Andueli

Kryeministri Edi Rama deklaroi sot se, hapja do të jetë graduale dhe nuk do të ketë një “datë çlirimi” për këtë luftë.

I pyetur sot në një intervistë televizive se kur do të rifillojë puna, Rama tha se, “paralelisht me këto masa do të shkojmë, nëse do të na lejojnë shifrat që vijnë nga vija e zjarrit, që deri sot janë shumë inkurajuese, duke hapur, hapur, hapur për t’i dhënë mundësi punës të rifillojë në pjesën e saj më të madhe. Sigurisht nuk mund të hapim menjëherë restorante dhe bare, por dhe për restorantet dhe baret po punojmë do të kemi një dokument të zgjeruar, të detajuar, një rregullore të bashkëjetesës me armikun në territor se do të jetë bashkëjetesë me armikun, për një periudhë kohe”.

Rama shtoi se, “ajo që ne duhet të bëjmë tani është të lëvrojmë nga arka e përbashkët, e shtëpisë sonë së përbashkët, e buxhetit të shtetit, një masë të konsiderueshme parash që do t’u shkojnë të gjithë atyre që sot janë në këto halle që po flasim për të pasur qetësi deri në periudhën e fundmajit, ku do të shikojmë pastaj përsëri se sa janë ata që kanë rifilluar punë, sa janë ata që nuk e kanë rifilluar dot, dhe me ndihmën e Zotit nuk do të kemi armikun në kundërsulm”.

I pyetur nëse kemi një datë për hapjen, Rama tha se, “hapja nuk do të jetë si një ditë çlirimi. Kjo është një luftë jokonvencionale, kjo nuk është njësoj si luftërat me të cilat ne jemi mësuar nga historia, nga librat, nga filmat apo qoftë dhe nga eksperienca e Kosovës, kur fundi i regjimit në Beograd dhe tërheqja e forcave agresore në Kosovë solli ditën e Çlirimit. Këtu nuk do të ketë ditë Çlirimi, këtu do jetë një periudhë tranzitore mes pushtimit në të cilin ne jetojmë dhe Çlirimit. Pra do të jemi në një hapje graduale pjesë-pjesë dhe do të bashkëjetojmë me armikun. Pra do të bashkëjetojmë me idenë dhe vetëdijen që çdo moment mund të infektohemi dhe çdo moment mund të na ndodhi ajo që nuk duam të na ndodhi. Për këtë arsye duhet të përgatitemi për një jetë, mund të zgjasë 2, 3, 5, 6, 10 muaj. Në shumë vende të botës thonë 3 vjet, nuk e di, larg qoftë, që duhet të mësohemi me një jetë që do jetë me rregulla të tjera. Nuk ka të shkosh në pazar dhe të bësh siç ke bërë më parë, me radha, me hyrje me numra të caktuar në mjedis tregtar, me pritje me të gjitha ato që do na duhen”.

“Do shkojmë në plazh, më pyesin njerëzit. Unë shpresoj që po, por nuk do të shkojmë siç jemi mësuar të shkojmë. Do të shkojmë në plazh, por duke respektuar disa rregulla, për të cilat ne po punojmë, që të mbrojmë veten dhe të tjerët. Pra hapja do të jetë graduale”, – tha Rama.

I pyetur nëse gjendja e turizmit pritet të jetë e mjeruar këtë vit, Rama tha se, “mund ta themi, por mund të ndodhë dhe disi ndryshe, jo shumë ndryshe, sepse fjala e mjeruar është një fjalë shumë e rëndë dhe patjetër që në momentin që flasim nuk duket pa vend”. /atsh

Kryeministri Edi Rama teksa ndau mesazhin e tij për javën e ardhshme, tha se qeveria po mendon të krijojë disa lehtësira sa i përket fashës së orarit të lëvizjes së qytetarëve.

“Jam i mërzitur prej pamjeve nga tregu në Kombinat. Janë të patolerueshme dhe përbëjnë një konfirmim shembullor të nevojës për të ecur për forcimin e masave ndëshkuese për të padëgjueshmit dhe të pabindurit, teksa po mendojmë, siç ua kam thënë, ta hapim pikatoren e lehtësimeve për masën e madhe të njerëzve që po bëjnë rezistencën e duhur duke sakrifikuar dhe mirëkuptuar plotësisht të gjitha kufizimet e rënda të lirisë që i kemi imponuar njëri-tjetrit. Duam të lehtësojmë pak lëvizjen, tanimë që kemi konsoliduar mekanizmin online për lejedaljet e vetëm një anëtari të familjes për bërjen e pazarit të shtëpisë. Duam të lehtësojmë pak më shumë shërbimet bankare tanimë që edhe si rrjedhojë e paketës mbështetëse, bankave do t’iu duhet të përballojnë një lumë më të madh shërbimi. Duam të lehtësojmë pak më shumë lëvizjen e automjeteve private, duke iu dhënë mundësi të gjithë atyre që vijnë apo shkojnë në një punë të autorizuar që të kenë fashë orari më të zgjatur dhe të mund të përdorin automjetin e tyre. Duam të lehtësojmë ata që i kanë mbyllur njësitë tregtare individuale jashtë qendrave tregtare natyrisht përveç bareve, klubeve, restoranteve, palestrave dhe njësive ku mblidhen shumë njerëz. Por të gjitha këto kërkojnë një vetëdije të lartë për përgjegjësinë e secilit dhe njëkohësisht të të gjithëve, ashtu sikundër kërkojnë edhe masa të reja ndëshkimore për shkelësit”, – tha Rama.

Ajo që ndodhi në Kombinat nuk ndodhi javën e kaluar, nuk është çështja tek fasha orare siç ankohen disa, as tek liridalja për pazare në një kohë, por tek lirimi i disa vidave të zinxhirëve mbrojtës që kujtojnë se hajt se kaloi më e keqja, apo se kërcënimi i një katastrofe me mijëra të vdekur nuk është real. Më e keqja nuk ka kaluar dhe mund të na ndodhë sa hap sytë dhe mund të na marrë me vete nëse na gënjen mëndja se ia hodhëm. Dhe për këtë mjaftojnë pak koka të shkreta dhe disa njerëz hileqarë që kujtojnë se ja hedhin edhe virusit. Kjo ndodh vetëm në tregun e Kombinatit dhe tek tuk diku tjetër, por kjo del e tepron për t’i bërë gjëmën jo Tiranës, por gjithë Shqipërisë. Po të ishte halli i njëorëshit do të ndodhte me të gjithë, po të vinte nga pamundësia për të bërë me korrektesë detyrën do ishte një fenomen e do na kishte rënë zjarri me kohë”, tha Rama.

Ai tha se kjo ndodh, sepse ka disa që nuk po duan të kuptojnë./atsh

https://www.facebook.com/Agjencia.Telegrafike.Shqiptare/videos/239884847400375/?t=0

Kryeministri Edi Rama ishte i ftuari i gazetares Cesara Buonamici në kanalin TG5 për të shpjeguar disa nga arsyet që e shtynë për dërgimin e mjekëve dhe infermierëve në vendin fqinj, ku gjesti ka shkaktuar shumë emocione.

”Na goditën dhe entuziazmuan këto ditë ardhja e mjekëve dhe infermierëve, ndërsa thatë: “Ne jemi të varfër, por kemi memorie të mirë. Mirëmbrëma Kryeministri Rama. Dëgjoni kryeministër, çfarë ju shtyu të bëni këtë gjest memorie drejt italianëve?”, ishte pyetja e gazetares Buonamici.

“Më erdhi natyralisht. Ne jetojmë në Shqipëri, por jetojmë me Italinë, thithim ajrin e Italisë nëpërmjet televizioneve”, ishte përgjigjja e kryeministrit Rama.

“Duke parë ato konferenca funerale me shumë e shumë të vdekur, duke qenë se edhe ne e përjetojmë këtë agresion vrasës, nuk mundeshim më. Ne nuk jemi në gjendje t’i ndihmojmë me të gjitha, por jemi në gjendje t’u demostrojmë solidaritetin tonë, dashurinë tonë dhe sigurisht impenjimin tonë për të qenë aty”, shtoi Rama.

”Nuk është se kemi burime të palimituara, edhe ne kemi këtë frikë se sistemi jonë mund të shpërthejë, por deri tani po ia dalim dhe sa kishim këtë forcë rezervë thamë, përse duhet t’i mbajmë rezervë dhe nuk i dërgojmë atje në front që është shtëpia jonë në fund të fundit”, shtoi ai.

”Mjekët dhe infermierët qe dërguat besoj se e flasin mirë si ju italishten sepse shumë janë formuar në Itali dhe imagjinoj se e flasin mirë si ju?”, ishte pyetja e gazetares.

”Shqiptarët e flasin të gjithë italishten. Gjëja më e bukur është se kur bëmë këto telefonata për të kuptuar se a ishin gati të niseshim të gjithë ishin gati, madje kishte nga ata që nuk u kishin thënë as prindërve. Kemi marrë pak nga leksioni i Nënë Terezës që thotë se: “Në vend që të mallkosh errësirën, ndiz një qiri”. Është një qiri që shpresojmë t’i bëjë mirë Italisë, sepse me të vërtetë nuk mund të rrijë secili në dhomë duke menduar që shtëpia nuk do digjet, duke pasur lajme nga ana tjetër që po digjet”, ishte komenti i Kryeministrit Rama.

”Faleminderit Kryeministri Edi Rama. Faleminderit për atë që bëtë dhe për këtë shembull të shkëlqyeshëm solidariteti”, theksoi në mbyllje gazetarja Buonamici.

”Faleminderit! Rroftë Italia, rroftë Shqipëria!”, uroi kryeministri Rama./atsh