Ndeshja Shqipëri-Francë sonte në orën 20:45, sfidë që mbyll edhe ndeshjet në grupin ‘H’ të eliminatoreve, do të inaugurojë arenën e re kombëtare, “Air Albania Stadium”.
Stadiumi pritet të jetë plot, ndërsa do të inaugurohet me një ceremoni të veçantë ku i pranishëm do të jetë edhe presidenti i UEFA-s, Aleksandër Ceferin.
I shoqëruar edhe nga President i FSHF-së, Armando Duka, presidenti i UEFA-s vizitoi ‘Shtëpinë e Futbollit’. Në këtë kompleks krahas zyrave të reja të FSHF po ndërtohen 2 ministadiume me tribuna nga 500 vende secila.
Ceferin e ka cilësuar stadiumin kombëtar “Air Albania” si një xhevahir, teksa ka vlerësuar edhe progresin që Shqipëria ka bërë në futboll.
Ai është shprehur se dita e sotme do të jetë një moment historik për çdo shqiptar./atsh
