Andueli

“Qëllimi ynë është që deri në fund të kësaj jave që vjen, duke parë gjithmonë numrat, të kemi një relaksim të mëtejshëm dhe pas 18 majit të fillojmë të lehtësojmë gjerësisht lëvizjen, qoftë brenda përbrenda, qoftë edhe për të kapërcyer kufijtë”, deklaroi sot Kryeministri Edi Rama.

Gjatë një konference të përbashkët për shtyp me Ambasadorin e BE-së në Tiranë, Luigi Soreca, në Ditën e Europës, Rama tha se “çdo gjë që themi në këtë situatë ka gjithmonë një kusht, numrat duhet të na ndihmojnë për të bërë atë që kemi lajmëruar”.

Përndryshe, vijoi ai, “nëse kemi rritje të numrave, do të duhet të bëjmë hapa mbrapa”. Që të mos bëjmë asnjë hap mbrapa, do të duhet që të gjithë të kuptojmë që po të arrijmë individualisht të bëjmë gjënë e duhur, distancën dhe të gjitha ato të tjerat që janë mësuar përmendësh, ne mund ta mbrojmë shumë fort, jo vetëm shëndetin e familjarëve e të afërmve, por mund të mbrojmë shumë fort Shqipërinë në këtë proces hapjeje”, tha Kryeministri.

Ai tha se “fatkeqësia e madhe në këtë situatë nuk është që vendos shumica, por këtu vendos një pakicë shumë e vogël, që në rast se del jashtë kontrollit merr në qafë të gjithë shumicën”.

“Nëse të gjithë bëjnë detyrën individualisht, atëherë, ne nuk do të kemi probleme dhe do të vazhdojmë të jetojmë në një normalitet të ri. Por, nëse në 18 maj, ne hapim baret, restorantet, kafet në mjediset e jashtme dhe kjo nuk respektohet në emër të rikuperimit të humbjeve sa më shpejt, duke shtuar tavolina, duke shtuar njerëz, duke hapur brenda, kjo do të ishte vetëvrasje”, tha ai.

Kryeministri solli shembullin e Koresë së Jugut, ku u detyruan t’i rimbyllin përsëri, sepse situata doli nga kontrolli.

Rama tha se “është shumë e lehtë të dalë nga kontrolli kjo situatë”. “Është shumë e lehtë të thuash, duke parë që s’ka ndodhur asgjë, që ‘kjo ishte kot’, ‘pse u mbyllën’, ‘këtu s’ka gjë’ etj. Por, kjo nuk është diçka që mund ta provojmë, sepse do të ishte shumë e thjeshtë, d.m.th, e lëshojmë një javë dhe pastaj e shohin të gjithë ata filozofët, epidemiologët e FB apo të politikës sesi ndodh, por këtë nuk mund ta bëjmë. Kështu që vërtetë Zoti i shqiptarëve është i madh, por kjo që kemi bërë është rezultat i punës sonë të përbashkët. Kush thotë se kjo vjen si rezultat i një marrëdhënie preferenciale, i një ndërhyrje të drejtpërdrejtë të Zotit në favor të shqiptarëve, për të shpëtuar vetëm shqiptarët, nuk ka lidhje me Ditën e Europës, fare”, tha Rama./atsh

“Ndihmës së angazhuar deri tani të Bashkimit Europian për të përballuar situatën e luftës së përbashkët me një armik të padukshëm do t’i shtohet edhe më tej në vazhdim, ndihma nga buxheti europian në gjysmën e dytë të vitit 2020”, bëri të ditur sot Kryeministri Edi Rama gjatë një konference të përbashkët me Ambasadorin e Delegacionit të BE-së në vendin tonë, Luigi Soreca në kuadër të Ditës së Europës.

“Sot”, tha Rama, “është Dita e Europës dhe na gjen në një situatë të jashtëzakonshme që na pamundëson ceremonitë dhe ritualet e zakonshme në kremtimin e kësaj dite të veçantë”.

“Por sidoqoftë”, theksoi Kryeministri, “faleminderit për mundësinë që këtu në Shtëpinë e Europës mund të japim së bashku një mesazh përshëndetës e kuptimplotë për të gjithë qytetarët shqiptarë”.

Rama tha se “para dy ditësh ne patëm një shkëmbim të rëndësishëm me udhëheqësit e Bashkimit Europian e rajonit në formatin e kësaj situate, përmes platformës dixhitale të samitit të parashikuar të Zagrebit nën presidencën kroate”.

Sipas Kryeministrit, ishte, sidoqoftë një takim në distancë me shumë përmbajtje e me një ndjesi të fortë afrimi e angazhimi të të gjithëve, për të përballuar, jo vetëm situatën e krijuar nga armiku i padukshëm, siç tanimë quhet botërisht, por edhe për të reflektuar për shumë çka që duhet çuar më tej e bërë bashkarisht.

“Në këtë kontekst nuk mundet veçse të rishprehet në mënyrë të vazhdueshme mirënjohja për miqtë tanë në Bruksel dhe në radhë të parë për miqtë tanë të Delegacionit këtu në Tiranë, që u gjenden përsëri pranë nesh pas tragjedisë së 26 nëntorit dhe konferencës së jashtëzakonshme e historike për Shqipërinë në Bruksel”, deklaroi Rama.

“Ambasadori e tha e unë dua ta përsëris, se siç doli qartë në diskutimin e Samitit të pardjeshëm, se mbështetja e institucioneve europiane do të vazhdojë për të gjitha vendet e do të përfshijë padyshim edhe vendet e Ballkanit Perëndimor e Shqipërinë, pavarësisht se nuk janë ende pjesë e BE-së në sensin e integrimit në BE, por janë pjesë e familjes europiane në sensin e ndërveprimit e qasjes së përbashkët në këtë luftë të një armiku të përbashkët që ka kërcënuar jetën e shëndetin e të gjithëve, po njësoj e që ka goditur të gjitha ekonomitë, duke na vënë të gjithëve në një vështirësi të pazankoshme”, u shpreh Rama.

“Përtej asaj që tha ambasadori”, tha Rama, ”dua të shtoj se ndihmës së angazhuar deri tani të BE për të përballuar situatën e kësaj lufte të përbashkët me një armik të padukshëm do t’i shtohet edhe më tej në vazhdim ndihma nga buxheti europian në gjysmën e dytë të vitit 2020”.

“Më vjen shumë mirë të informoj publikun se pas disa diskutimesh me Presidentin e Komisionit Europian, me Komisionerin për Zgjerim, me Presidentin e Këshillit, kemi marrë një aprovim në parim për të përfshirë edhe Bankën Qendrore Europiane në këtë ndihmë, përmes një ndërveprimi mes Bankës së Shqipërisë, bankave kombëtare të Rajonit dhe BEQ-së për të lehtësuar në mënyrë të ndjeshme të gjithë procesin që ka të bëj me financimin e ekonomisë, vendeve në kushtet kur vende si tonat që janë jashtë BE-së e kanë të vështirë në këtë situatë daljen në tregjet e kapitaleve edhe jo të lehtë të balancojnë goditjen e jashtëzakonshme që ka marrë ekonomia”, u shpreh Kryeministri Rama./atsh

Zëvendëskryeministri Erion Braçe deklaroi sot se duhet të ndalet abuzimi me çmimet e produkteve bujqësore që vijnë nga Divjaka në tregjet e kryeqytetit.

Braçe u shpreh se produktet e shëndetshme të Divjakës shiten në zonë 4-fish më lirë se në Tiranë”.

“Gjithçka erdhi për shkak të abuzimit të tregtarëve, të ndërmjetësve të sekserëve, natyrisht në kurriz të fermerëve të Divjakës, pastaj edhe në kurriz të qytetarëve anë e kënd Shqipërisë, sepse këtu në Divjakë vijnë nga gjithë Shqipëria për të marrë produkte bujqësore, perime kryesisht, qepë dhe patate, më herët kanë marrë lakrën, sallatë, të gjitha produktet tona, lulelakër, rrepa. Dhe natyrisht pas kaq e kaq vitesh abuzim konstant të një grushti tregtarësh, sekserësh, jo vetëm nga Shqipëria, por dhe nga vendet përreth që vijnë në Divjakë dhe diktojnë çmime të cilat shpesh herë shkojnë dhe nën koston e produkteve bujqësore që prodhohen këtu, thashë të vendosim një kufi të vendosim një limit të gjithë bashkë, përfshirë bashkinë e Divjakës, fermerët e vegjël e të mesëm por edhe të mëdhenj, me qëllim që të vendosim ca rregulla mbi të gjitha mes nesh, mes prodhuesve të vegjël në radhë të parë dhe pastaj marrëdhënien midis fermerëve dhe tregtarëve që vijnë të marrin produkte këtu në Divjakë”, tha Braçe nga Divjaka gjatë një prononcimi për një nga mediet e vendit.

Mbi abuzimin me çmimet e produkteve që vijnë nga Divjaka Braçe tha se, “në raport me fermerin që është i detyruara ta shesë pataten me 26 lekë për kilogram dhe qepën me 150 lekë të vjetra, tregu sot që flasim po e shet pataten nga 800 deri në 1500 lekë të vjetra në Tiranë, pra është një çmim abuziv i dyanshëm”.

Braçe drejton gishtin nga tregu agroushqimor i Tiranës, i cili sipas tij funksionon në kushte monopoli, i gjykuar i tillë nga Autoriteti i Konkurrencës.

“Faktikisht, kemi një gjendje tërësisht abuzive, dhe grabitje e dyanshme edhe përkundrejt fermerit dhe qytetarit. Këto produkte janë ekskluzive të Divjakës. Edhe qepa edhe patatja e re, pra në këtë stinë prodhohen vetëm në Divjakë dhe çmimi që është vendosur është 5 lekë mbi çmimin që prodhohet, pra shoqata e prodhuese të fermerëve të Divjakës ka vendosur një çmim që është më normali në botë dhe nuk rëndon mbi qytetarët e Tiranës, por ajo që rëndon mbi to është tregu agroushqimor i Tiranës i cili funksionon në kushte monopoli, i gjykuar i tillë nga autoriteti i Konkurrencës madje duke abuzuar në mënyrë të skajshme me pozitën monopol që ka”, u shpreh Braçe.

“Natyrisht ka instrumente fiskalë që duhet të ndërhyjnë sa më parë të jetë e mundur dhe këtu në Divjakë po operojnë organet fiskale me disa nga këta sekserët si të themi apo ndërmjetës tregu të cilët kanë abuzuar kohë pas kohe, apo vit pas viti dhe kanë fituar shumë dhe në krahun tjetër kanë goditur jashtë mase dhe kanë shkaktuar shumë dëme të mëdha prodhuesve të vegjël në Divjakë”, theksoi zv.kryeministri Braçe. /atsh