dervishi nga Instituti i Shëndetit Publik bëri të ditur sot se “rastet e konfirmuara janë kontakte të rasteve pozitive por edhe shumë raste të reja që janë në hetim në Durrës, Berat, Pukë, Shkodër. Rastet e Krujës janë qytetarë të cilët kanë marrë pjesë në një ceremoni mortore, ndaj ju bëjmë thirrje edhe njëherë që të shmangni grumbullimet masive në mënyrë që të parandalojmë përhapjen e virusit”.

“Në 24 orët e fundit janë testuar dhe ritestuar 80 personel shëndetësor dhe kanë rezultuar të prekur 5 persona, ndërsa janë shëruar 8 mjekë dhe infermiere. Vetëm në 24 orët e fundit janë referuar në spitalet infektiv dhe “Shefqet Ndroqi” 9 pacientë të dyshuar të cilët janë konfirmuar pozitivë dhe janë shtruar në Spitalin infektiv, ku vijon të rritet numri i të shtruarve, kryesisht nga Tirana”, – theksoi Dervishi.

Sipas saj, aktualisht janë 46 të shtruar pozitivë me Covid19.

“Është rritur numri i pacientëve që kanë nevojë për terapi intensive. 8 prej të shtruarve janë në terapi intensive, njëri prej tyre në intubim. Ndërsa një pacient ka dalë nga intubimi falë punës së stafit mjekësor të spitalit infektiv”.

“Numri i rasteve të rritura në ditën e fundit e ka vendosur sistemin shëndetësor në gatishmëri të shtuar, por në të njëjtën kohë është edhe një apel për të gjithë qytetarët për të qenë bashkëpunëtorë në këtë betejë duke respektuar rregullat, duke ruajtur distancën nga njëri tjetri, duke mbajtur maskat në ambientet e mbyllura ku nuk është e mundur të ruhet distanca, duke ruajtur higjienën personale, duke ruajtur veten dhe të tjetër në mënyrë që të kufizojmë sa më shumë që të jetë e mundur përhapjen e COVID-19”, tha Dervishi.

Ajo beri apel qytetarëve të mos neglizhojnë asnjë shenjë të sëmundjes.

Në rast se ju apo një i afërm i juaji keni shenja klinike të Covid19, telefononi në numrin e Urgjencës Kombëtare, 127

COVID-19 – Statistika (10 Qershor 2020)
Testime totale 19271
Raste pozitive 1341
Raste të shëruara 980
Raste Aktive 327
Humbje jete 34 (Qarku Tiranë 21, Durrës 6, Fier 3, Vlorë 1, Shkodër 2, Kukës 1)
Shpërndarja gjeografike e rasteve aktive është si vijon:
Tiranë 205
Shkodër 38
Krujë 27
Kamëz 19
Durrës 14
Mat 9
Lushnje 6
Tropojë 2
Korçë 1
Librazhd 1
Mallakastër 1
Lezhë 1
Pukë 1
Berat 1
Ura Vajgurore 1/atsh

42 raste të reja, rritet edhe numri i të shtruarve në Spitalin Infektiv Read More »

Pas personelit shëndetësor, testit serologjik do i nënshtrohen efektivët e Policisë së Shtetit

Shendetesi / /

Shefja e Epidemiologjisë në Institutin e Shëndetit Publik, Eugena Tomini deklaroi sot se pas personelit shëndetësor, testit serologjik do i nënshtrohen efektivët e Policisë së Shtetit.

Gjatë një interviste në media, Tomini u shpreh se të dhënat që janë raportuar nga 2300 testime serologjike në personelin shëndetësor treguan se kemi një përqindje pozitivitet deri në 7%.

“Në mbi 2300 testime në personelin, vetëm 7% e tyre kanë rezultuar të përballur me COVID- 19, kanë prezencë të antikorpeve. Pjesa tjetër nuk është përballur që do të thotë që nuk ka patur kontakt ose kanë respektuar masat e përkujdesit shëndetësor për parandalimin e prekjes”, tha Tomini.

Tomini deklaroi se strategjia e testimit serologjik është të shtrihet fillimisht në grupet që janë më të ekspozuara dhe më pas edhe te popullata e gjerë.

“Strategjia është fokusuar në dy grupe kryesore, personeli shëndetësor si linjë e parë dhe personeli i policisë së shtetit. Do të jetë ky grup i dytë i riskut për tu vlerësuar për prezencë të imunitetit apo antikorpeve përkundrejt përballjes me COVID. Tendenca është për tu shtrirë edhe në popullatën e gjerë. Taskforca e ka vlerësuar një mundësi të tillë për të krijuar një kampion të caktuar”, u shpreh Tomini.

Lidhur me rastet në rritje të individëve të prekur me COVID-19, Tomini u shpreh se kjo lidhet me heqjen e kufizimeve dhe me mosrespektimin e masave nga ana e qytetarëve.

“Distancimi fizik nuk është respektuar. Mbajtja e maskës dhe dorezave në ambiente të mbyllura si dhe higjienës personale duhet të respektohet maksimalisht”, tha Tomini./atsh

Pas personelit shëndetësor, testit serologjik do i nënshtrohen efektivët e Policisë së Shtetit Read More »

Basha, takim me sipërmarrësit e vegjël: Së bashku me qytetarët do të sjellim ndryshimin

Aktualitet, Politike / /

Kryetari i PD-së Lulzim Basha ka zhvilluar sot takime me sipërmarrësit e vegjël në Njësinë Administrative Nr. 11 në Tiranë.

Basha shprehet se gjatë takimeve ka ndarë me ta shqetësimet për krizën e thellë ekonomike që ka prekur shqiptarët, e në veçanti biznesin e vogël, që po mbyll dyert çdo ditë.

“Rritja e çmimeve, rënia e fuqisë blerëse, pagesat e larta dhe afrofe të dritave dhe të ujit, papunësia në rritje, mungesa e mbështetjes nga qeveria po e çojnë biznesin e vogël në këtë zonë drejt falimentit. Rreth 60 biznese ulin qepenat çdo ditë dhe familjeve të tyre u shterojnë mundësitë për të mbijetuar”, tha ai.

Në vijim, Basha tha se “kjo krizë e thellë ka vetëm një zgjidhje: Kthimin e vëmendjes tek qytetarët, duke u dhënë atyre një qeverisje normale. Askush nuk pret më asgjë të mirë nga kjo qeveri që ka dëshmuar në 7 vite se prioriteti i saj nuk janë qytetarët dhe biznesi i ndershëm, por një grusht njerëzish që grabisin çdo të mirë të këtij vendi”.

“Së bashku me qytetarët do të sjellim ndryshimin në këtë vend e do të ndërtojmë një qeverisje normale, që të garantojë ringritjen ekonomike, vende pune e një jetë më të mirë për çdo shqiptar”, theksoi ai. /atsh

Basha, takim me sipërmarrësit e vegjël: Së bashku me qytetarët do të sjellim ndryshimin Read More »

PS, garante e Reformës në Drejtësi në Shqipëri

Aktualitet, Politike / /

“Unë dhe Partia Socialiste jemi të vetmit garantë të Reformës në Drejtësi në Shqipëri”, deklaroi sot në mbrëmje Kryeministri Edi Rama.

Në një lidhje direkte me një studio televizive, Rama iu përgjigj pyetjes lidhur me deklaratën e pak kohëve më parë të ambasadores së SHBA-së në Tiranë, Yuri Kim e cila foli për “një marrëveshje të fshehtë për të vrarë Reformën në Drejtësi”.

“Jo nuk kam asnjë koment, sepse mendoj se për sa më përket mua dhe për sa i përket Partisë Socialiste qysh në ditën e parë që është diskutuar për ta marrë këtë reformë dhe deri sot, unë dhe PS jemi të vetmit garantë të kësaj reforme, nuk ka asnjë garant tjetër në Shqipëri”, tha Rama.

Kryeministri komentoi edhe publikimin e mesazheve me një diplomat të huaj nga ana e Presidentit të Republikës, lidhur me çështjen e emërimeve në Gjykatën Kushtetuese.

Rama u shpreh sot se “bërja e mesazheve publike është një shëmti e madhe për çdokënd dhe jo më për kreun e shtetit që komunikon me një diplomat të nivelit të lartë”.

“Shëmti që ndodh vetëm në Shqipëri, askund tjetër nuk ndodh”, tha ai.

“Nuk kuptoj ku qëndron problemi në atë mesazh, sepse bëhej fjalë për të votuar në Kuvend, jo për të shtrembëruar apo deformuar kuadrin ligjor. Bëhej fjalë për votimin dhe qëndrimin politik të shumicës që unë drejtoj në raport me një çështje të caktuar që interpretohej në mënyra të ndryshme nga palë të ndryshme”, tha Rama./atsh

PS, garante e Reformës në Drejtësi në Shqipëri Read More »

“Dekorata e Artë e Shqiponjës” për kolonelin veteran Myfit Guxholli

Aktualitet, Lajmi i fundit / /

Presidenti i Republikës, Ilir Meta vlerësoi sot kolonelin veteran Myfit Guxholli me “Dekoratën e Artë të Shqiponjës”, me motivacion: “Për veprimtarinë e shquar si luftëtar i lirisë në Luftën Antifashiste Nacionalçlirimtare, si dhe për kontributin e tij të veçantë në krijimin dhe konsolidimin e artit të luftës dhe shkencës topografike ushtarake shqiptare. Në vlerësim të mbrojtjes dhe mbajtjes gjallë të idealit atdhetar në drejtim të Organizatës së Bashkuar të Veteranëve të L.A.N.Ç.-it”.

Në ceremoninë solemne të organizuar me këtë rast, duke iu drejtuar të pranishmëve mes të cilëve ishin veteranë të LANÇ-it, drejtues dhe anëtarë të Organizatës së Bashkuar të Veteranëve dhe pjesëtarë të familjes Guxholli, Presidenti Meta u shpreh se “Kolonel Guxholli, një ish-student i Liceut të Korçës, në momentet më të vështira dhe të errëta për vendin, i shtyrë nga atdhedashuria dha një kontribut patriotik, u bashkua me armë në dorë në Luftën e lavdishme Nacionalçlirimtare duke shërbyer edhe si kuadër i forumeve më të larta të Brigadës IV Sulmuese.

“Si një ndër pedagogët më të shquar dhe Shef Katedre në Shkollën e Lartë të Bashkuar të Oficerëve Tiranë, dhe tani si kryetar i Organizatës të Bashkuar të Veteranëve të LANÇ, kontributi dhe puna e kolonel Guxhollit në shërbim të vendit është e jashtëzakonshme dhe tejet e vyer”, theksoi Meta.

“Më lejoni të shpreh konsideratën time më të lartë edhe për kontributin tuaj në modernizimin dhe konsolidimin e Ushtrisë Shqiptare. Është i njohur kontributi juaj si kryetopograf, shef seksioni dhe nënkryetar i degës së Topografisë pranë Shtabit të Përgjithshëm të Ushtrisë Shqiptare; si bashkautor, së bashku me specialistët e huaj në projektimin e zbatimin në praktikë, në terren të triangulacionit shtetëror (arshiva IGU/ 1954); si pedagog, shef cikli dhe shef i katedrës së topografisë, në Shkollën e Bashkuar të Oficerëve”, tha Meta.

“Por sot, unë dua të vlerësoj edhe aktivitetin tuaj të pasur shkencor e pedagogjik, si autor i tekstit mësimor ‘Gjeodezia’ të përshtatur për studentët e specialitetit ‘topograf’ në Akademinë ‘Skënderbej’, por dhe për studentë të tjerë të specialiteteve të ndryshme që studiojnë gjeodezinë në këtë Akademi. Këto janë një trashëgimi e çmuar që zënë vend nderi në analet e historikut të Forcave tona të Armatosura”, nënvizoi Presidenti Meta.

Duke e falenderuar Presidentin Meta për vlerësimin, Kolonel Myfit Guxholli në fjalën e tij përshëndese theksoi ndër të tjera se, “kjo Dekoratë e lartë i takon të gjithë atij brezi që e nisi jetën nga lufta për të kontribuar për çlirimin e Atdheut dhe përparimin e tij”./atsh

“Dekorata e Artë e Shqiponjës” për kolonelin veteran Myfit Guxholli Read More »

Ministria e Shëndetësisë: 17 raste të reja, shkon në 1263 numri i të prekurve

Lajmi i fundit, Shendetesi / /

Ministria e Shëndetësisë dhe Mbrojtjes Sociale informoi se brenda 24 orëve të fundit janë identifikuar pozitivë më COVID-19, 17 raste të reja.

Shefja e Epidemiologjisë pranë Institutit të Shëndetit Publik, Eugena Tomini u shpreh se “bazuar në të dhënat epidemiologjike, trendin e evidentimit të rasteve pozitive dhe të totalit të testimeve gjatë javës që lamë pas, kemi një paraqitje te qëndrueshme të situatës së epidemisë në vend. Kanë vijuar testimet për të dyshuar të prekur me Covid19 dhe vazhdon puna intensive e epidemiologëve në terren për gjurmimin aktiv të rasteve”.

“Në 24 orët e fundit janë kryer 102 testime nga të cilat janë konfirmuar 17 raste pozitive, përkatësisht, 8 raste në Tiranë, 6 raste në Shkodër, 3 në Kamëz.
Rastet e konfirmuara janë kontakte të rasteve të mëparshme pozitive dhe disa raste të reja në Tiranë dhe Shkodër janë në proces hetimi. Janë testuar në 24 orët e fundit 19 personel shëndetësor, nga të cilët 3 kanë rezultuar pozitivë nga kontakte dhe 1 personel është shëruar në 24 orët e fundit”, u shpreh Tomini.

COVID-19 – Statistika (8 Qershor 2020)
Testime totale 18601
Testime molekulare 16357
Testime serologjike 2244
Raste pozitive 1263
Raste të shëruara 945
Raste Aktive 284
Humbje jete 34 (Qarku Tiranë 21, Durrës 6, Fier 3, Vlorë 1, Shkodër 2, Kukës 1)
Shpërndarja gjeografike e rasteve aktive është si vijon:
Tiranë 188
Shkodër 25
Krujë 24
Kamëz 17
Durrës 10
Mat 9
Lushnje 6
Tropojë 2
Korçë 1
Librazhd 1
Mallakastër 1/atsh

Ministria e Shëndetësisë: 17 raste të reja, shkon në 1263 numri i të prekurve Read More »