Andueli

Dita Ndërkombëtare e Infermierëve/ Meta: Institucionet, kujdes maksimal për vlerësimin e merituar

Aktualitet, Shendetesi / /

“Dita Ndërkombëtare e Infermierëve, na kujton sot se mirënjohja e thellë, falënderimi dhe përkujdesja për heronjtë e ditëve tona, nuk duhet të shprehet vetëm në një ditë”, tha presidenti Ilir Meta.

Meta tha se “shoqëria jonë dhe institucionet shtetërore duhet të tregojnë kujdes maksimal për trajtimin dhe vlerësimin e merituar të infermierëve, të cilët me përkushtimin, profesionalizmin, sakrificat dhe dashurinë për jetën, shkëlqyen në vijën e parë të përballjes me COVID-19, duke rrezikuar jetën e tyre dhe të familjeve të tyre për të mbrojtur shëndetin e të gjithëve ne”.

“Krenar për ju dhe përherë mirënjohës”, tha kreu i Shtetit./atsh

Dita Ndërkombëtare e Infermierëve/ Meta: Institucionet, kujdes maksimal për vlerësimin e merituar Read More »

Shqipëria destinacion i pastër dhe i sigurt turistik

Aktualitet, Turizem / /

Aktiviteti turistik do të fillojë në respektim të masave të përcaktuara, sipas protokolleve që kanë hartuar ekspertët e shëndetësisë, duke garantuar mbrojtjen e shëndetit të qytetarëve dhe pushuesve nga përhapja e COVID-19.

Kështu u shpreh Rovena Moçka, drejtore e Turizmit, pranë Ministrisë së Turizmit dhe Mjedisit gjatë një interviste televizive ku ndër të tjera tha se, “në kushtet e mbërthyera nga pandemia, COVID-19, ky është një vit mbijetese për sektorët e ekonomisë dhe të turizmit dhe kjo situatë nuk është vetëm për Shqipërinë, por për të gjithë botën”.

“Kur flasim për parashikime të sektorëve të ekonomisë dhe atij turistik, duhet të kemi parasysh që pandemia nuk është konsideruar e mbyllur nga ekspertë shëndetësor. Kemi një liberalizim të fashave orare, duke marrë në konsideratë pikërisht ato që janë më të rëndësishme sot respektimin e masave që na vijnë nga ekspertët, për të ruajtur shëndetin e qytetarëve dhe të vizitorëve”, – tha Moçka.

Ajo që është e rëndësishme, nënvizoi ajo, është fakti që të rikthejmë aktivitetin e sektorëve ekonomikë dhe të turizmin duke respektuar protokollet e posaçme që janë një detyrim nga ekspertët e shëndetësisë, në kushtet kur pandemia nuk ka mbaruar dhe nuk ka një mënyrë sesi ne të mbrohemi përveç atyre masave që kanë rekomanduar ekspertët e shëndetësisë, distancimi fizik dhe higjiena.

Duke u ndalur në mbështetjen që ka dhënë qeveria për sektorin e turizmit në kushtet e pandemisë Moçka tha se, “në ndryshim nga shumë vende të tjera, turizmi ka qenë shtylla kryesore e ekonomisë që ka sjellë të ardhura rekord, ndaj turizmi ka marrë një paketë të posaçme ndihme, e konsideruar si paketa e pagave të luftës dhe jo e luksit, që do të thotë, ndihmë për të përballuar këtë situatë të vështirë. Për të vijuar me atë që quhet kredia për sektorin turistik. Janë këto disa mekanizma të ndërmarra nga qeveria shqiptare për sektorin turistik në këtë kohë të vështirë”.

Ajo tha se, pagat e luftës ka funksionuar për tre muaj, duke marrë në konsideratë që ky sektor të rinisë aktivitetin turistik.

Moçka tha se, “turizmi i brendshëm është një nga potencialet më të mëdha të rimëkëmbjes së sektorit, ndërsa është grupi i posaçëm i ekspertëve që njofton për liberalizmin e masave që do t’i paraprijë edhe hapjes së kufijve”.

“Është e rëndësishme të ruajmë emrin destinacion turistik, pasi vendet turistike janë duke marketuar nën këtë slogan, si vende të pastra dhe të sigurta nga COVID-19. Ndërsa do të kemi një liberalizim të masave të mëtejshëm, që nis më 18 maj me riaktivizimin e bareve dhe lokaleve, por që të gjithë duhet të tregohemi të përgjegjshëm në zbatimin e masave mbrojtëse”, – tha ajo. /atsh

Shqipëria destinacion i pastër dhe i sigurt turistik Read More »

Epidemiologu Alimehmeti: Shqipëria e ka kaluar tashmë ciklin e koronavirusit por duhet kujdes

Aktualitet, Opinione, Shendetesi / /

Epidemiologu, Ilir Alimehmeti në një nga mediat e vendit deklaroi se Shqipëria e ka kaluar tashmë ciklin e koronavirus dhe ndaj numri i të prekurve ka rënë në mënyrë të ndjeshme.

“Sa është i përhapur vërtetë virusi nuk mund ta themi dot vetëm përmes tamponit, tamponi është vetëm një fotografi e momentit. Mund të themi që për momentin ky virus e ka bërë ciklin e vet, pasi që në fillim mendohej se do të ishte rreth 10 javë, pra rreth 70 ditë. Ne sot jemi në ditën e 100-të dhe mund të themi qartësisht se këtë cikël e kemi plotësuar”, tha mjeku.

Alimehmeti theksoi më tej se me rritjen e temperaturave, në vendin tonë do të ulet ndjeshëm mundësia për t’u infektuar nga koronavirus, por kjo nuk do të thotë se do të zhduket plotësisht.

“Fuqia e virusit ulet në temperaturë të lartë. Nuk e zhdukin komplet por e minimizojnë mundësinë ngjitëse të tij në temperatura të larta. Shfaq një sezonalitet, por ndryshe nga gripi, koronavirus në verë nuk zhduket komplet. Temperatura do na ndihmojë shumë por nuk do ta zhdukë. Ky virus jeton shumë pak në ambient me diell”, u shpreh epidemiologu.

Më tej, ai theksoi se virusi do të ketë një rikthim në vjeshtë. Lidhur me teoritë se virusi është krijuar në laborator, ai tha se, nuk ka asnjë provë dhe asnjë studim të vetëm që e mbështet këtë ide, pasi të gjitha studimet tregojnë se është krijuar nga natyra. “Së pari nuk ka asnjë provë dhe asnjë studim të vetëm që ky virus është krijuar në laborator. Ky virus është krijuar në mënyra natyrore dhe nga kafshët është transmetuar tek njeriu. Për sa do të kemi ne jetë viruse dhe bakter të reja do të ketë gjithmonë”, tha Alimehmeti. /atsh

Epidemiologu Alimehmeti: Shqipëria e ka kaluar tashmë ciklin e koronavirusit por duhet kujdes Read More »

Situata në spitalet COVID e qëndrueshme/ 28 pacientë të shtruar, 3 prej tyre në terapi intensive

Aktualitet, Shendetesi / /

Në Spitalin Infektiv dhe atë “Shefqet Ndroqi” në Tiranë situata paraqitet e qëndrueshme prej ditësh, ndërsa aktualisht po marrin shërbim 28 pacientë.

Ekspertja e Institutit të Shëndetit Publik, dr. Eugena Tomini, tha sot në komunikimin e drejtpërdrejtë me mediet se “në dy spitalet COVID janë të shtruar 28 pacientë dhe vetëm 3 prej tyre janë në terapi intensive. Prej më shumë se 10 ditësh nuk kemi asnjë humbje jete”.

“Më pak se 15% e te prekurve aktivë po marrin trajtim në spitalet Covid, pjesa tjetër ndiqet nga mjeku i familjes”, – tha Tomini.

Në 24 orët e fundit janë testuar 121 qytetarë të dyshuar si të prekur me Covid-19 dhe kanë rezultuar pozitivë 4 qytetarë, përkatësisht 2 qytetarë në Tiranë, 1 në Kamëz dhe 1 në Shkodër. Sot është shënuar numri më i ulët i rasteve ditore pozitive, e përllogaritur në 8 javët e fundit./atsh

Situata në spitalet COVID e qëndrueshme/ 28 pacientë të shtruar, 3 prej tyre në terapi intensive Read More »

Prestigjiozja amerikane: Flamingot po dynden drejt lagunës shqiptare

Turizem / /

Rregullat e mbylljes në shtëpi kanë mërzitur disa njerëz në Shqipëri, por, me krahët e tyre ”të prerë” për shkak të pandemisë së koronavirusit, ata kanë lejuar që flamingot dhe zogjtë e tjerë të lulëzojnë në një lagunë bregdetare pranë detit Adriatik, shkruan gazeta prestigjioze amerikane ”The Washington Post”.

Zyrtarët lokalë dhe banorët thonë se popullsia e flamingove ka arritur deri në rreth 3 000 në Lagunën e Nartës, një habitat i rëndësishëm i shpendëve ujorë, që u kthyen në vitet e fundit pas një mungese të gjatë.

Vëzhguesit e zogjve gjithashtu kanë vërejtur më shumë pelikanë, çafka dhe specie të tjera këtë pranverë në lagunën 28 ​​kilometra katrore, që ndodhet 145 kilometra në jug të Tiranës.

“A nuk është e bukur të shohësh flamingo të patrembur përreth?”, pyet Dhimitër Konomi, pjesë e një grupi lokal që administron peshkimin tregtar në Lagunën e Nartës, ndërsa zogjtë e mëdhenj me qafë të gjatë qëndrojnë në ujërat e cekëta.

”Ndalimi i funksionimit të një kriporeje dhe ulja e aktivitetit njerëzor të të gjitha llojeve gjatë pandemisë shpjegon pse zogjtë po grumbullohen në lagunë”, thotë Nexhip Hysolokaj, një ekspert rajonal i biodiversitetit.

”Flamingot janë një specie shumë delikate dhe mospasja përreth automjete ose vizitorë u përshtatet atyre”, shton ai.

“Ata kanë gjetur ushqim dhe qetësi dhe kjo ka të ngjarë t’i ndihmojë ata të shumohen”, tha Hysolokaj.

Studiuesit planifikojnë të studiojnë flamingot për të parë nëse qetësia e krijuar nga koronavirusi është e favorshme për shndërrimin e lagunës në një vend ku mund të bëjnë fole dhe të shumohen.

Konomi thotë se një lagune e mbushur me jetë është një thesar që mund të nxisë turizmin.

Por, Hysolokaj është më pak i prirur të tërheqë turistët konvencionale në lagunën që është pjesë e një peizazhi të mbrojtur me dunat rëre, ligatina, ishuj dhe plazhe që mbështesin faunën e larmishme si dhe zogjtë.

Ai e përshkruan atë si “mushkëritë” e Vlorës, qyteti më i afërt.

“Duhet të ketë një turizëm të qëndrueshëm, por alternativ. Natyrisht le të vijnë kampistë, t’i përdorim plazhet, të përdorin biçikletat apo udhëtimet edukative sepse Vlora është shumë afër”, shton ai./atsh

Prestigjiozja amerikane: Flamingot po dynden drejt lagunës shqiptare Read More »

Polici më e re në moshë/ Voda: Jo të gjithë efektivët 55-vjeçarë dalin automatikisht në pension

Aktualitet, Lajmi i fundit / /

Polici më e re në moshë është qëllimi i projektligjit të propozuar nga Ministria e Brendshme për të ulur me 2 vjet moshën e punonjësve të policisë në harkun kohor të tre viteve.

Zv.ministrja e Brendshme, Rovena Voda, gjatë një interviste televizive, tha se procesi që do të pasojë pas miratimit të ligjit është një proces fleksibël dhe jo të gjithë punonjësit e policisë që kanë mbushur apo mbushin 55 vjeç do lënë detyrën.

“Ky është një ligj fleksibël. Pra nuk është e thënë, që çdo individ që ka mbushur këtë moshë, që nga nesër do të dalë në pension, po themi të parakohshëm apo do të marrë këtë trajtim financiar që parashikon ligji, nëse ai do të largohet nga radhët e policisë së shtetit. Në Policinë e Shtetit ka një moshë relativisht të lartë mbi 45 vjeç, që i bie më shumë se një e treta e radhëve të policisë së shtetit”,- tha Voda.

Ajo shtoi se largimi nga radhët e policisë nuk do varet 100% nga vullneti i punonjësve, por edhe nga nevojat dhe sfidat që do ketë Policia e Shtetit.

“Kjo do të varet nga nevojat e policisë së shtetit, pra nuk varet 100% nga dëshira e individit. Nëse do të kemi 100, 200 apo 300 punonjës policie që do të bëjnë një kërkesë, për të përfituar këtë trajtim financiar, për shkak të ndërprerjes së parakohshme të marrëdhënieve të punës, do të ketë një komision të posaçëm, i cili pas miratimit të ligjit do të krijohet me akt nënligjor, me vendim të Këshillit të Ministrave, që do të trajtojë këto kërkesa. Madje kërkesa nuk bëhet vetëm nga individi, por është lënë hapësirë në ligj që kërkesa bëhet edhe nga struktura apo departamenti përkatës i policisë së shtetit”,- theksoi Voda.

Sipas saj, në fokus të rinovimit do të jenë forcat opercionale të policisë që janë në terren me misione të ndërlikuara, ndërsa ka hapësirë për rikthimin e tyre në detyra specifike deri në 700 orë në vit. “Do të jenë kryesisht punonjës policie, në raste të caktuara pasi kjo nuk konsiderohet si një ndërprerje absolute e marrëdhënieve të punës, as pushim i marrëdhënieve të punës. Po themi që do të konsiderohen të liruar nga detyra e megjithatë ata kanë detyrimin dhe mund të thirren dhe të punojnë në detyra të caktuara sipas nevojës së strukturës së Policisë”,- tha Voda./atsh

Polici më e re në moshë/ Voda: Jo të gjithë efektivët 55-vjeçarë dalin automatikisht në pension Read More »

“As tërmeti dhe as pandemia s’më ndalojnë të jap mësim për nxënësit e mi”/ Mësuese Sadete Lala , shembull i përkushtimit

Aktualitet, Arsim / /

Ajo zgjohet çdo mëngjes herët dhe i uron një ditë të mbarë të gjithë nxënësve të saj. Urimi nuk është siç ka bërë në 30 vite të karrierës së saj, në klasë, por online nëpërmjet celularit apo laptop-it. Sigurisht teknologjia ka bërë që mësimi të jetë sa më afër normales në kohët e pandemisë së COVID-19 dhe ka ndihmuar mësuesit dhe nxënësit të vijojnë procesin mësimor edhe në këto kohë.

Sadete Lala është mësuese e lëndës së Matematikës në gjimnazin “At Shtjefën Gjeçovi” në Laç. Prej 30 vitesh, Lala është mësuese mjaft e përkushtuar. Ajo ka dhënë mësim në Klos, Burrel dhe Milot, tashmë prej 11 vitesh jep mësim në Laç.

Mësuese Sadetja ka arritur rezultate të larta me nxënësit e saj, ku disa prej tyre kanë qenë pjesëmarrës olimpiadash. Me natyrën e saj të qetë, dashamirëse, kontribuuese dhe shumë të përkushtuar për çdo detyrë që i ngarkohet në shkollë.

Sot, mësuese Sadetja gjendet në vijën e parë të frontit të luftës me mësimdhënien online. E përkushtuar, plot solidaritet ajo është pranë dijes dhe nxënësve të gjimnazit “At Shtjefën Gjeçovi”.

Por, përveç vështirësive prej koronavirusit, familja e mësuese Sadetes u godit edhe nga tërmeti i 26 nëntorit, pasi shtëpia e saj në Laç u dëmtua prej tërmetit të 26 nëntorit, ashtu si dhe shumë shtëpi të nxënësve të saj. Megjithatë na tregon mësuese Sadetja ata janë të përkushtuar ndaj mësimit dhe bëjnë të pamundurën të ndjekin mësimet online përmes platformave të përdorura.

“As tërmeti dhe as pandemia nuk do të më ndalojnë së dhëni mësim për nxënësit e mi”, është mesazhi që mësuese Sadetja i jep nxënësve të saj, të cilët kanë kaluar disa muaj të vështirë.

“Përpiqem që në çdo hap të më shoqërojë sinqeriteti dhe mirësia në punën time”, thotë mësuese Sadete.

Ajo na shpjegon se “në fillim patëm vështirësi, por shumë shpejt ia morëm dorën. Mësimin e zhvillojmë nga ora 9- 14 çdo ditë përmes platformave online. Nxënësit marrin mësimin e ditës dhe modele ushtrimesh të zgjidhura. Pastaj me grupet që kemi ndarë plotësojnë ushtrimet e ndryshme”.

Për rikthimin në shkollë mësuese Sadetja thotë se, mezi po pret të ritakohet me nxënësit e saj me të cilët prej 2 muajsh takohet vetëm online.

“Nuk ka rëndësi sa herë rrëzohesh, rëndësi ka shpejtësia me të cilën ngrihesh”, është motoja e mësuese Sadetes, të cilën ia përcjell edhe nxënësve të saj, të cilët i përgatit për sfidat e jetës. /atsh

“As tërmeti dhe as pandemia s’më ndalojnë të jap mësim për nxënësit e mi”/ Mësuese Sadete Lala , shembull i përkushtimit Read More »

Basha: Zbatimi i 15 kushteve të BE-së për negociatat, udhërrëfyesi i vetëm për Shqipërinë

Opinione, Politike / /

Kryetari i Partisë Demokratike, Lulzim Basha deklaroi sot se “zbatimi i 15 kushteve të Bashkimit Europian për hapjen e negociatave është jetik për Shqipërinë dhe udhërrëfyesi i vetëm për nxjerrjen e vendit nga autokracia, paligjshmëria dhe kriza ekonomike.

Pas deklaratës së sotme të Kryeministrit Edi Rama, i cili u shpreh për një tryezë gjithëpërfshirëse për integrimin, vjen reagimi i kryetarit të PD-së.

“Vendi tani është para një krize të thellë ekonomike sepse në vend që t’u japë mbështetje njerëzve dhe ekonomisë, Rama po ua jep paratë e shqiptarëve një grushti klientësh dhe oligarkësh”, deklaroi Basha.

Ai theksoi se “Rama dhe qeverisja e tij e kanë mbajtur peng integrimin europian të Shqipërisë dhe për shkakun e tij gjatë këtyre viteve kushtet janë shtuar nga 5, në 9 dhe tani janë 15 që duhen përmbushur”.

“Pandemia tregoi se ai e vendos veten mbi ligjin dhe kushtetutën dhe se për veten dhe klientelën e tij shkel mbi gjithçka. Kjo krizë vetëm sa nxori zbuluar të gjitha dështimet e Ramës: shëndetësinë e vjedhur, ekonominë e rrënuar, papunësinë e rritur, varfërinë në ekstrem, dhe shtetin prej kartoni të katandisur në regjim facebook-u. Janë dështimet e Ramës që po varfërojnë përditë njerëzit, po e rrënojnë ekonominë, dhe po na largojnë nga Europa”, tha Basha./atsh

Basha: Zbatimi i 15 kushteve të BE-së për negociatat, udhërrëfyesi i vetëm për Shqipërinë Read More »