Andueli

Shqipëria rrezikon të humbë një tjetër “xhevahir”. Pas dy mundësve të kalibrit botërorë, si Elis Guri që zgjodhi Bullgarinë (e më pas u shpall kampion bote) dhe medalistit të bronztë të botës, Sahit Prizreni, i cili zgjodhi flamurin e Australisë, tashmë radha është për një tjetër medalist ndërkombëtar.

Ai është kampioni i saposhpallur i Evropës në atletikë, Izmir Smajlaj dhe i vetmi në historinë e “Mbretëreshës së Sporteve” në Shqipëri. Mesazhin e jep vetë shkodrani në një intervistë për Panorama Sport.

“Për momentin nuk mund të them se janë sjellë keq. Mirë janë sjellë, por vë theksin që pres më tepër mbështetje nga shteti. Një shpërblim 40 milionë lekë nuk është ndonjë shpërblim i madh. Në dijeninë time, të përfaqësosh një shtet tjetër të Evropës dhe të shpallesh kampion, të sigurohet jeta. Ndërsa me 40 milionë lekë nuk sigurohet jeta. Por nuk mund ta mohoj faktin se autoritetet shtetërore më kanë mbështetur”.

“Ajo çka duhet të them, është se Shqipëria duhet të dijë si t’i mbajë këta sportistë më afër. Jo vetëm mua, por ka edhe mjaft sportistë të tjerë të talentuar që duhet të mbështeten dhe përkrahur për të mos u larguar nga Shqipëria. Mund të përmend rastin e Elis Gurit, nuk u mbështet dhe nuk i plotësuan kërkesat e tij dhe vendosi të përfaqësonte Bullgarinë. Apo rasti i mundësit Sahit Prizreni me Australinë. Elisi e ngriti flamurin e Bullgarisë si kampion bote, por nëse do të vlerësohej këtu mund ta çonte me përfaqësuesen shqiptare. Kjo mund të ndodhë edhe mua nëse nuk do të më mbështetë. Do të veproj edhe unë si shokët e mi”.

“Po, po, ekziston si mundësi nëse nuk arrijnë të mi plotësojnë kushtet. Gjithsesi, kam besim që shteti do të reflektojë duke na i plotësuar kushtet dhe nuk do të më lërë të largohem. Normalisht këtu kemi lindur, rritur, është vendlindja jonë. Për shpirt, nuk largohem kurrë nga Shqipëria, por e përsëris, nëse nuk plotësohen kërkesat, do ta rishikoj si mundësi”.

“Kam pasur oferta nga Kroacia. Kontaktet kanë qenë të shpeshta. Por, për momentin, do të qëndroj me Shqipërinë. Megjithatë, pas kampionatit botëror, do ta shoh nëse do të qëndroj apo jo. Në kampionatin botëror do të garoj me Shqipërinë, më mbrapa do ta shoh si opsion”, ka thënë Smajlaj.

Tani që lista e shqiptarëve që kërkojnë azil në shtetet europiane rritet e rritet çdo ditë, ministri i Jashtëm holandez Bert Koenders e thotë qartë: askush të mos ta bëjë!

Ministri në një konferencë të përbashkët me ministrin tonë Ditmir Bushati argumentoi se shqiptarët janë të mirëpritur për turizëm ose punë, por jo për të kërkuar azil.

”A mendoni që është dëmtuar imazhi i shqiptarëve dhe qeveria duhet të bëjë më shumë për emigrantët shqiptarë që kërkojnë azil?”, qe pyetja e gazetarit Vincent Triest për zyrtarin holandez.

”Për azilkërkuesit shqiptarë, së pari shqiptarët janë të mirëpritur te ne për turizmin, për të punuar por është e qartë që vendi juaj nuk është një vend në pozitë të tillë si azilkërkuesi, nuk jeni në statusin e azilkërkuesit, nuk jeni të mirëpritur si azilkërkues!”, theksoi prerë Koenders.

Shqiptarët renditen pas sirianëve, në vendin e dytë për azil në Holandë. Sipas të dhënave, kërkesat e emigrantëve tanë janë rritur me 40% më shumë. Këto janë të dhëna të Ministrisë së Sigurisë dhe Drejtësisë në Holandë. ”Numri i aplikimeve të para për azil ka rënë nga 43.100 në 2015-ën në rreth 18.200 në 2016-ën. Më shumë se 57% e fluksit në 2016 lidhet me aplikimet e para. Ishte 73% në 2015. Tre kombësitë e para të personave që plotësuan një aplikim të parë janë sirianët (12%), shqiptarët (9%) dhe personat nga Eritrea (8%)”, raporton Shërbimi i Emigracionit dhe Natyralizimit që varet nga kjo ministri.

Në Hollandë gjatë 2016-ës kanë kërkuar azil 1664 shqiptarë në total.

Ilir Meta ndan mendjen, mbledh ekipin dhe ndeshet me Lefter Kokën dhe ekipin që qëndron pas tij. Në fund një shtrëngim duarsh, mes kreut të LSI-së dhe ministrit të Mjedisit Lefter Koka.

Ndeshja është zhvilluar në volejboll te Kepi i Rodonit, teksa dy fotot janë shpërndarë nga këshilltari i Metës, Emiljano Aleksi. Ekipet? Janë formuar nga të rinjtë e LSI-së.

Kreu i Kuvendit nuk i është shmangur as shërbimit, teksa Aleksi komenton: ”Kush është i fortë, nuk fiton. Kush Fiton, është i Fortë.”. Të ketë fituar kush, apo kanë dalë barazim?! Nga ajo që mësojmë pasi pyesim, nuk ka sesi të ndodhte ndryshe: Meta dhe ekipi i tij kanë fituar 10 me 7 kundrejt ekipit të Kokës.

Përdorimi i qeseve plastike të supermarketeve është ulur me 50% në Tiranë brenda një muaji që kur Bashkia e Tiranës ndërmori këtë nismë për të reduktuar ndotjen.

Qytetarët i janë bashkuar nismës së Bashkisë, duke ndikuar ndjeshëm edhe në zvogëlimin e ndotjes në kryeqytet. Pas suksesit me supermarketet e mëdha, tashmë kjo nismë ka nisur të shtrihet edhe në minimarketet nëpër lagje të ndryshme të kryeqytetit, duke qenë se i janë bashkuar edhe 10 të tjera, duke e çuar në 21 numrin e marketeve që zbatojnë nismën.

Për të nxitur qytetarët që të përdorin trastat dhe për t’i dekurajuar në përdorimin e qeseve, ato jepen nga marketet kundrejt një pagese prej 3 dhe 5 lekësh.

Një person u prangos në sy të gruas në Elbasan, teksa ishte duke lëvizur me biciklete.

Ngjarja ka irrituar shumë të pranishëm, që e quajnë të arrestuarin një person hallexhi.

Gjithçka ka ndodhur tek ura e Zaranikës, në afërsi të doganës në qytetin e Elbasanit.

Personi që ka parë gjithçka bën me dije se burri me bluzë të bardhë që po i vë prangat hallexhiut të pambrojtur, është polic i krimeve të rënda dhe jashtë orarit të punës, raporton ‘Jeta Osh Qef’. E quajnë Ajet. Mbiemrin nuk ia di.

Ai është i krimeve të rënda e nuk ka lidhje fare me atë person, por ia bëri vetëm se i zuri rrugën me biçikletë.

Edhe pse ai kishte me vete gruan dhe kalamajtë, polic Ajeti e gjuajti edhe me grusht, por nuk e filmova dot”, – thotë qytetari. Edhe sikur personi të cilit po i vihen prangat të jetë me të vërtetë në faj, a ka të drejtë një punonjës policie ta ndalë në këtë mënyrë? Teksa ecën me familjen e tij në makinë, të zbresë, ta dhunojë e më pas t’i vendosë prangat? Kush është krimineli i vërtetë në këtë rast?