Andueli

Këshilli Politik ka përfunduar me konsensus takimin e sotëm për Reformën Zgjedhore, ku janë pranuar propozimet e opozitës për KQZ dhe i është hapur rruga diasporës për të votuar.

Bashkëkryetari i Reformës Zgjedhore Damian Gjiknuri tha pas takimit se “ramë dakord për të gjithë pikat e mbetura, qoftë për Komisionin Qendror të Zgjedhjeve, qoftë për formulën e kompozimit, mandatet e KQZ-së dhe shumë elementë të tjerë që kishin mbetur në diskutim, ku përgjithësisht plotësuam kërkesat e PD-së për ato garanci që kanë ekzistuar te ligji aktual, pavarësisht se disa nga standardet e ODIHR kërkonin ndryshime”.

“Megjithatë për ne është më e rëndësishme që ligji zgjedhor të reflektojë shqetësim, frikërat apo të kaluarën e afërt të opozitës, në mënyrë që të shkojmë në zgjedhje me një ligj të gjithëpranuar”, tha ai.

Gjiknuri shtoi se “nga ana tjetër ekspertët morën detyrën që ta zbardhin këtë tekst dhe besoj se për 2-3 ditë teksti do të jetë i plotë dhe do t’i dërgohet Kuvendit, por nuk kemi më debate, pasi gjithçka është teknike puna e mbetur. Së dyti, kemi rënë dakord që për ligjin e ri zgjedhor që do të implementohet pas zgjedhjeve vendore të radhës, pra që hyn në fuqi pasi kalojnë dy palë zgjedhje, që ka të bëjë kryesisht me depolitizimin, mënyrën si do të administrohen zgjedhjet nga zyrtarë të departizuar, të depolitizuar menduam të çojmë një pjesë të dytë të legjislacionit shumë shpejt në Kuvend i cili do të marrë hyrjen në fuqi në një kohë të dytë. Pra legjislacioni do të jetë i plotë tani. Më vonë institucionet mund të fillojnë punën përgatitore, përfshirë dhe KQZ, por zbatimi i tij do bëhet pas tre vjetësh. Pra kemi rënë dakord edhe për këtë, për ta ndarë në amendime të Kodit aktual Zgjedhor dhe në një ligj të ri që bën të mundur implementimin e skemës me administrimin e depolitizuar të zgjedhjeve”.

“Ishte një punë e lodhshme. Negociata të vështira për shkak të klimës politike të krijuar dhe për herë të parë Shqipëria ndodhej në një situatë tripolare politike, ku ngociohej me njërën palë që është në Kuvend dhe palën tjetër që ka djegur mandatet. E rëndësishme është se kemi një ligj zgjedhor të gjithëpranuar, jo më i miri, jo me të gjithë standardet, por të pranuar nga të gjitha palët”, tha ai.

Bylykbashi-Vasili: U pranua propozimi ynë, Kodi Zgjedhor garanci që vota e shqiptarëve të mos tjetërsohet

Në një prononcim për mediet pas takimit të Këshillit Politik, përfaqësuesi i PD-së, Oerd Bylykbashi tha se, ramë dakord që KQZ mos të jetë një organ që të ketë persona që të jenë frenuar politikisht dhe nga ana tjetër një Komision Qendror të Zgjedhjeve i cili të jetë i kontrolluar nga mazhoranca pra dakordësia e datës 5 qershor do të jetë e plotë e pasqyruar në Kodin Zgjedhor.

“Opozita bëri të mundur që të gjitha garancitë për zgjedhësit shqiptarë dhe për subjektet zgjedhore që garojnë të jenë të plota dhe qeveria të mos ketë mundësi të preki administrimin e zgjedhjeve”, tha ai.

Po ashtu Bylykbashi tha se “diskutuam dhe një seri çështjesh të tjera apo pika të tjera që kanë të bëjnë me rekomandimet e OSBE/ODIHR apo shqetësime që janë ngritur nga zgjedhjet dhe në ditë në vijim do të trajtohen dhe çështje me pas që tashmë janë trajtuara vetëm në aspektin teknik do të përfundojë draftimi i tyre me çështje që kanë të bëjnë me policinë, prokurorinë, ndëshkimin e krimeve zgjedhore që është dhënë dakordësia edhe për ato çështje. Unë besoj se me mbledhjen e sotme të Këshillit Politik, Kodi Zgjedhor do të ketë garanci shtesë që të bëjnë të mundur që vota e shqiptarëve të mos tjetërsohet.”

“Opozita do të bëjë të gjitha përpjekjet e saj që vota e ardhshme të garantojë rotacionin politik me votë drejtpërdrejt shqiptarëve”, tha ai.

Përfaqësuesi i LSI-së, Petrit Vasili tha se, “sot mbyllëm një fazë të rëndësishme dakordësie politike të cilës opozita i qëndroj deri në fund, pra respektoi marrëveshjen. Nuk u tërhoq nga marrëveshja, pavarësisht momenteve të vështira për ta penguar këtë marrëveshje dhe dha një provë të rëndësishme para shqiptarëve të integritetit politik dhe moral”.

“I hapet rrugë votës së diasporës”, Hajdari: PD kundër ndryshimit të sistemit, ka ende shpresë

Bashkëkryetarja e Komisionit të Posaçëm të Reformës Zgjedhore Rudina Hajdari tha se nga tryeza doli lajm i mirë për të plotësuar atë dëshirë të diasporës për të votuar, pra mund të jetë e mundshme që në zgjedhjet e ardhshme të kemi të drejtën e disaporës për të votuar në Shqipëri.

Pas mbarimit të mbledhjes së Këshillit Politik, Hajdari tha se “në mënyrën se si do të zbatohet është akoma për t’u parë, pra mundësi se vota e diasporës do bëhet realitet ka të bëjë me shumë hapa të tjerë të cilat do bien në përgjegjësinë e e qeverisë. Pra do të dalin shumë akte nënligjore, gjë që e bënë të thënë me të vërën të vështirë. Gjithsesi ky është një lajm i mirë dhe çështja e diasporës është marrë si çështje serioze dhe duhet përshëndetur”.

Hajdari theksoi se opozita jashtëparlamentare dhe kryesisht PD nuk ishte dakord për ndryshimin e sistemit.

“Po ashtu u ra dakord që i gjithë drafti që pati dakordësi të vijë në Komisionin e Reformës Zgjedhore ashtu siç u fut ky element për votën e e diasporës dhe të bëhet pjesë e komisioni, dhe presim të fusim dhe elementë të sistemit zgjedhor, por ajo që është e dukshme opozita jashtëparlamentare sidomos PD nuk pranojë të kemi dakordësi për ndryshimin e sistemit. Do t’i ngelet parlamenti në këtë moment pasi u arrit kjo marrëveshje, Rama-Basha të vijë në parlament dhe ne pasi t’i shtojmë ato elementë shtesë që i japin kësaj reformë një shtrirje më të gjerë nga mbështetja por dhe zgjedhje që janë të barabarta për qytetarët shqiptarë. Ka ende shpresë përsa i përket ndryshimit të sistemit dhe atë që unë dhe shoqëria civile kemi avokuar do të qëndrojmë stoikë në këtë kërkesë dhe do e shtrojmë në momenti që Kodi të vijë në komision për të bërë ndryshime dhe ne kemi të drejtën e vetos, pra kemi opozitën në komision. Do i shqyrtojmë të gjitha ndryshimet dhe ne do shtojmë ato elementë shtesë. Besoj se kjo do arrihet sepse votat janë të unifikuar të opozitës parlamentare kemi 39 vota kemi një kërkesë për të bërë ndryshime kushtetuese dhe po të merren të gjitha bashkë do kemi reformë të suksesshme, pa këto element do ngelemi në vend”, tha Hajdari./atsh

Kryetari i Partisë Demokratike të Kosovës, Kadri Veseli reagoi sot ndaj aktakuzës së ngritur nga Zyra e Prokurorit Special në kuadër të Dhomave të Specializuara ndaj tij dhe presidentit Thaçi.

“Në një veprim të paprecedentë, Prokurori ka lëshuar deklaratën para se Gjykata t’i konfirmojë ose rrëzojë akuzat e ngritura që ai pretendon. Në këtë deklaratë, Prokurori përpiqet ta arsyetojë vendimin e tij të padrejtë dhe të pazakonshëm, duke pretenduar se unë dhe Presidenti kemi tentuar të pengojmë punën e Dhomave të Specializuara”, tha Veseli.

Ai theksoi se “dyshimet e ngritura janë plotësisht të pavërteta dhe nuk qëndrojnë”. “Po ashtu, nuk ka kurrfarë baze për pretendimet për pengim të punës së gjykatës. Dhe është shqetësim i thellë gjuha e tillë e adresimit me të pavërteta. Një tjetër shqetësim është dyshimi i bazuar se motivet e vërteta të këtij Prokurori janë krejtësisht politike”, tha Veseli.

Ai tha se “asnjë prokuror, asnjëherë nuk do të duhej të lejonte që vendimet e tij të udhëhiqen nga motive politike”.

“Me këtë qasje, Prokurori ka paralajmëruar rrugën që ai pretendon ta ndjek për ta ushtruar të gjithë pushtetin e tij. Ai po e paralajmëron popullin e Kosovës se ky proces nuk mund të jetë i besueshëm për të ndarë drejtësi të paanshme, dhe të pandikuar nga rrethanat politike. Ai po përpiqet që përmes deklaratave kundërthënëse të mbulojë motivet e vërteta, që duket se janë politike”, tha Veseli.

Ai siguroi se “nuk do të lejoj që ky Prokuror dhe asnjë tjetër si ai, ta njollosë në këtë mënyrë Ushtrinë Çlirimtare të Kosovës”.

“Ne kemi qenë të detyruar që ta mbrojmë veten dhe vendin tonë. Dhe do ta bëjmë sërish. Nëse na imponohet, edhe një herë do të demonstrojmë me fakte se UÇK ka zhvilluar një luftë të ndershme për liri, kundër një prej ushtrive më të fuqishme dhe më agresore në botë, të udhëhequr nga një bandë kriminale serbësh. Luftëtarët e lirisë, që në vitet 1998 e 1999 morën armët në duar për të mbrojtur popullin, familjet, shtëpitë dhe nderin e tyre, ndaj përpjekjeve gjenocidale të Serbisë, meritojnë vetëm nderim e lartësim dhe jo fyerje në këtë mënyrë”, tha Veseli.

Jam krenar, vijoi ai, “që kam qenë pjesë e Luftës Çlirimtare të popullit të Kosovës dhe e mohoj plotësisht çdo përfshirje në ndonjë akt kriminal”.

“Luftëtarët trima të UÇK-së janë mbrojtës, heronj të luftës, që kanë luftuar kundër një agresori të egër serb, dhe nuk janë kriminelë lufte. Tribunali Ndërkombëtar për Krime të Luftës në ish-Jugosllavi tanimë ka trajtuar ngjarjet e luftës në Kosovë në pesë gjykime të ndara. Në fund të këtyre gjykimeve, gjashtë udhëheqës të Serbisë janë shpallur fajtorë dhe janë dënuar për krime lufte dhe për krime kundër njerëzimit, kundër popullatës civile shqiptare. Ndërsa, të gjithë udhëheqësit e lartë të UÇK-së ishin shpallur të pafajshëm”, nënvizoi ai.

Kjo, sipas Veselit, “flet për të vërtetën se krimet në Kosovë janë kryer nga serbët dhe jo nga shqiptarët”.

“Deklarata e sotshme e Prokurorit është një përpjekje tjetër për të rishkruar historinë, duke e shtrembëruar të vërtetën për luftën tonë të shenjtë çlirimtare. E kam për nder e privilegj qe ta mbroj Kosovën edhe një herë, nëse na imponohet. E di se do ta kem edhe mbështetjen tuaj për ta mbrojtur luftën çlirimtare, lirinë tonë, UÇK-në dhe historinë e Kosovës kundër kësaj prokurorie të njëanshme. Ai që ka qenë luftëtar nuk mërzitet, sepse e di pse ka luftuar. Prej ditës së parë kam qenë në UÇK. Do t’i shërbej kombit tim deri në fund”, tha Veseli.

Ai theksoi se “lufta e UÇK-së ishte e shenjtë. Ajo do të mbetet e tillë në zemrat dhe mendjet tona. Historia e Kosovës një herë është shkruar. Askush, kurrë nuk mund ta ndryshojë atë. Liria dhe pavarësia jonë nuk do të zhbëhen kurrë. Kosova dhe populli i saj do të ekzistojnë përherë”. /atsh

Deputeti i PS, Ditmir Bushati u shpreh se “nuk ka 15 kushte për Shqipërinë për nisjen e procesit të negociatave të Shqipërisë me BE”.

Gjatë një interviste televizive, Bushati theksoi se, “së pari duhet të kuptojmë radhën e procesit të anëtarësimit të Shqipërisë në BE. Kemi pasur disa rekomandime në KE, një vendimmarrje nga ana e vendeve anëtare të BE të cilat kanë përcaktuar edhe një etapë që duhet të ndiqet nga ana e Shqipërisë”.

Fillimisht vijoi ai, do të përgatitet kuadri negociuese nga ana e Komisionit i cili do të miratohet nga vendet anëtare. Më pas i vjen radha konferencës ndërqeveritare që simbolizon nisjen e bisedimeve mes palëve, (BE –Shqipëri).

“BE në mars të këtij viti ka përcaktuar një listë me detyra, ndaj me gjithë respektin për Parlamentin Europian, ky parlament nuk ka kompetencë për të përcaktuar një listë me detyra apo kushte me një vend kandidat dhe në rastin në fjalë për Shqipërinë”- deklaroi Bushati.

Sipas tij, PE mund të shprehi një shqetësim por nuk mund të flitet për një listë me kushte nga ana e Parlamenti Europain. Procesi është në ato shina që përcakton traktati dhe për momentin është nga njëra anë Këshilli Europës dhe nga ana tjetër vendet anëtare të BE. “Lista e detyrave që duhet të përmbushi Shqipëria për anëtarësim është e qartë një pjesë e çështjeve janë identifikuar në rezolutën që ne i kemi miratuar në parlament, nevojitet bashkëpunim politik dhe institucional. Bëhet fjalë për Reformën Zgjedhore, për vijimin e reformës në drejtësi, Gjykatën Kushtetuese dhe të lartë”- tha Bushati./atsh